فوتو: qazmedia.kz

ەرتەڭ، اقپاننىڭ 12-ءسى كۇنى «تۇمار» اتتى ءبىرىنشى ۇلتتىق تەلەۆيزيالىق بەيگەسىنە قاتىسۋعا وتىنىشتەردى قابىلداۋ ناۋقانى باستالادى. بۇل تۋرالى قازاقپارات حابارلادى.

شارانىڭ باستى ماقساتى – ەڭ ساپالى ءارى وزەكتى تەلەۆيزيالىق ءونىمدى انىقتاۋ، تەلەوندىرىستەگى تالانتتى كاسىبي مامانداردى قولداۋ، وتاندىق تەلەۆيزيالىق ءوندىرىستىڭ ءيميدجىن قالىپتاستىرۋ جانە قازاقستاندىق ساپالى تەلەۆيدەنيەنى دامىتۋ. بايگەگە وتكەن جىلى ەفيرگە شىققان تەلەۆيزيالىق جوبالار قاتىسادى. وسىعان بايلانىستى ۇلتتىق جانە ايماقتىق تەلەكومپانيالار، ستۋديالار، پروديۋسەرلىك ورتالىقتار جانە باسقا دە مەديا ءوندىرىس ۇيىمدارى ۇمىتكەر رەتىندە قاتىسۋ ءۇشىن اقپاننىڭ 24-ىنە دەيىن ءوز وتىنىشتەرىن جولداۋى ءتيىس.

«تۇمار» بايگەسى تومەندەگى اتالىمدار بويىنشا ىرىكتەلگەن ۇمىتكەرلەر اراسىندا ساراپقا سالىنادى:

  1. ۇزدىك دەرەكتى كينو;
  2. ۇزدىك الەۋمەتتىك جوبا;
  3. ۇزدىك اقپاراتتىق باعدارلاما;
  4. ۇزدىك اقپاراتتىق-ساراپتامالىۇ باعدارلاما;
  5. ۇزدىك مۋزىكالىق باعدارلاما;
  6. ۇزدىك توك-شوۋ;
  7. ۇزدىك تەلەۆيزيالىق سەريال;
  8. ۇزدىك ءازىل-سىقاق باعدارلاماسى;
  9. تەلەۆيزيالىق ماۋسىمنىڭ ۇزدىك جوباسى;
  10. تەلەۆيزيانىڭ دامۋىنا ۇلەس قوسقانى ءۇشىن;
  11. ۇزدىك ايماقتىق اقپاراتتىق باعدارلاما;
  12. ۇزدىك ايماقتىق الەۋمەتتىك باعدارلاما.

بايگەنى ۇيىمداستىرۋشى  – «قازمەديا ورتالىعى». شارا قازاقستان رەسپۋبليكاسىنىڭ اقپارات جانە كوممۋنيكاتسيالار مينيسترلىگىنىڭ قولداۋىمەن وتكەلى وتىر. قازىلار القاسى جولدانعان ماتەريالداردى ساراپتاپ، قاراپ شىعىپ، جاسىرىن داۋىس بەرۋ ارقىلى لاۋرەاتتاردى انىقتايدى. قازىلار القاسى قازاقستاندىق تەلەۆيزيانىڭ ەڭ كاسىبي ماماندارىنان جاساقتالادى.

قوسىمشا اقپارات رەسمي سايتتا: www.tumar.kz ; بايلانىس ءنومىرى +7 (7172) 55-36-36; ەلەكتروندىق مەكەن-جاي info@tumar.kz

«The Qazaq Times»