گۇلنار كاريموۆاعا قارسى جاڭا ءىس قوزعالدى

وزبەكستاننىڭ باس پروكۋراتۋراسى گۇلنار كاريموۆاعا قارسى جاڭا ءىس قوزعادى.

قاداعالاۋ ورگانىنىڭ ءباسپاسوز قىزمەتىندەگىلەر اتاپ وتكەندەي، وزبەكستاننىڭ باس پروكۋراتۋراسى مەن ادىلەت مينيسترلىگى اقش، شۆەيتساريا، فرانتسيا، رەسەي فەدەراتسياسى جانە لاتۆيا سياقتى شەت مەملەكەتتەرمەن گ.كاريموۆانىڭ قىلمىستىق جولمەن الىنعان 1,3 ملرد. اقش دوللارى تابىسىن قايتارۋ ماسەلەسى بويىنشا بىرلەسىپ جۇمىس جۇرگىزىپ جاتىر، سونىمەن قاتار جەكەلەگەن ەلدەردە دە قىلمىستىق ىستەرى تەرگەلۋدە.

تەرگەۋدەگى قىلمىستىق ءىس اياسىندا كەلتىرىلگەن زالالدىڭ مولشەرى 165 ملن. اقش دوللارىنان استام جانە 85 ملرد-تى قۇراعان. وسىعان بايلانىستى، بوپسالاۋ، يەمدەنۋ جولىمەن توناۋ نەمەسە ۇرلاۋ، وزبەكستاننىڭ مۇددەلەرىنە قايشى مامىلە جاساسۋ جانە ەلدىڭ قىلمىستىق كودەكسىنىڭ ءتيىستى باپتارىندا قاراستىرىلعان قىلمىستىق قوعامداستىق قۇرۋمەن بايلانىستى جاساعان قىلمىستار ءۇشىن جاڭا ايىپ تاعىلعان.

باس پروكۋراتۋرا تاراتقان مالىمدەمەدە: «وسى جۇمىس اياسىندا حالىقارالىق قۇرىلىمدار مەن ازاماتتاردان گ.كاريموۆانىڭ بۇرىنعى تەرگەۋلەردە قامتىلماعان جاڭا قىلمىستارى تۋرالى دەرەكتەر كەلىپ ءتۇستى. بۇل جاڭادان اشىلعان ءمان-جايلار جاڭا قىلمىستىق ءىس قوزعاۋعا نەگىز بولدى. تەرگەۋ بارىسىندا گ.كاريموۆا بىرنەشە ادامنان تۇراتىن كوپتەگەن ۇيىمداسقان قىلمىستىق توپ قۇرىپ، قىلمىستىق قاۋىمداستىقتى باسقارعان. گ.كاريموۆا جانە ونىڭ سىبايلاستارى ۇيىمداسقان توپتاردىڭ قۇرامىندا جاساعان قىلمىستارى ءۇشىن سوت تاعايىنداعان جازانى وتەپ جاتىر»، – دەلىنگەن.

گۇلنارا كاريموۆاعا قارسى ءىس اقش-تا 2014 جىلى قوزعالعان. وزبەكستان بيلىگى دە كاريموۆاعا 53 ملن دوللار يەمدەندى دەگەن ايىپپەن ءىس قوزعاعان. 2017 جىلى ەلدىڭ باس پروكۋراتۋراسى كاريموۆا 10 جىلعا سوتتالعانىن حابارلادى. بىراق ءبىر جىلدان سوڭ تاشكەنت وبلىستىق سوتى ونىڭ جازاسىن بەس جىلعا ەركىندىگىن شەكتەۋگە (ۇيقاماققا) اۋىستىردى. 2019 جىلى ناۋرىزدا ونى قايتادان كولونياعا جىبەردى.

"The Qazaq Times"