ەلوردا تورىندە «اسقاقتاي بەر، استانا!» تۇركىستان وبلىسى ونەرپازدارىنىڭ گالا-كونتسەرتى ءوتتى. ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى مەن استانا قالاسىنىڭ 20 جىلدىعىنا وراي «ءان مەن كۇي الديلەيدى استانانى» اتتى تۇركىستان وبلىسىنىڭ استاناداعى مادەني كۇندەرى اياسىندا ۇيىمداستىرىلىپ وتىر دەپ حابارلايدى وبلىس اكىمىنىڭ ءباسپاسوز قىزمەتى.

تۇران ەلى ونەرپازدارىنىڭ ونەرىن تاماشالاۋعا  قر پارلامەنتى ءماجىلىسىنىڭ دەپۋتاتتارى مەن زيالى قاۋىم وكىلدەرى جانە رەسپۋبليكالىق بۇقارالىق اقپارات قۇرالدارى قاتىستى.

تۇركىستان وبلىسىنىڭ  حالقىن ەلىمىزدىڭ ەلورداسى – استانا قالاسىنىڭ 20 جىلدىق مەرەيتويىن سەزىندىرۋ ماقساتىندا «ەل جۇرەگى - استانا» تاقىرىبىندا كورمەلىك كەشەننىڭ اشىلۋىمەن باستالىپ، بۇگىنگى تاڭعا دەيىن 760 ءىس-شارا وتكىزىلگەن بولاتىن.

ەلوردا قۇرمەتىنە وراي وبلىستىڭ ەلدى مەكەندەرىندە  26 كوشەگە «استانا» اتاۋى بەرىلدى.  «ەلورداعا سىيلىق» جوباسى بويىنشا تۇركىستان وبلىسى تاراپىنان استانا قالاسىنا تارتۋ رەتىندە ەسىل وزەنى بويىندا ورتالىق ساياباق پەن مينيسترلىكتەر ءۇيى ارالىعىنا دەيىن 5,173 شاقىرىم ۆەلوجول سالىنۋدا.

كونتسەرت «شارىقتاي بەر، استانا» تەاترلاندىرىلعان-حورەوگرافيالىق كومپوزيتسياسىنان باستاۋ الىپ، ءداستۇرلى اندەر شەرۋى، قازاق جانە كلاسسيكالىق، ش.قالداياقوۆ  اندەرىنەن پوپۋرري، «دالا رۋحى» كومپوزيتسياسىمەن جالعاسىن تاپتى.

كونتسەرتكە وبلىستان شىققان ەسترادا جۇلدىزى، قر ەڭبەك سىڭىرگەن قايراتكەرى التىناي جوراباەۆا جانە قر حالىق ءارتىسى نۇرجامال ۇسەنباەۆا، قر مادەنيەت قايراتكەرلەرى ءۇرالحان سەيىلبەكوۆا، مارات ورازمەتوۆ پەن قر ەڭبەك سىڭىرگەن ءارتىسى ءسابيراش ءابدىرايىموۆا جانە حالىقارالىق بايقاۋلاردىڭ لاۋرەاتتارى كارينا ناجمەددينوۆا،  ءمولدىر يساەۆا، جادىرا ابدۋللاەۆا، نۇرقانات تاپيەۆ، ايان تولەگەن، نەماتيللو زكرۋللاەۆ، بەكزات تۇرعىنبەك، اقمارال بينازاروۆا سىندى ساحنا ساڭلاقتارىمەن قاتار «تۇمار» فولكلورلىق ءانسامبلى جانە «قازىنا»، «شامسينۋر»، «فاراب» بي توپتارى قاتىستى.

“The Qazaq Times”