قالىڭ قازاق كۇڭىرەنە وتىرىپ، شەراعاڭدى اقتىق ساپارعا شىعارىپ سالدى

بۇگىن، 11 قازان كۇنى الماتى قالاسىنداعى م. اۋەزوۆ تەاترىندا الاشتىڭ ارداقتى ۇلى، قازاقتىڭ ءبىرتۋار پەرزەنتتەرىنىڭ ءبىرى، قازاقستاننىڭ حالىق جازۋشىسى، مەملەكەتتىك سىيلىقتىڭ يەگەرى، قوعام قايراتكەرى شەرحان مۇرتازانى اقتىق ساپارعا شىعارىپ سالۋ ازالى جيىنى ءوتتى.

اكىم-قارالار ارقۇمنىڭ وتباسىنا، تۋعان تۋىسىنا كوڭىل ايتتى.

قوشتاسۋ ءراسىمىن قازاقستان جازۋشىلار وداعىنىڭ توراعاسى ۇلىقبەك ەسداۋلەتوۆ باستاپ اشىپ، العاشقى قوشتاسۋ ءسوزىن قر مادەنيەت ءمينيسترى ارىستانبەك مۇحامەديۇلىنا بەردى. ازالى جۇرتقا كوڭىل ايتقان مۇحامەديۇلى پرەزيدەنتتىڭ كوڭىل ايتۋ جەدەل حاتىن وقىدى.

پرەزيدەنتتىڭ كوڭىل ايتۋ جەدەل حاتى وقىلدى.

حاتتا: «حالقىمىزدىڭ سۇيىكتى پەرزەنتى شەرحان مۇرتازا بۇكىل عۇمىرىن ەلىمىزدىڭ وركەندەۋىنە، ءتول مادەنيەتىمىز بەن ادەبيەتىمىزدىڭ دامۋىنا ارناعان ءبىرتۋار ازامات ەدى. ۇلت رۋحانياتىندا وزىندىك قولتاڭباسى بار زاڭعار جازۋشى سوڭىنا مول مۇرا، وشپەستەي ەڭبەگىن قالدىردى. ول قازاقتىڭ مۇڭىن مۇڭداپ، جوعىن جوقتاعان نار تۇلعالى قالامگەر، دارىندى قوعام قايراتكەرى بولدى. شەرحان مۇرتازا قازاق جۋرناليستەرىنىڭ بىرنەشە بۋىنىن تاربيەلەگەن، ۇلتتىق ءباسپاسوزدىڭ بيىك بايتەرەگى ەدى....  بىز مەملەكەتتىڭ ىرگەسىن قالاعان جىلداردا دا جانىمدا ءجۇرىپ، ەلدىكتىڭ كوپتەگەن ىسىنە زور ۇلەس قوستى. شەرحان مۇرتازانىڭ قازاق رۋحانياتىنداعى ورنى مەن جارقىن بەينەسى ەشقاشان ۇمىتىلمايدى دەپ سەنەمىن. مارقۇمنىڭ توپىراعى تورقا، يمانى سالامات بولسىن»، – دەلىنگەن.

قوشتاسۋ سوزدەرىن سويلەدى.

ازالى جيىندا الماتى قالاسىنىڭ اكىمى باۋىرجان بايبەك، جامبىل وبلىسىنىڭ اكىمى اسقار مىرزاحمەت، قر ەنەرگەتيكا ءمينيسترى قانات بوزىمباەۆ، پارلامەنت ءماجىلىسىنىڭ دەپۋتاتى ساۋىتبەك ءابدىراحمانۇلى، اقىن، مەملەكەتتىك سىيلىقتىڭ يەگەرى ن. ورازالين جانە مارقۇمنىڭ تۋىستارى اتىنان اكادەميك ورازالى سابدەن قاتارلىلار قوشتاسۋ ءسوزىن سويلەپ، قايعىلى جۇرتقا كوڭىل ايتتى.

شەرحان مۇرتازانىڭ قالامداس اعاسى ءابدىجامىل نۇرپەيىسوۆ دوس ءىنىنىڭ قازاسىنا قايعىرىپ، ۇزاق تۇردى. فوتو: QT.

قازاعا قايعىرعان مارقۇمنىڭ بالالارىنا، تۋعان-تۋىسىنا ەل جۇرتىنا قر پرەمەر-ءمينيسترى باقىتجان ساعىنتاەۆتان، سەنات توراعاسى قاسىمجومارت توقاەۆتان، پارلامەنت ءماجىلىسىنىڭ توراعاسى نۇرلان نىعىماتۋليننەن، مەملەكەتتىك حاتشى گۇلشارا ناۋشاقىزىنان، نۇر وتان پارتياسىنىڭ توراعاسىنىڭ ءبىرىنشى ورىنباسارى ماۋلەن اشىمباەۆتان، قازاقستاننىڭ رەسەيدەگى توتەنشە جانە وكىلەتتى ەلشىسى يمانعالي تاسماعامبەتوۆتەن، سونداي-اق، سوناۋ تۇرىك ەلىنەن ەۋرازيا جازۋشىلار وداعىنان، «تۇرىكسوي» ۇيىمىنان، وسىمان تۇرىك اكادەمياسىنان باسقا دا كوپتەگەن ەلدەرمەن قوعامدىق ۇيىمداردان كوڭىل ايتۋ حاتتارى كەلىپ جەتكەن.

قايعىلى جۇرت ازا ءبىلدىردى.

«نامىستىڭ نايزاعايى»، شىندىقتىڭ شىراقشىسى اتالعان نار تۇلعا شەرحان مۇرتازامەن قوشتاسۋعا كەلگەن الەۋمەت تەاتر زالىن تولتىرىپ، كۇڭىرەنگەن جۇرت ۇلتتىڭ ۇلاعاتتى تۇلعاسىن اقتىق ساپارعا شىعارىپ سالدى.

مارقۇمنىڭ ۇلى دەنەسىمەن قوشتاسۋ.

مارقۇمنىڭ سۇيەگى الاتاۋ باۋىرىنا جەرلەندى.

الاتاۋ ۇلى پەرزەنتىن باۋرىنا تارتتى.

ورىنى تولماس قازاعا رەداكتسيامىز اتىنان بارشا قازاققا قايعىرا وتىرىپ كوڭىل ايتامىز! بەيىشتە نۇرىڭ شالقىسىن، توپىراعىڭ تورقا بولسىن، شەراعا!

“The Qazaq Times”