ەۆرەي ءمينيسترى: يزرايل ءۇشىن ەڭ ۇلكەن قاۋىپ – يراننىڭ يادرولىق قارۋعا يە بولۋى

يراننىڭ يادرولىق قارۋعا يە بولۋى يزرايل ءۇشىن ەڭ ۇلكەن قاۋىپ بولادى. بۇنداي مالىمدەمەنى يزرايل قورعانىس ءمينيسترى بەنني گانتس جاسادى.  

گانتس مالىمدەمەسىندە ءيزرايلدىڭ ۇلتتىق قاۋىپسىزدىگىنە قاتىستى كەز بولىپ وتىرعان بىرقاتار ماسەلەلەردى ايتا كەلىپ، سونىڭ ىشىندە يراننىڭ يادرولىق قارۋعا يە بولۋى يزرايل ءۇشىن ەڭ ۇلكەن قاتەر ەكەنىن ايتقان.

تەل-اۆيۆ ماڭىنداعى دايان اسكەري بازاسىنداعى شارادا ەلدىڭ قورعانىس ءمينيسترى ورتا-شىعىستىڭ تۇبەگەيلى وزگەرىسكە ۇشىراعانىن ايتا كەلىپ، وسى وزگەرىستەردە يراننىڭ ۇلكەن ىقپال جاساعانىن العا تارتقان.

گانتستىڭ ايتۋىنشا ليۆاننىڭ ىدىراۋى مەن ءسۇريا جاعدايىندا يراننىڭ بەلسەندى ىقپالى بار. «الدىمىزدا تۇرعان ەڭ نەگىزگى قاۋىپ – يراننىڭ يادرولىق قارۋعا يە بولۋى»، – دەگەن ەۆرەي ءمينيسترى وعان قارسى جالعىز امالدىڭ كۇش-قۋاتتى ارتتىرۋ دەپ كورسەتكەن.

“The Qazaq Times”