ۋنيۆەرسيادا-2017: الماتى گارنيزونى مىندەتىن ويداعىداي اتقاردى

28-ءشى قىسقى ۋنيۆەرسيادا-2017-ءنى وتكىزۋ اياسىندا قۇرىلعان شتابقا قازاقستان رەسپۋبليكاسى ىشكى ىستەر ءمينيسترىنىڭ ورىنباسارى پوليتسيا گەنەرال-مايورى ەرلان تۇرعۇمباەۆ جەتەكشىلىك ەتتى.  شتابتىڭ قورىتىندى وتىرىسىندا سپورتتىق ءىس-شارانىڭ قاۋىپسىزدىگىن قامتاماسىز ەتۋ مەن قۇقىق ءتارتىبىن ساقتاۋ مىندەتتەرىنە كىرگەن ۆەدومستۆولاردىڭ جۇمىس ناتيجەلەرى ايتىلدى دەپ حابارلايدى الماتى قالاسىنىڭ ءىىد ءباسپاسوز-قىزمەتىنەن گۇلنار جامانقۇلوۆا.

«اعىمداعى جىلدىڭ 28 قاڭتارى مەن 9 اقپانى ارالىعىندا ۋنيۆەرسيادا-2017 وتكىزۋ اياسىندا دەر كەزىندە قىلمىستىڭ الدىن الۋ مەن جولىن كەسۋ ءۇشىن الماتى گارنيزونىنىڭ جەكە قۇرامى ء(ىىد، تجد، الماتى قالاسى مەن الماتى وبلىسىنىڭ قاجد، سونداي-اق ۇلتتىق ۇلاننىڭ ايماقتىق قولباسشىلىعى) كۇشەيتىلگەن قىزمەت تارتىبىنە كوشىرىلدى. سپورتشىلار ورنالاسقان جانە سپورت شارالارى وتكىزىلەتىن جەرلەردە قوعامدىق ءتارتىپتى ساقتاۋعا 7 مىڭ 800 پوليتسيا قىزمەتكەرلەرى جانە ۇلتتىق ۇلان مەن قورعانىس مينيسترلىگىنىڭ اسكەري قىزمەتكەرلەرى جۇمىلدىرىلدى. ولاردىڭ 2 مىڭنان استامى قالا كوشەلەرى مەن قوعامدىق ورىنداردا كەزەكشىلىك ەتتى. سونداي-اق، وسى جۇمىسقا الماتى ءىىم اكادەمياسىنىڭ 500-گە جۋىق تىڭداۋشىلارى جانە 2 مىڭ 123 جەكە كۇزەت ۇيىمدارىنىڭ قىزمەتكەرلەرى دە تارتىلدى. الماتى قالاسى مەن الماتى وبلىسىنىڭ ىشكى ىستەر دەپارتامەنتتەرىنىڭ جەدەل-تەرگەۋ توپتارى دا كۇشەيتىلگەن تارتىپتە جۇمىس ىستەدى»،- دەدى ءمينيستردىڭ ورىنباسارى.

قابىلدانعان شارالار ناتيجەسىندە قاڭتار ايىندا قىلمىستىق قۇقىقبۇزۋشىلىقتاردىڭ جالپى سانى 13,3%-عا، قوعامدىق ورىنداردا جاسالعانى – 7,5%-عا، كوشەدەگى ءتارتىپ بۇزۋ – 33,5%-عا، ونىڭ ىشىندە اۋىر جانە اسا اۋىر قىلمىستار 48%-عا ازايعانى بايقالادى. توناۋ – 5,6%-عا، بۇزاقىلىق – 14,3%-عا تومەندەگەن. تۇتاستاي العاندا، قالاداعى جەدەل جاعداي تۇراقتى. قىلمىس ءۇردىسى 10,8%-عا ازايعان.

