فوتو: QT

بۇگىن الماتى قالاسىندا ءبىر توپ بەلسەندى "نۇر وتان" پارتياسى عيماراتىنىڭ الدىندا نارازىلىق اكتسياسىن وتكىزدى.

استانا قالاسىندا «نۇر وتان» پارتياسىنىڭ كەزەكتى قۇرىلتايى باستالعان ۋاقىتتا الماتىداعى «نۇر وتان» عيماراتىنىڭ الدىندا ءبىر توپ بەلسەندى ءوز نارازىلىقتارىن ءبىلدىردى. نارازىلىق اكتسياسىنا قاتىسقان بەلسەندىلەردىڭ ءبىرى، كوپ بالالى انا داريعا اباجانوۆا ءوزىنىڭ بۇل شاراعا نە ءۇشىن قاتىسقاندىعىن بىلاي دەپ تۇسىندىرەدى:

«باعانا ءبىزدى يتەرىپ، جۇلقىلاپ ماشيناعا سالىپ الىپ كەتتى. ءبىز بيلىككە وكپەمىزدى ايتقىمىز كەلدى... ماعان ەشنارسەنىڭ كەرەگى جوق. ماعان نازارباەۆتىڭ كەتكەنى جاقسى، بيلىكتىڭ وزگەرگەنى جاقسى»

نارازى توپتىڭ تالاپتارىن تىڭداۋعا شىققان المالى اۋدانىنىڭ اكىمى بەكقالي تورعاەۆتىڭ سوزىنشە، «نۇر وتان» پارتياسى عيماراتىنىڭ الدىنا جينالعان حالىقتىڭ ميتينگ وتكىزۋى زاڭسىز. سەبەبى ولار شاھار باسشىلىعىنان شەرۋ وتكىزۋگە بايلانىستى رۇقسات الماعان.

«مەن وسى جەردە تۇرعاندا رەسمي تۇردە ەسكەرتۋ جاسادىم. ويتكەنى ءبىزدىڭ ءوزىمىزدىڭ قولدانىستاعى زاڭناماعا بايلانىستى، بۇلار وسىنداي شەرۋ، جينالىس نەمەسە دەمونستراتسيا وتكىزۋ ءۇشىن ولار مىندەتتى تۇردە زاڭ بويىنشا ءوتىنىش جازۋى كەرەك... ەگەر قابىلداۋعا كەلسە مەن دايىنمىن. ال سىرتتاعى شارا زاڭسىز بولعاندىقتان مەن ولارعا ەسكەرتۋ جاسادىم. ارى قاراي قۇقىق قورعاۋ ورگاندارىنىڭ ءىسى...» - دەپ مالىمدەدى تورعاەۆ مىرزا جۋرناليستەر ساۋالىنا بەرگەن جاۋابىندا.

ميتينگىگە قاتىسقان بەلسەندى ەرگەش ەسمىرزا ءوزىن ۇقك قىزمەتكەرلەرىنىڭ نۇسقاۋىمەن ۇستاپ الىپ كەتكەندىگىن جانە پوليتسيا بولىمشەسىنەن شىققاننان كەيىن، «نۇر وتان» پارتياسىنا قايتىپ كەلمەك بولعان بىرنەشە ادامدى ءتارتىپ ساقشىلارى ەكىنشى مارتە ۇستاعاندىعىن ايتتى.

"The Qazaq Times"