ءسۇريا پرەزيدەنتى باشار اساد.

فرانتسيا سىرتقى ىستەر ءمينيسترى جان-يۆ لە دريان: «سۇرياداعى سوعىستا باشار اساد جەڭىسكە جەتتى» – دەپ مالىمدەدى.

جەرگىلىكتى باق وكىلدەرىنىڭ حابارلاۋىنشا، فرانتسيا ءسىم سۇرياداعى سوعىس جاعدايىنا قاتىستى: «سۇرياداعى ازامات سوعىسىندا باشار اساد جەڭىسكە جەتتى. ءبىز بۇنى مويىنداۋىمىز كەرەك. بىراق ول سوعىستا جەڭىسكە جەتكەنىمەن بەيبىتشىلىك ورناتۋدا ءالى جەڭىسكە جەتكەن جوق. بەيبىتشىلىك ورناتۋدا وعان حالىقارالىق قاۋىمداستىقتىڭ كومەگى قاجەت» - دەپ مالىمدەگەن.

ەستەرىڭىزگە سالايىق، بۇعان دەيىن فرانتسيا پرەزيدەنتى ەممانۋەل ماكرون: «باشار اساد بيلىگى بەيبىت تۇرعىندارعا قارسى حيميالىق قارۋ قولداناتىن بولسا، فرانتسيا ارمياسى سۇرياعا سوققى جاساۋعا دايىن» - دەگەن بولاتىن.

جالپى، قازىرگى تاڭدا ءسۇريا اۋماعىندا يدليب پروۆينتسياسى عانا زاڭسىز اسكەري قۇرىلىمداردىڭ باسقارۋىندا. قالعان ايماقتاردىڭ بارلىعى ازات ەتىلگەن.

"The Qazaq Times"