قازاقستان مەن قىتاي قارىم-قاتىناسىنا، اسىرەسە، سىرتقى ىستەر ءمينيسترى بەيبىت اتامقۇلوۆتىڭ بەيجىڭ ساپارىنا بايلانىستى ەلىمىزدىڭ بۇقارالىق اقپارات قۇرالدارىندا تاراعان ءتۇرلى مالىمەتتەرگە بايلانىستى قر ءسىم تارابى رەسمي مالىمدەمە جاسادى. اتالعان مالىمدەمە مينيسترلىكتىڭ رەسمي سايتىندا جاريالانعان.

رەسمي مالىمدەمە بىلاي دەلىنگەن:

قازاقستان مەن قىتاي سىرتقى ساياسي ۆەدومستۆولارىنىڭ باسشىلارى اراسىنداعى كەلىسسوزدەردىڭ قورىتىندىسىنا قاتىستى كەيبىر باق-تارداعى بۇرمالاۋ مەن بۇرىس ينتەرپرەتاتسيالارعا بايلانىستى كەلەسى تۇسىندىرمەلەردى جاساۋ ماڭىزدى دەپ سانايمىز.

بىرىنشىدەن. قازاقستان قىتايدى «ءۇش زۇلىمدىققا» - تەرروريزم، ەكسترەميزم مەن سەپاراتيزمگە قارسى كۇرەستە ءاردايىم قولداپ وتىر. بۇل ءتۇرلى ەكى جاقتى قۇجاتتاردا، ونىڭ ىشىندە قازاقستان رەسپۋبليكاسى مەن قىتاي حالىق رەسپۋبليكاسىنىڭ 2018 جىلعى 7 ماۋسىمدا قول قويىلعان بىرلەسكەن مالىمدەمەسىندە بىرنەشە رەت كورسەتىلگەن. بۇل تۋرالى سىرتقى ىستەر ءمينيسترى بەيبىت اتامقۇلوۆتىڭ رەسمي ساپارى بارىسىندا بەيجىڭدە وتكەن قازاقستان-قىتاي كەلىسسوزدەرى بارىسىندا ءسوز بولدى. ءدال وسى تۇرعىدا قىتاي ءسىم باسشىسىنىڭ مالىمدەمەسى جاسالدى.

ەكىنشىدەن. قىتاي اۋماعىندا تۇراتىن ەتنيكالىق قازاقتارعا كەلەتىن بولساق، قازاقستان ولاردى دوستىق ەكى جاقتى قاتىناستاردىڭ ماڭىزدى فاكتورى رەتىندە قاراستىرادى. بىزدە قىتايمەن ورتاق پىكىر بار. پەكيندە وتكەن كەزدەسۋدە ەكى ەلدىڭ سىرتقى ىستەر مينيسترلىكتەرى اراسىنداعى جۇمىس بايلانىستارى ارقىلى تۋىندايتىن ماسەلەلەردى شەشۋگە ءوزارا مۇددەلىلىك تانىتىپ، كونسۋلدىق قىزمەتتەردىڭ جۇمىسىن جانداندىرۋ تۋرالى ۋاعدالاستىققا قول جەتكىزىلدى. بۇل جۇمىس جالعاسادى.

قازاقستان سىرتقى ىستەر مينيسترلىگى باق-تاردى مالىمدەمەلەرىن دۇرىس جاريالاۋعا، بۇرمالاۋدان، تۇسىنىكتەردى وزگەرتپەۋگە جانە ماتىننەن، اسىرەسە حالىق ءۇشىن سەزىمتال ماسەلەلەر بويىنشا سويلەمدەردى ۇزبەۋگە شاقىرادى.

قازاقستان مەن قىتاي ەكى مەملەكەت حالىقتارى اراسىنداعى ستراتەگيالىق سەرىكتەستىك پەن دوستىقتى نىعايتۋدى جالعاستىرا وتىرىپ، ايماقتاعى جانە الەمدەگى بەيبىتشىلىككە ىلگەرىلەمەلى دامۋعا جاردەمدەسەدى.

وسىدان بۇرىن باق-تا كەزەكتى قازاقستان-قىتاي كەلىسسوزى مەن رەسمي كەزدەسۋى تۋراسىندا ءتۇرلى الىپ قاشپا پىكىرلەر تاراعانى راس. بۇعان بەلگىلى جاقتان كەزەكتى كەلىسسوز-كەزدەسۋى تۋرالى ناقتى ءارى تۇسىنىكتى اقپاراتقا قوعامدىق اۋديتوريانىڭ دەر شاعىندا قولجەتىمدى بولماۋى ءوز اسەرىن تيگىزدى. اسىرەسە، قىتايداعى قازاق ماسەلەسى قازاق قوعامنىڭ نازارىندا تۇرعان ەڭ باستى تاقىرىپتىڭ ءبىرى. بۇل جايىندا كەز-كەلگەن رەسمي قادامدار اۋديتورياعا ناقتى ءارى دەر كەزىندە جەتىپ وتىرۋى كەرەك ەدى.

مۇنداي جاعداي ءبىر عانا ءسىم-گە ءتان ەمەس. كوپ رەتتە مينيسترلىكتەر بەلگىلى ءبىر ساياسي ماسەلەلەرگە بايلانىستى اقپارات بەرۋگە ساراڭدىق تانىتادى. اسىرەسە، رەسمي سايتتاردىڭ قازاق تىلىندەگى پاراقشالارى اقپاراتتى كەشىكتىرىپ بەرەتىنى سىنعا كوپ ۇشىرايدى.

“The Qazaq Times”