گۇلنارا كارىموۆانىڭ قىزى يمان كارىموۆا وزبەكستان بيلىگىنە ەسكەرتۋ جاسادى.

قىركۇيەك ايىنىڭ 16-ى كۇنى تاشكەنت قالاسىندا گۇلنارا كارىموۆانىڭ جابىق سوتى بولدى. وسىدان كەيىن ونىڭ قىزى يمان كارىموۆا ەل پرەزيدەنتى شاۆكات ميرزيەەۆ پەن ۇكىمەت مۇشەلەرىنە ەسكەرتۋ جاسادى. ول ءوزىنىڭ «Instagram» پاراقشاسىندا اناسىنىڭ ۇستىنەن قوزعالعان كەزەكتى ءىستى «ساياسي قويىلىم» دەپ اتاپ، جاقىن كۇندەرى وزبەكستانداعى جەمقورلىققا بايلانىستى فاكتىلەردى جاريالايتىنىن مالىمدەدى.

«الداعى بىرنەشە كۇندە حالىقارالىق سوتتار مەن جەمقورلىقتى تەكسەرۋ ۇيىمدارىنا وزبەكستان بيلىگى انامنان نە ءۇشىن قورقاتىنىن دالەلدەيتىن فاكتىلەردىڭ ءبىر بولىگىن جىبەرەمىز. بۇل مالىمەتتەردەن حالىقتىڭ نازارىن باسقا جاققا اۋدارۋ مۇمكىن بولمايدى» - دەپ جازدى يمان كاريموۆا.

ءدال وسى كۇنى شۆەيتساريالىق ادۆوكات گرەگۋار مانجا گۇلنارا كارىموۆانى ياشناباد سوتىنان بەلگىسىز باعىتقا الىپ كەتكەندىگى جونىندە مالىمدەدى.

تامىز ايىندا وزبەكستان باس پروكۋراتۋراسى گۇلنارا كارىموۆانىڭ ۇستىنەن جاڭا قىلمىستىق ءىستىڭ قوزعالعاندىعى جونىندە اقپارات تاراتقان. وعان «اسا ءىرى كولەمدە قارجى جىمقىرۋ» جانە «وزبەكستان مۇددەسىنە قارسى كەلىسىمدەر جاساۋ» باپتارى بويىنشا ايىپ تاعىلعان.

"The Qazaq Times"