الماتى جۇرتشىلىعى دەنيس تەندى اقتىق ساپارعا شىعارىپ سالدى.

بۇگىن الماتى حالقى بالۋان شولاق اتىنداعى سپورت سارايىندا دەنيس تەندى اقتىق ساپارعا شىعارىپ سالدى. قوشتاسۋ راسىمىنە قاراپايىم حالىقپەن قاتار تانىمال سپورتشىلار، مادەنيەت جانە قوعام قايراتكەرلەرى، دەپۋتاتتار مەن شەنەۋنىكتەر قاتىستى.

فوتو: QT

مانەرلەپ سىرعاناۋدان قازاقستاننىڭ بىرنەشە دۇركىن چەمپيونى، سوچي وليمپياداسىنىڭ قولا جۇلدەگەرى، ازيا ويىندارىنىڭ جەڭىمپازى، الەم چەمپيوناتىنىڭ جۇلدەگەرى دەنيس تەن شىلدە ايىنىڭ 19-ى كۇنى پىشاق جاراقاتىنان الماتى قالاسىنىڭ №12 كلينيكالىق اۋرۋحاناسىندا كوز جۇمعان.

فوتو: QT

الماتى پروكۋراتۋراسىنىڭ مالىمەتىنشە، 19 شىلدە كۇنى تۇسكى ساعات 15-00 شاماسىندا دەنيس تەن قۇرمانعازى مەن بايسەيىتوۆ كوشەلەرىنىڭ قيىلىسىندا كولىگىنىڭ ايناسىن ۇرلاپ جاتقان ەكى ادامنىڭ ۇستىنەن تۇسكەن. تەكەتىرەس بارىسىندا قاسكويلەر دەنيس تەندى پىشاقتاپ، وقيعا ورنىنان ىزدەرىن سۋىتقان. كەيىننەن كوشەدە ورناتىلعان بەينە باقىتاۋ كامەراسىنىڭ كومەگىمەن قۇقىق قورعاۋ ورگاندارىنىڭ قىزمەتكەرلەرى دەنيس تەننىڭ ولىمىنە قاتىسى بار دەگەن كۇدىكپەن 1994 جىلعى جامبىل وبلىسىنىڭ تۋماسى قياسوۆ نۇرالى داۋلەتبەكۇلى مەن قىزىلوردا وبلىسىندا دۇنيەگە كەلگەن قۇدايبەرگەنوۆ ارمان ءبورىبايۇلىن ۇستالعان. قازىرگى تاڭدا كۇدىكتىلەر الماتى قالالىق ۋاقىتشا تەرگەۋ يزولياتورىندا قاماۋدا وتىر.

"The Qazaq Times"