اوسشك سىرتقى ىستەر مينيسترلەرىنىڭ VI وتىرىسى. فوتو: CICA Secretariat Facebook پاراقشاسىنان

توقاەۆ نازارباەۆتى ازيا ەلدەرىنىڭ باسىن قوساتىن CICA (قازاقشا اەسشك) ۇيىمنىڭ دانالار كەڭەسىنىڭ توراعاسى قىزمەتىنە ۇسىندى.

قازاقستاننىڭ ەكس-پرەزيدەنتى نۇرسۇلتان نازارباەۆ ازياداعى ءوزارا ءىس-قيمىل جانە سەنىم شارالارى جونىندەگى كەڭەستىڭ (اوسشك) دانالار كەڭەسىن باسقارۋى مۇمكىن. ونىڭ كانديداتۋراسىن قازىرگى پرەزيدەنت توقاەۆ استانادا ءوتىپ جاتقان اوسشك سىرتقى ىستەر مينيسترلەرىنىڭ VI وتىرىسىندا ۇسىندى.

اوسشك جاڭعىرتۋدى جالعاستىرۋ ماقساتىندا قازاقستان بىلتىر قولعا العان توراعالىعىن 2024 جىلعا دەيىن ۇزارتۋ تۋرالى ۇسىنىس جاسادى.

دانالار كەڭەسى ءوزارا قارىم-قاتىناستاعى سەنىمدى نىعايتۋدىڭ ءتۇرلى شارالارىن ىسكە اسىرۋعا باعىتتالعان ۇسىنىم ازىرلەۋ ءۇشىن قۇرىلعان.

اوسشك – وڭىردەگى ماسەلەلەردى تالقىلاۋعا جانە شىنايى ىنتىماقتاستىقتى دامىتۋعا ارنالعان جالپىازيالىق ديالوگ الاڭى. ءوزارا ءىس-قيمىلدىڭ بەس نەگىزگى باعىتى رەتىندە ەكونوميكالىق، اسكەري-ساياسي، گۋمانيتارلىق جانە ەكولوگيالىق ولشەم، سونداي-اق جاڭا سىن-قاتەرلەر سالاسى ايقىندالعان.

وسىعان دەيىن نازارباەۆ ازياداعى ءوزارا ءىس-قيمىل جانە سەنىم شارالارى جونىندەگى كەڭەستىڭ نەگىزىن قالاۋشى. ول بۇل يدەيانى 1992 جىلعى قازاندا بۇۇ باس اسسامبلەياسىنىڭ 47-سەسسياسىندا ۇسىنعان ەدى. اوسشك ءبىرىنشى ءسامميتى 2002 جىلى ءوتتى. قازىر بۇل ۇيىمعا ءباا، رەسەي، شريلانكا، ۆەتنام، تۇركيا، يزاريل، كورەيا رەسپۋبليكاسى قاتارلى 26 مەملەكەت مۇشە. 5 قازان اوسشك كۇنى رەتىندە بەكىتىلگەن.

بۇدان الدىڭعى دۋشانبەدە (تاجىكستان) وتكەن V سامميتتە «اوسشك-ءتىڭ قاۋىپسىز جانە وركەندەگەن ايماعىنىڭ جالپى كورىنىسى» دەكلاراتسياسى قابىلدانعان. قۇجاتتا ۇيىمنىڭ نەگىزىن قالاۋشى رەتىندە نازارباەۆتىڭ ەرەكشە ءرولى مەن قوسقان ۇلەسى اتالىپ، قۇرمەت كورسەتىلگەن ەدى. ەندى «دانالار كەڭەسىنىڭ» باسشىسى اتانباق.

The Qazaq Times