اقتوبەدەگى تەرروريستەر شابۋىلىندا ەرلىك كورسەتكەن سارباز

وتكەن جىلدىڭ ماۋسىم ايىندا اقتوبەدە بولعان تەرروريستەرمەن بەتپە-بەت كەلگەن قارۋلى شابۋىلعا تاباندىلىقپەن توتەپ بەرگەن جىگەرلى سارباز، بۇگىنگى كۇنى ۇلتتىق ۇلاننىڭ «وڭتۇستىك» وڭىرلىك قولباسشىلىعىنا قاراستى 7552 اسكەري بولىمىندە كەلىسىمشارت بويىنشا قىزمەت ەتەتىن ەفرەيتور اقجول شايسۇلتانعا، ول ءوزى وقىپ، ءبىلىم العان الماتى وبلىسى، ىلە اۋدانى، قاراوي اۋىلىنداعى ىدىرىس نوعايباەۆ اتىنداعى № 18 ورتا مەكتەبىنىڭ ۇستازدار ۇجىمى مەن وقۋشىلارى قۇرمەت كورسەتتى.

كۇنى كەشە عانا تۇلەك قىپ، قانات قاقتىرىپ ۇشىرعان التىن ۇيا مەكتەبىنە ومىراۋىنا مەدال تاعىپ، باتىر بوپ ورالعان اقجولدى ۇستازدارى سالتاناتتى تۇردە قارسى الدى. كەزدەسۋ بارىسىندا شاكىرتىنە دەگەن ىستىق ىقىلاستارىن جاۋدىرىپ، سىن ساعاتتا مويىماي، وتان الدىندا بەرگەن انتىنا بەرىك بولعانى ءۇشىن العىستارىن ايتىپ جاتتى.

شايسۇلتان اقجول جانە الماتى وبلىسى، ىلە اۋدانى، قاراوي اۋىلىنداعى ىدىرىس نوعايباەۆ اتىنداعى № 18 ورتا مەكتەبىنىڭ ۇستازدار ۇجىمى مەن وقۋشىلارى

مەكتەپ ديرەكتورىنىڭ تاربيە ءىسى جونىندەگى ورىنباسارى گۇلجانار نەگيمەتوۆا وقۋشىلار قاۋىمىنا اقجولدىڭ وقۋشى كەزىندەگى وقۋ ۇلگەرىمى، ۇلگىلى تاربيەسى جانە جولداستىقتى باعالايتىن قاسيەتى تۋرالى ەستەلىكتەر ايتىپ، شاكىرتىمەن ماقتاناتىنىن جەتكىزدى.

