ەسەنقۇل جاقىپبەكتىڭ سوزىنە جازىلعان اندەر بايقاۋى وتەدى

23 اقپان كۇنى ساعات 11.00-دە قاراساي اۋدانىنىڭ ورتالىعى – قاسكەلەڭنىڭ «مادەنيەت ۇيىندە»  اقىن ەسەنقۇل جاقىپبەكتىڭ ولەڭدەرىنە جازىلعان اندەردەن رەسپۋبليكالىق  انشىلەر كونكۋرسى بولادى. ال اقپاننىڭ 24-ءى كۇنى،  ساعات 15.00-دە بايقاۋ جەڭىمپازدارىن ماراپاتتاۋ سالتاناتى جانە قازاقستاننىڭ ونەر جۇلدىزدارىنىڭ قاتىسۋىمەن گالا-كونتسەرت وتەدى.

اتالمىش شارانىڭ بارىسى تۋرالى ۇيىمداستىرۋشىلاردىڭ ءبىرى، كومپوزيتور  باعلان وماروۆ بىلاي دەيدى:

«الەۋمەتتىك جەلى دەگەن قازىر جاقسى بولدى عوي.   اتالمىش كونكۋرس تۋرالى ونەر ادامدارىنا جىبەرىپ، ينستاگرام مەن فەيسبۋك ارقىلى جارناما جاساتقانمىن. سودان كەيىن دە ءبىراز وتىنىشتەر كەلىپ ءتۇستى. ليريك اقىن – ەسەنقۇل اعانىڭ ولەڭدەرىن قازاق جۇرتشىلىعى جاقسى كورەدى. ماقساتىمىز ونىڭ ولەڭدەرىن، اندەرىن كەڭىنەن ناسيحاتتاۋ. سول سەبەپتى دە وسىنداي بايقاۋ جاريالادىق. قازىرگى كەزدە 60-قا تارتا ادام قاتىسۋعا تىلەك ءبىلدىردى. ءوتىنىش جىبەرگەن قاتىسۋشىلار 23-ءى كۇنى تاڭەرتەڭ 9-دا جينالىپ جەرەبە تاستايدى دا، 11-دە سول رەتتىك ءنومىرى بويىنشا ونەر كورسەتەدى. كونكۋرستا ءاربىر قاتىسۋشى ەكى اننەن ورىندايتىن بولادى. ءبىرى ەسەنقۇل اعانىڭ سوزىنە جازىلعان ءان بولۋى كەرەك. ال ەكىنشىسى ءوز تاڭداۋى، ەگەر ول دا ەسەنقۇلدىڭ ءانى بولىپ جاتسا قۇبا-قۇپ. اقمولا، شىعىس قازاقستان، باتىس قازاقستان، وڭتۇستىك، الماتى، ت.ب. قازاقستاننىڭ تۇكپىر-تۇكپىرىنەن قاتىسۋشىلار كەلەدى. 23-ءى كۇنى ءار قاتىسۋشىنى تىڭدايمىز دا، كەلەسى كۇنى گالا-كونتسەرتتە  جەڭىمپازداردى انىقتاپ، سىيلىقتارىن تابىستايمىز. كونتسەرتكە ونەر جۇلدىزدارى قاتىسادى جانە كونكۋرس بارىسىندا جاقسى شىققان 4-5 قاتىسۋشى ونەر كورسەتەدى».

ايتا كەتەيىك، ەسەنقۇل جاقىپبەكتىڭ سوزىنە جازىلعان اندەر بايقاۋىنىڭ وتكىزىلۋىنە قارجىلاي كومەك كورسەتىپ، سپونسورلىق ەتىپ وتىرعان الماتى وبلىسى، قاراساي اۋدانىنىڭ اكىمى – ماحاببات بيگەلديەۆ.

كونكۋرس قاتىسۋشىلارىنا بەرىلەتىن  قارجىلاي سىيلىق: ءۇشىنشى ورىنعا 100 مىڭ، ەكىنشى ورىنعا 150 مىڭ، ءبىرىنشى ورىنعا 300 مىڭ جانە باس جۇلدەگە 500 مىڭ قارجىلاي سىيلىق بەرىلەدى. ودان بولەك ءاربىر قاتىسۋشىلارعا ەسەنقۇل جاقىپبەكتىڭ تاڭدامالى ولەڭدەر جيناعى بەرىلەدى. ۇيىمداستىرۋشىلاردىڭ ايتۋىنشا، كونكۋرس بارىسىندا اقىننىڭ ولەڭدەرىنە جازىلعان جاقسى جاڭا  اندەر ورىندالىپ جاتسا، ولارعا دا ارنايى سىيلىقتار دايىن.

قازىلار القاسىندا مۇشە بولاتىن: وبلىستىق مادەنيەت دەپارتامەنتىنىڭ باسشىسى اقان ابدۋاليەۆ، جازۋشى جۇماباي شاشتايۇلى،  قاراساي اۋدانىنىڭ مادەنيەت جانە تىلدەردى دامىتۋ باسقارماسىنىڭ باسشىسى ەرمەك جۇماتاەۆ، كومپوزيتور باۋىرجان ەسەباەۆ، ءانشى سايات مەدەۋوۆ، كومپوزيتور باعلان وماروۆ.

ال گالا-كونتسەرتكە بەكجان تۇرىس، سايات مەدەۋوۆ، دوسىمجان تاڭاتاروۆ، باعلان ءابدرايىموۆ، اسەت ەسجان، قانات ۇمبەتوۆ پەن ءاليا ابىكەن، ت.ب. ونەر يەلەرى قاتىسادى.

ەسكە سالا كەتەيىك، وتەتىن ورنى: قاراساي اۋدانى، قاسكەلەڭ «مادەنيەت ءۇيى».

ءان بايقاۋىنىڭ 23 اقپان كۇنى ساعات 11.00-دە، ال گالا-كونتسەرت  24 اقپاندا ساعات 15.00-دە بولادى. كىرۋ تەگىن.

«The Qazaq Times»