ۋنيۆەرسيادا نىساندارىندا وتكىزىلگەن ءىس-شارالار كەزىندە 1 قىلمىستىق، 13 اكىمشىلىك قۇقىقبۇزۋشىلىقتار، سونداي-اق جەكە مۇلىكتىڭ جوعالۋىنىڭ 11 دەرەگى تىركەلدى. سونىمەن قاتار، 11 ادام جارىس بيلەتتەرىن الىپ-ساتۋمەن اينالىسقانى ءۇشىن ۇستالدى، بەلگىلەنبەگەن جەردە ساۋدا جاساعانى ءۇشىن 2 ادام اكىمشىلىك جاۋاپكەرشىلىككە تارتىلدى، سونداي-اق سپورت نىساندارىندا ورنالاسقان دۇكەننەن كۇرتە ۇرلاۋدىڭ 1 دەرەگى تىركەلدى. كۇدىكتى بىردەن انىقتالىپ، «ءىزى سۋىماي» قولعا ءتۇستى. ۋنيۆەرسيادا نىساندارىندا ءتيىستى ءتارتىپتى قامتاماسىز ەتۋ مەن بيلەتتەردى الىپ-ساتۋ ارەكەتتەرى ورىن الماس ءۇشىن ءىىد قىزمەتكەرلەرى اراسىنان قوسىمشا توپتار قۇرىلدى. ناتيجەسىندە الىپساتارلاردان 500-دەن استام بيلەت تاركىلەندى.

جول قاۋىپسىزدىگىن قامتاماسىز ەتۋ ماقساتىندا قالا جولدارىنداعى جاعدايدى تۇراقتاندىرۋعا بايلانىستى شارالار قابىلداندى. الماتى قالاسىندا جول قاۋىپسىزدىگىن بۇزعاندارعا جەدەل شارالار قولدانۋ ءۇشىن 10 ستاتسيونارلىق بەكەتتەر قويىلدى. وسىنداي بەكەتتەر الماتى قالاسىنا كىرەبەرىستەگى الماتى وبلىسىنىڭ ايماقتارىنا دا قويىلدى. قابىلدانعان شارالار ناتيجەسىندە 59 مىڭنان استام جول قوزعالىسى ەرەجەسىن بۇزۋشىلىق انىقتالدى، ونىڭ ىشىندە كولىك قۇرالىن ماس كۇيىندە باسقارعانى ءۇشىن 162 جۇرگىزۋشى اكىمشىلىك جاۋاپكەرشىلىككە تارتىلدى. ناتيجەسىندە زارداپ شەگۋشىلەرى بار جول-كولىك وقيعالارىنىڭ سانى 10,4%-عا، كىسى ولىمىمەن اياقتالعانى 44,4%-عا، ونىڭ ىشىندە بالالردىڭ قاتىسۋىمەن بولعان، بۇل رەتتە بىردە-ءبىر بالا قازا بولعان جوق،  جول-كولىك وقيعالارى 17,4%-عا ازايدى.

رەسپۋبليكالىق ۆەدومستۆوارالىق جەدەل شتاب جۇمىسىن قورىتىندىلاعان ەرلان تۇرعۇمباەۆ: «بۇگىنگى تاڭدا بارلىق سايىستار اياقتالدى. قازىر ۋنيۆەرسيادا قاتىسۋشىلارى قايتىپ جاتىر. الماتىنىڭ حالىقارالىق اۋەجايى مەن تەمىرجول ۆوكزالىنان كەتىپ جاتقان شەتەلدىك ازاماتتاردى تىركەۋ جۇيەسى ۇزدىكسىز جۇمىس ىستەپ تۇر. جالپى، ستۋدەنتتىك ويىندار كەزىندەگى قاۋىپسىزدىكپەن قامتاماسىز ەتۋ تۋرالى ىشكى ىستەر مينيسترلىگى جانە ارنايى قىزمەت، وزگە دە قۇقىق قورعاۋ ورگاندارى تاراپىنان ۇسىنىلعان تۇجىرىمداما ءتيىمدى جۇزەگە اسىرىلدى. سونداي-اق باق ارقىلى جاريالانعان جول قوزعالىسىنا ەنگىزىلگەن تۇزەتۋلەر تۋرالى رەسمي حابارلامار مەن وتكىزىلگەن شارالارعا تۇسىنىستىكپەن قاراعان جۇرتشىلىق تا ءوز ۇلەسىن قوستى. ايتا كەتەيىك، بۇل كۇندەرى رەسپۋبليكالىق جانە ايماقتىق دەڭگەيدەگى بۇقارالىق اقپارات قۇرالدارىندا اۋقىمدى حالىقارالىق وقيعالار وتكىزۋ كەزىندەگى قاۋىپسىزدىك شارالارى تۋرالى 176 اقپارات جارىق كوردى»،- دەدى

«The Qazaq Times»