سوت شەشىمى: فرانتسيا كارىموۆانىڭ اقشاسىن وزبەكستانعا قايتارماق

وزبەكستان ەكس-پرەزيدەنتىنىڭ قىزى گۇلنار كارىموۆانىڭ فرانتسيادا تاركىلەنگەن مۇلىكتەرىنە قاتىستى سوت ۇكىمى ءمالىم بولدى. ۇكىم بويىنشا كارىموۆانىڭ پاريجدەگى پاتەرى، سەن-تروپاداعى ۆيللاسى، پاريج ماڭىنداعى سارايى ساتىلىپ، اقشا وزبەك بيۋدجەتىنە اۋدارىلاتىن بولدى. 

بيىل 6 ناۋرىزدا وزبەكستان باس پروكۋراتۋرواسى تاراتقان مالىمدەمەدە: «وزبەكستاننىڭ تۇڭعىش پرەزيدەنتى يسلام كارىموۆتىڭ ۇلكەن قىزى گۇلنارا كارىموۆا جازاسىن وتەۋ شارتتارىن بۇزعانى ءۇشىن جالپى رەجيمدەگى كولونياعا اۋىستىرىلدى»، – دەلىنگەن.

2013 جىلى شۆەيتساريادا گۇلنار كارىموۆا مەن ونىڭ اينالاسىنداعى بىرنەشە ادامنىڭ ۇستىنەن قىلمىستىق ءىس قوزعالادى. ودان سوڭ شۆەيتساريا سوتى «زاڭسىز جولمەن تابىلعان» دەپ كارىموۆانىڭ 800 ملن شۆەيتسار فرانكىن بۇعاتتادى. ال 2014 جىلى 5 قىركۇيەكتە تۋرنەر كارىموۆانىڭ پاريجدەگى ءۇش جىلجىمايتىن مۇلكىن (سەن-تروپاداعى ۆيللاسى، ۆەرسالدىڭ ماڭىنداعى سارايى، ودان سوڭ فرانتسيا استاناسىنداعى پاتەرى) تاركىلەۋ تۋرالى قاۋلى شىعارادى.

مالىمەتتەر بويىنشا، بۇگىنگى سوت شەشىمى دە وسى شۆەيتسارياداعى تەرگەۋ كەزىندە فرانتسيادا تاركىلەنگەن كارىموۆانىڭ مۇلىكتەرىنە قاتىستى. شۆەيتساريا قۇقىق قورعاۋشىلارى فرانتسۋز ارىپتەستەرىنە كارىموۆانىڭ زاڭسىز اقشاسىنا قاتىستى سۇراۋ جولداعان. سوعان سايكەس، فرانتسۋز پروكۋراتۋراسى 2014 جىلى «قىلمىستىق جولمەن تابىلعان اقشانى زاڭسىز جىلىستاتۋ» دەرەگى بويىنشا قىلمىستىق ءىس قوزعايدى. بۇل ءىس پاريج سوتىنىڭ قارجى ءبولىمىنىڭ تەرگەۋشىسى سەرج تۋرنەرگە تاپسىرىلماق.

فرانتسۋزدىڭ Challenges ىسكەرلىك باسىلىمىنىڭ مالىمەتىنشە، قالاداعى پاتەر 31 ملن، ۆيللا 2,4 ملن، ساراي 28 ملن ەۆرو تۇرادى. گۇلنار كارىموۆا مىنە وسى قىمبات ۇيلەردى وزبەكستاننىڭ تەلەكوممۋنيكاتسيا نارىعىندا ورىن الۋ ءۇشىن شەتەلدىك كومپانيالاردان العان پاراسى ەسەبىنەن ساتىپ العان كورىنەدى. جەمقورلىق تۇرىندە الىنعان اقشا كارىموۆانىڭ شوتىنا شۆەتسيادا، رەسەيدە جانە نيدەرلاندىدا تىركەلگەن كومپانيالار اتىنان كەلىپ تۇسكەن.

كارىموۆا 2013 جىلعا دەيىن كوپشىلىك الدىندا ءجۇردى، ەلدىڭ ساياسي ومىرىنە ارالاستى. سونىمەن قاتار، ول وزبەكستاندى 27 جىل باسقارىپ، 2016 جىلى قىركۇيەكتە قايتىس بولعان اكەسى يسلام كارىموۆتىڭ ورنىن باسۋى ىقتيمال تۇلعا رەتىندە تانىلعان. گۇلنارا كارىموۆانىڭ ۇستىنەن قىلمىستىق ءىس 2015 جىلى قوزعالدى. ءدال وسى جىلى تاشكەنت قالالىق سوتى ونى «اسا ءىرى كولەمدە قارجى جىمقىرۋ»، «بوپسالاۋ»، «سالىقتان جالتارۋ» ايىپتارى بويىنشا كىنالى دەپ تانىپ، بەس جىلعا باس بوستاندىعىنان ايىرعان. 2017 جىلى شىلدەدە وزبەكستان باس پروكۋراتۋراسى گۇلنارا كارموۆانىڭ ۇستىنەن تاعى بىرنەشە قىلمىس بويىنشا ءىس قوزعالعاندىعىن مالىمدەدى. وزبەكستان رەسمي ورگاندارىنىڭ مالىمدەمەسىنەن كەيىن ونعان تيەسىلى الەمنىڭ 12 ەلىندەگى بانك شوتتارى مەن جىلجىمايتىن مۇلىكتەرى بۇعاتتالعان. كارىموۆاعا قارسى ەكى قىلمىستىق ءىس بويىنشا مەملەكەتكە كەلتىرىلگەن زالالدىڭ جالپى سوماسى 2 ملرد دوللار.

"The Qazaq Times"