قازاقستاندا قاۋىپتى وبا وشاقتارى تابىلدى

قازاقستاننىڭ 3 وبلىسى مەن ءبىر قالاسىندا كونگو-قىرىم گەمموراگيالىق قىزباسىنىڭ تابيعي وشاعى تىركەلگەن.

بۇل جايلى قر دەنساۋلىق ساقتاۋ مينيسترلىگىنىڭ تاۋارلار مەن كورسەتىلەتىن قىزمەتتەردىڭ ساپاسىن جانە قاۋىپسىزدىگىن باقىلاۋ كوميتەتى توراعاسىنىڭ ورىنباسارى جانداربەك بەكشين ارنايى بريفينگ بارىسىندا مالىمدەدى. ج.بەكشيننىڭ ايتۋىنشا، اتالعان وبا بەلگىلەرى جامبىل وبلىسى، تۇركىستان، قىزىلوردا، شىمكەنتتەن بايقالعان. ءوز سوزىندە ول: «قازاقستاندا وبا، تۋليارەميا سياقتى اسا قاۋىپتى ينفەكتسيالاردىڭ تابيعي وشاقتارى بار. ال جامبىل، قىزىلوردا، تۇركىستان وبلىستارى مەن شىمكەنت قالاسىندا كونگو-قىرىم گەمورراگيالىق قىزباسى مەن بۇيرەك سيندرومدى گەمورراگيالىق قىزباسىنىڭ وشاقتارى انىقتالدى. قازاقستاننىڭ بارلىق وبلىستارىندا كۇيدىرگى، كەنە ەنتسەفاليتى، قۇتىرۋ سياقتى قاۋىپتى ىندەتتەردىڭ قولايسىز ستاتسيونارلىق پۋنكتەرى بار. بىلتىر شىعىس قازاقستاننىڭ كاتونقاراعاي اۋدانىندا ءسىبىر جاراسىنىڭ وشاعى شىعىپ، ءبىر ادام كوز جۇمعان بولاتىن. كەيىن اۋرۋ بۇرىنعى مال قورىمىنان شىققانى انىقتالعان. بيىل شىعىس قازاقستاندا ءسىبىر جاراسىنىڭ قاۋپى جوق. ەسەسىنە، تۇركىستان وبلىسىندا ءبىر وشاق انىقتالىپ وتىر»، – دەپ مالىمدەدى.

قاۋىپتى وبالاردى كوبىنەسە شەتەلگە شىققان قازاقستاندىق تۋريستەر جۇقتىرادى. وبا جۇعۋى مۇمكىن ەلدەر قاتارنىدا ماداگاسكار ارالى، تايلاند، افريكا، سينگاپۋر، برازيليا، ءۇندىستان، ۆەتنام بار. مالىمەتتەر بويىنشا، بىلتىر الەم ەلدەرى بويىنشا 300 مىڭ تىرىسقاق تىركەلىپ، 900 ادام ولگەن. 200-دەن استام كۇيدىرگى، 500-گە جۋىق كونگو-قىرىم گەمورراگيالىق قىزباسى، 200-دەن استام سارى قىزبا، 300 مىڭعا جۋىق دەنگە قىزباسى تىركەلگەن. ال قازاقستاندا سوڭعى ەكى جىلدا تايلاند، ءۇندىستان، سينگاپۋر جانە ۆەتنام ەلدەرىنەن كونگو قىزباسىنىڭ تاسىمالدانۋى 10 رەت،  دەنگە قىزباسىنىڭ تاسىمالدانۋى 9 رەت تىركەلگەن.

"The Qazaq Times"