فوتو: http://static.elitar.kz

اقش مەملەكەتتىك دەپارتامەنتى جانە كونگرەس وكىلدەرى قازاقستان بيلىگىندەگى اۋىس-تۇيىسكە قاتىستى پىكىر ءبىلدىردى.

قۇراما شتات مەملەكەتتىك دەپارتامەنتىنىڭ رەسمي وكىلىنىڭ ورىنباسارى روبەرت پاللادينو قازاقستاندى 30 جىلعا جۋىق باسقارعان نۇرسۇلتان نازارباەۆتىڭ 19 ناۋرىزدا ءوز ەركىمەن وتستاۆكاعا كەتۋىنە قاتىستى مالىمدەمە جاسادى. مەملەكەتتىك دەپارتامەنت وكىلىنىڭ ايتۋىنشا، اقش-تىڭ قازاقستانمەن قارىم-قاتىناسى ايماقتىق قاۋىپسىزدىكتى قۇرمەتتەۋدىڭ ورتاق يدەيالارىنا نەگىزدەلگەن. پاللادينو مالىمدەمەسىندە: «قازاقستان ءۇشىن وسى تاريحي ساتتە ءبىز نازارباەۆتىڭ بۇگىنگى زاماناۋي، ەگەمەن قازاقستاننىڭ قالىپتاسۋىنا قوسقان ۇلەسىن جانە وڭىرلىك، جاھاندىق دەڭگەيدە ساياسي بىلىكتىلىگىن قۇرمەتتەيمىز. سونداي-اق، يادرولىق قارۋدى تاراتپاۋ، دەنۋكلەاريزاتسياقا قاتىستى ناتيجەلى جۇمىسىن، قازاقستاندا بەيبىتشىلىك پەن گۇلدەنۋدى قامتاماسىز ەتۋ ىسىنە قوسقان ۇلەسىن اتاپ وتكىمىز كەلەدى»، – دەدى. مالىمدەمەدە ايتىلعانداي، اقش تاراپى قازاقستانمەن كەڭەيتىلگەن ستراتەگيالىق ارىپتەستىكتى تەرەڭدەتۋ جانە ەكونوميكالىق دامۋ، ساۋدا جانە ينۆەستيتسيالار جانە وڭىرلىك جانە جاھاندىق قاۋىپسىزدىكتى قامتاماسىز ەتۋ سالاسىنداعى بىرلەسكەن جۇمىستى جالعاستىرۋعا نيەتتى.

قازاقستان ىشكى ساياساتىنداعى وزگەرىستەرگە قاتىستى اقش كونگرەسىنىڭ زەرتتەۋلەر جۇرگىزۋ بويىنشا قىزمەتكەرى ۋيلل مەكي قازاقستاندى بيلىك ءترانزيتى جاعدايىندا نە كۇتىپ تۇرعانى جايلى تالداۋ جاساعان. «The National Interest» باسىلىمىندا جارىق كورگەن تالداۋدا قازاقستاندى ساياسي كوشباسشىنى اۋىستىرۋ كەزىندە نە كۇتىپ تۇرعاندىعى ايتىلعان.

2016 جىلى وزبەكستاننىڭ «اۆتوريتارلىق پرەزيدەنتى» يسلام كارىموۆ قايتىس بولىپ، بيلىك ەلدىڭ پرەمەر-ءمينيسترى شاۆكات ميرزيەەۆكە اۋىسقاننان كەيىنگى جاعداي بارىمىزگە بەلگىلى. جالپى ساياساتتاعى وسىنداي تۇراقسىز جايتتاردى ەسكەرە كەلە، ن.نازارباەۆ 2017 جىلى ناۋرىزدا كونستيتۋتسياعا ەنگىزىلگەن بىرنەشە تۇزەتۋلەردى ماقۇلدادى. 2018 جىلدىڭ شىلدەسىندە قازاقستان پارلامەنتى نازارباەۆتىڭ «تاريحي ميسسياسىنا وراي ءومىر بويى» ەلدىڭ قاۋىپسىزدىك كەڭەسىن باسقارۋعا قۇقىق بەرەتىن زاڭ جوباسىن قابىلدادى. بۇل زاڭ جوباسى سونداي-اق كەڭەستى كونسۋلتاتيۆتىك ورگاننان كونستيتۋتسيالىق ورگانعا اينالدىرىپ، ونىڭ وكىلەتتىگىن كەڭەيتكەندىگىنە توقتالعان ۋيلل مەكي ءوز ماقالاسىندا: «ەليتالار اراسىنداعى بيلىككە كۇرەس قازىرگى باسشى كەتكەن جاعدايدا قازاقستان تۇراقتىلىعى ءۇشىن ەڭ ۇلكەن قاتەرلەردىڭ ءبىرى بولۋى مۇمكىن. ال بۇل جايتتىڭ ساياسي جاعدايداعى سالماعى اۋىر. سول سەبەپتەن، قازاقستانداعى كەز كەلگەن تۇراقسىزدىق ۋاشينگتوندى الاڭداتادى»، – دەيدى.

ايتا كەتەر بولساك، 19 ناۋرىزدا جەرگىلىكتى ۋاقىت بويىنشا ساعات 19:00-دە قازاقستاننىڭ تۇڭعىش پرەزيدەنتى نۇرسۇلتان نازارباەۆ وتستاۆكاعا كەتەتىندىگىن جاريا ەتتى. 20 ناۋرىزدا قر پارلامەنتى پالاتالارىنىڭ بىرلەسكەن وتىرىسىندا قر پرەزيدەنتى لاۋازىمىنا تاعايىندالعان قاسىم-جومارت توقاەۆ انت قابىلداپ، استانانىڭ اتاۋىن «نۇرسۇلتان» دەپ اتاۋدى ۇسىنعان. مۇنىمەن قوسا، توقاەۆ رەسپۋبليكاداعى قالالاردىڭ ورتالىق كوشەلەرىنىڭ اتاۋىن دا نۇرسۇلتان نازارباەۆتىڭ اتىنا بەرۋدى ۇسىندى.

"The Qazaq Times"