Astana LRT وپەراتورى «City Transportation Systems» جشس كومپانياسى جالپى قۇنى 1 ميلليارد دوللارلىق وبليگاتسيا شىعارۋعا جانە ساتۋعا تەندەر جاريالادى. ونى اق «Halyk Global Markets» كومپانياسى جەڭىپ الدى.

مەملەكەتتىك ساتىپ الۋلار پورتالىندا جاريالانعان مالىمەت بويىنشا، تامىزدىڭ 3-ءى كۇنى Astana LRT وپەراتورى «City Transportation Systems» جشس «Halyk Global Markets» اق كومپانياسىمەن قۇندى قاعازدار نارىعىنا وبليگاتسيا شىعارۋعا بايلانىستى 537,3 ميلليون تەڭگەگە كەلىسىمشارتقا وتىرعان. كەلىسىم تىكەلەي ءبىر كوزدەن ساتىپ الۋ ارقىلى جۇزەگە اسىرىلعان. كەلىسىمگە سايكەس،  «Halyk Global Markets» اق كومپانياسى 2021 جىلدىڭ سوڭىنا دەيىن قارجى مينيسترلىگىنىڭ كەپىلدىگىمەن جالپى قۇنى 1 ملرد تەڭگە بولاتىن وبليگاتسيانى قۇندى قاعاز نارىعىنا شىعارۋى ءتيىس.

"HALYK GLOBAL MARKETS" كىمگە تيەسىلى؟

«Halyk Global Markets» اق  «حالىق بانك قازاقستان» اق-نىڭ ەنشىلەس كومپانياسى. ال ءوز كەزەگىندە «حالىق بانك» ەكس-پرەزيدەنت نۇرسۇلتان نازارباەۆتىڭ ورتانشى قىزى دينارا مەن ونىڭ كۇيەۋى تيمۋر قۇلىباەۆقا تيەسىلى. بروكەرلىك قىزمەت تۇرلەرىمەن اينالىساتىن «Halyk Global Markets» اق  1997 جىلى تىركەلگەن.

"دەنتوس قازاقستان" جشس 198 ميلليوننىڭ تەندەرىن نە ءۇشىن الدى؟

2 تامىزدا «City Transportation Systems» جشس «دەنتوس قازاقستان» جشس كومپانياسىمەن 198 ميلليون تەڭگەلىك كەلىسىمشارتقا وتىرعان. كەلىسىمشارت بويىنشا، «دەنتوس قازاقستان» كەلىسىمگە قول قويىلعان ۋاقىتتان باستاپ 13 اپتا ىشىندە «City Transportation Systems» جشس كومپانياسىنا وبليگاتسيالاردى لوندون نەمەسە يرلانديا قور بيرجاسىنا جانە حالىقارالىق استانا قارجى ورتالىعىنا شىعارۋدا قۇقىقتىق كەڭەس بەرۋى قاجەت. بۇل مەملەكەتتىك ساتىپ الۋ دا تىكەلەي ءبىر كوزدەن ساتىپ الۋ ارقىلى وتكەن. Uchet.kz سەرۆيسىندەگى دەرەكتەرگە قاراعاندا، «دەنتوس قازاقستان» جشس 1994 جىلى تىركەلگەن. ادۆوكاتتىق قىزمەت تۇرلەرىن ۇسىنادى. ءبىر قىزىعى uchet.kz-تە كومپانيا مەملەكەتتىك ساتىپ الۋلارعا قاتىسپايدى دەپ كورسەتىلگەن.

«City Transportation Systems» جشس Astana LRT-نى اياقتاۋ ءۇشىن داۋلى نىسانعا 1 ملرد دوللار ينۆەستيتسيا تارتۋ ءۇشىن كەلىسىمشارت جاساپ قانا قويماي، قۇرىلىستىڭ قايتا جاندانۋىنىڭ قۇرمەتىنە باق وكىلدەرىن شاقىرىپ، قوي سويىپ، قۇرباندىق شالىپ، يمامعا دۇعا تىلەتكەن. بىراق ەل اراسىندا «جەمقورلىق سيمۆولى» اتانىپ كەتكەن داۋلى نىسانعا ينۆەستيتسيا تارتۋ ماسەلەسى وسىمەن شەشىلە مە؟

اشىق دەرەككوزدەردە جاريالانعان مالىمەتكە سايكەس، مەملەكەت LRT قۇرىلىسىنا 252 ملرد تەڭگە قارجى جۇمساعان. 2019 جىلى LRT شىعىنى - 78 ملرد، بورىشكەرلەر الدىنداعى قارىزى - 185 ملرد تەڭگە بولعان. 2020 جىلى بۇل كورسەتكىش بىرنەشە ميلليونعا ءوسىپ، شىعىندار – 105 ملرد، بورىشكەرلەر قارىزى – 206 ملرد تەڭگەگە جەتكەن. 2020 جىلى بيۋدجەتتى پايدالانۋدى باقىلاۋ بويىنشا ەسەپ كوميتەتى ۇكىمەت پەن ەلوردا اكىمدىگىن Astana LRT قۇرىلىسىن اياقتاۋ قانشالىقتى ءتيىمدى ەكەندىگىن ەگجەي-تەگجەيلى قاراۋعا كەڭەس بەرگەن. ۆەدومستۆا قۇرىلىس جالعاسقان جاعدايدا ونىڭ شىعىنى كوپ بولاتىنىن جانە الداعى ۋاقىتتا نىسان پايدالانۋعا بەرىلگەن كۇننىڭ وزىندە ءوز-ءوزىن اقتامايتىنىن ەسكەرتكەن.

كورنەكىلىك ءۇشىن.

داۋلى نىسانعا ينۆەستورلار وسىنىڭ بارلىعىنا قاراماستان قارجى سالا ما، جوق پا بەلگىسىز. بىراق ءدال قازىرگى جاعدايدا ينۆەستور تارتۋدىڭ بىردەن ءبىر جولى قۇندى قاعازدار بويىنشا جوعارى پايىزدىق مولشەرلەمە ۇسىنۋ. الداعى ۋاقىتتا پايىزدىق مولشەرلەمە قانشا ەكەنىن جانە داۋلى نىسانعا قارجى سالۋعا كىمدەردىڭ كەلىسكەنىن بىلەتىن بولامىز. «The Qazaq Times»  رەداكتسياسى بۇل ماسەلەنى الداعى ۋاقىتتا دا نازاردا ۇستايتىن بولادى.

Astana LRT توڭىرەگىندە جەمقورلىق داۋىنا قاتىستى سوت پروتسەسى 2021 جىلدىڭ 28 مامىرىندا اياقتالعان. 5,8 ملرد تەڭگە قارجى جىمقىردى دەپ ايىپتالعان 7 ايىپتالۋشىنىڭ جەتەۋى دە كىنالى دەپ تانىلىپ، 7 جىلدان 10 جىلعا دەيىن سوتتالعان.

كەستەدە "استانا لرت" ءىسى بويىنشا سوتتالعاندار ءتىزىمى كورسەتىلگەن.

كونتەنت اقش دامۋ اگەنتتىگى (USAID) ارقىلى امەريكا حالقىنىڭ كومەگىمەن "MediaCAMP – ورتالىق ازيا باعدارلاماسى" اياسىندا دايىندالدى. (ۇجىمنىڭ اتى) اقپاراتتىڭ مازمۇنىنا تىكەلەي جاۋاپتى جəنە اقپارات USAID-تىڭ نەمەسە اقش ۇكىمەتىنىڭ، سونىمەن قاتار Internews ۇستانىمىنا ساي كەلمەۋى مۇمكىن.

"The Qazaq Times"