تيبەت پەن شىنجاڭ جەرىندەگى قىتاي ساياساتى ەندى ىشكى موڭعول اۆتونومياسىندا قايتالانۋى مۇمكىن

قىتاي ۇكىمەتى مەن قكپ-نىڭ جوعارى لاۋازىمدى وكىلى ىشكى موڭعول اۆتونوميالى رەگيونىنا جاساعان ساپارى كەزىندە، شەكارا وڭىرلەرىنىڭ تۇتاستىعى، ۇلتتار ىنتىماعى، قوعام ورنىقتىلىعى تاقىرىپتارىندا بايانداما جاساپ،  شي ءجينپيڭنىڭ «جاڭا داۋىردەگى قىتايلىق ۇلگىدەگى سوتسياليزم» يدەياسىن ناسيحاتتاعان. بۇل تۋرالى «شينحۋا» اقپاراتتىق اگەنتتىگى حابارلادى.

قكپ ورتالىق كوميتەتى، ورتالىق ساياسي جانە قۇقىقتىق كوميتەتتىڭ حاتشىسى گو شىڭكۋن(Guo shengkun)  بۇدان ءبىر اپتا بۇرىن ىشكى موڭعول اۆتونوميالى رەگيونىنا ءىس-ساپارمەن بارعان. ول ساپارى كەزىندە «شەكارا ءوڭىردىڭ تۇتاستىعى مەن ورنىقتىلىعىنا كەپىلدىك ەتۋ جانە ۇلتتار ىنتىماعىن ساقتاۋ» ماسەلەلەرىن كوبىرەك ءسوز ەتكەن.

گو شىڭكۋن ىشكى مونگول اۆتونومياسىنىڭ ۋلاانحوت قالاسىنا قاۋىپسىزدىك كۇشتەرىمەن كەزدەسۋ وتكىزگەن. ول سوزىندە: «ءبىز ورنىقتىلىققا قاۋىپ توندىرەتىن ارەكەتتەردى تۇبىرىنە دەيىن جويعاندا عانا قىتاي كوممۋنيستىك پارتياسىنىڭ ماقساتتارىن ورىنداي الامىز»، – دەپ اتاپ وتكەن.

قىتاي ۇكىمەتى مەن جەتەكشى پارتيانىڭ لاۋازىمدى تۇلعاسى اۆتونوميالى ايماقتاعى بۇل ساپارى مەن ونداعى سوزدەرىنەن تيبەت پەن شىنجاڭ جەرىندە جۇرگىزىلگەن ساياساتتىڭ الداعى ۋاقىتتا ىشكى موڭعول اۆتونومياسىندا جالعاسۋى مۇمكىن ەكەنىن اڭعارۋعا بولادى. ەستەرىڭىزدە بولسا، وسىدان بۇرىن قىتاي ورتالىق قالاسىنداعى اقش ەلشىلىگى ماڭىندا جارىلىس بولعان ەدى. رەسمي اقپارات كوزدەرىنىڭ حابارىندا، جارىلىس جاساۋشى 26 جاستاعى ىشكى موڭعول اۆتونومياسىنىڭ ازاماتى دەپ كورسەتكەن بولاتىن.

“The Qazaq Times”