اقش كونگرەسى تاق مۇراگەرى مۇحاممەد بين سالمانعا سانكتسيا سالۋى مۇمكىن

ساۋد ارابيا حانزاداسى مۇحاممەد بين سالماننىڭ جۋرناليست جامال حاشوگگي ولىمىنە قاتىسى بارى انىقتالعان جاعدايدا، امەريكانىڭ ءبىر توپ سەناتورلارى تاق مۇراگەرىنە قارسى سانكتسيا سالۋى مۇمكىن.  سوڭعى شەشىم تسرۋ-دىڭ زەرتتەۋ قورىتىندىسىنان كەيىن شىعاتىن بولادى.

سەناتور-رەسپۋبليكاشى ليندسي گرەم بۇل وقيعانىڭ نازاردان تىس قالمايتىندىعىن، سونىمەن قاتار ءادىل جازا بەرۋىن تالاپ ەتەتىندىگىن ناقتى مالىمدەدى. ال، بۇدان ءسال ەرتەرەكتە اقش-تىڭ حالىقارالىق ىستەر كوميتەتىنىڭ باسشىسى بوب كوركەر الداعى اپتا ساۋد ارابياسىنا قاتىستى زاڭ ورىندارى ءۇشىن وتە ماڭىزدى بولاتىندىعىن ايتقان ەدى.

ىستامبۋل قالاسىنداعى ساۋد ارابياسىنىڭ باس كونۋسۋلدىعىندا قازا تاپقان ساۋديالىق جۋرناليست جامال حاشوگگي Washington Post باسىلىمىندا بەلسەندى تۇردە قىزمەت اتقارعان.

تۇركيا باس پروكۋراتۋراسىنىڭ مالىمەتى بويىنشا، اتالعان قىلمىس الدىن الا جوسپارلانعان.  سونداي-اق حاشوگگيدى عيماراتقا كىرگەن ۋاقىتتا بىردەن بۋىندىرىپ ءولتىردى دەگەن بولجامعا كەلىپ وتىر. بۇدان كەيىن ونىڭ دەنەسىن بولشەكتەپ، قۇدىققا تاستاعاندىعى دا انىقتالدى. الايدا، دەنەسى تولىقتاي تابىلعان جوق. وسىعان بايلانىستى ساۋد ارابياسىنىڭ 18 وكىلى تۇتقىندالعان. بۇدان بولەك، مۇحاممەد بين سالماننىڭ قاتىسى بار ەكەندىگى دە كۇن وتكەن سايىن شىندىققا جاناسۋدا.

ەستەرىڭىزگە سالا كەتەيىك، حاشوگگي ولىمىنەن كەيىن تاق مۇراگەرى العاش رەت شەت ەلدىك تۋرنە ۇيىمداستىرعان بولاتىن. وندا اراب امىرلىگىنە قاراستى ەلدەرگە بارۋدى جوسپارلاعان ەدى. قازىرگى تاڭدا تۋنيس ەلىنىڭ ءبىر توپ تۇرعىنى ونىڭ ەلگە كەلۋىنە قارسى نارازىلىق اكتسياسىنا شىقتى. بۇدان بولەك، الجير مەملەكەتى دە سالماننىڭ اتالعان ەلگە ات باسىن بۇرۋىنا قارسىلىق بىلدىرۋدە.