ءوز كەزەگىندە قاھارمان ۇل اقجول ەرسۇلتانۇلى مەكتەپ وقۋشىلارىمەن پاتريوتتىق تاقىرىپتا اڭگىمە ءوربىتتى. «وتان» دەگەن ءسوزدىڭ وتباسىنان، مەكتەپ پارتاسىنان باستاۋ الاتىنىن پايىمداپ، ۇيدەگى اتا-اناسى مەن مەكتەپتەگى ۇستازدارىنىڭ بەرگەن ءتالىم-تاربيەسىنىڭ ارقاسىندا وسىنداي دارەجەگە جەتكەندىگىن ايتتى. كەش بارىسىندا وقۋشىلار دا سۇراقتارىن قويىپ جاتتى. ولاردىڭ باسىم بولىگى اقتوبەدە بولعان قاندى وقيعا جايلى، ساربازداردىڭ ءولىم مەن ءومىر ورتاسىندا قورىقپاي كورسەتكەن تاباندىلىعى اياسىندا بولدى. اسىرەسە، اقجولدىڭ سول كۇنى ەرلىكپەن قازا تاپقان قارۋلاس دوسى دوسبول ساپارمەن بىرگە اسكەري جاساققا ءتۇسىپ، قاندىقول لاڭكەستەردىڭ قارۋلى توبىنا العاش قارۋسىز بەتپە-بەت كەلىپ، اسكەري بولىمدەگى قارۋ-جاراق پەن وق-دارىلەردى ساقتايتىن قويمالاردىڭ قايدا ورنالاسقانىن ايتپاي، قۇپيالارىن اشپاعانى جايلى اڭگىمەلەرى وتە اسەرلى بولدى. وقۋشىلار تىرپ ەتپەستەن ۇيىپ تىڭدادى. ءوز سوزىندە اقجول: «مەن ومىرىمدە بۇنداي وقيعامەن العاش رەت بەتپە-بەت كەلدىم. سۇستارى سۋىق، قارۋلى لاڭكەستەر توبى ەشكىمدى ايامايتىنى بەلگىلى. ولاردىڭ بىزگە قارۋ كەزەنگەنىندە ازداپ قورقىنىش تا بولعانى راس. بىراق ءبىز جىگەرىمىزدى سىندىرمادىق، اياعىنا دەيىن كۇرەستىك، جەڭدىك تە! ويتكەنى ولار دىتتەگەن ماقساتتارىنا جەتە المادى. بۇل جەردە دوسبول ساپاردىڭ ەرلىگىن ەرەكشە ايتا كەتكەن ءجون. ول - ناعىز ەر. ول ءوز انتىنا ادال بولدى. ءوز ءومىرىن وتانىنىڭ تىنىشتىعى ءۇشىن جان پيدا ەتتى. ازات ەلدىڭ ۇلدارى، مىنە وسىنداي بولسا كەرەك. مەن سول كۇنگى وقيعانى، قاندى كۇرەستە وپات بولعان قارۋلاس دوسىم دوسبولدى ەشقاشان ۇمىتپايمىن، ويتكەنى ەرلىك ەشقاشان دا ۇمىتىلماۋى ءتيىس!» - دەپ، اعىنان جارىلدى. وقۋشىلار تاراپىنان «جارايسىڭ اقجول!»، «سەن ناعىز باتىرسىڭ!» دەگەن داۋىستار دا ەستىلىپ جاتتى.

ۇلتتىۇ ۇلان ساربازى شايسۇلتان اقجول جانە الماتى وبلىسى، ىلە اۋدانى، قاراوي اۋىلىنداعى ىدىرىس نوعايباەۆ اتىنداعى № 18 ورتا مەكتەبىنىڭ ۇستازدار ۇجىمى مەن وقۋشىلارى

ءىس-شارا بارىسىندا مەكتەپ ديرەكتورىنىڭ وقۋ ءىسى جونىندەگى ورىنباسارى ايسارا راسپەكوۆا وقىتقان ۇستازدارىن جەرگە قاراتپاي، مەكتەپ ابىرويىن وسىرگەن اقجولعا مەكتەپ ديرەكتورى ايگۇل ۋاليباەۆانىڭ اتىنان العىس حاتىن ۇسىندى.

وسى وڭىردەگى وسكەلەڭ جاستارعا ۇنەمى پاتريوتتىق-تانىمدىق وسيەتتەرىن دارىپتەپ جۇرەتىن اۋعان سوعىسىنىڭ ارداگەرى ابىلاي حيزمەتوۆ ايتۋلى ءىس-شاراعا ارنايى كەلىپ، سول كۇنگى ساربازداردىڭ كورسەتكەن قايسارلىقتارىن ناعىز ەرلىككە بالادى. وسىنداي وتانشىل ۇرپاقتىڭ ءوسىپ كەلە جاتقانىن ماقتانىشپەن ايتىپ، اۋعان سوعىسى ارداگەرلەرى قاۋىمداستىعىنىڭ اتىنان «ارميا گەنەرالى ساعادات نۇرماعامبەتوۆ» اتىنداعى مەدالدى اقجولدىڭ ومىراۋىنا تاقتى.

«The Qazaq Times»