Aq üy basşısı Donal'd Tramp. Foto: https://egemen.kz

AQŞ prezidenti Donal'd Tramp Qazaqstanğa sankciya engizuden bas tarttı, – dep habarlaydı QR Energetika ministrligi.

2018 jılı şildede AQŞ Sauda ministrligi Qazaqstannıñ uran importına sauda şekteulerin engizu turalı bastama kötergen bolatın. Tayauda Aq üy basşısı bwl şeşimdi qoldaudan bas tarttı. Qazirgi uaqıtta energetikalıq äriptestik jönindegi birlesken komissiya şeñberinde yadrolıq qauipsizdik, atom önerkäsibi, mwnay jäne gaz, jañartılatın energiya közderin jäne elektr energetikasın damıtu salasındağı ıntımaqtastıq mäseleleri talqılanuda.

QR Energetika ministrligi taratqan habarlamada: «Qazaqstan atom önerkäsibindegi eki jaqtı ıntımaqtastıqtı damıtuğa jäne taratpau rejimin nığaytuğa zor män beredi. Eki jaqtı komissiyalar, is-şaralar men jeke kezdesuler şeñberinde Energetika, Sırtqı ister jäne Wlttıq ekonomika ministrlikteri QR wlttıq müddelerin qorğau jäne uran importına sankciyalardı qoldanudı boldırmau jöninde jwmıstar atqardı. Qazaqstan Respublikası uran öndirisinde köşbasşı memleket jäne bükil älem boyınşa AQŞ-tı qosa alğanda AES-tiñ üzdiksiz jwmıs isteu kepilderiniñ biri bolıp tabıladı. Qazaqstanda jer astı wñğılma siltsizdendiru ädisimen uran öndiru tehnologiyası MAGATE-men eñ ekologiyalıq jäne qauipsiz täsil dep tanıldı», – delingen.

2015 jılı Qazaqstannan AQŞ-qa tabiği urannıñ eksportı 1153,5 tonna, 2016 jılı 1813 tonna bolğan. 2017 jılı 948 tonnağa jetip, bwl eksport jalpı köleminiñ 4,1%-ın körsetken (23 258 tonna). Al 2018 jılı 399,8 tonna boldı, bwl eksport jalpı köleminiñ 1,95%-ı (20452 tonna).

"The Qazaq Times"