تۇركيا سوتى وپپوزيتسيالىق باسىلىم جۋرناليستەرىن قاماۋ جازاسىنا كەستى

بىرەر كۇن بۇرىن تۇركيا سوتى «جۋمحۋريەت» (رەسپۋبليكا) اتتى وپپوزيتسيالىق باسىلىمىنىڭ 13 ءجۋرناليسىن تەررورلىق ۇيىمعا قولداۋ كورسەتتى دەگەن ايىپپەن قاماۋ جازاسىنا كەسكەن ەدى. دەگەنمەن، سوت ءىستى شەشكەنشە بىرقاتار جۋرناليستەر بوستاندىقتا بولادى. سوت ۇكىمىندە اتالعان باسىلىمنىڭ قىزمەتكەرلەرىنە، «كۇردىستان جۇمىسشىلار پارتياسىنا» جانە 2016 جىلعى اسكەري توڭكەرىسكە قاتىسى بار دەلىنگەن، فەتحۋللاح گۇلەننىڭ «رەۆوليۋتسيالىق ەلدىك بوستاندىق مايدانى پارتياسىنا» قولداۋ كورسەتكەن دەلىنگەن.

«جۋمحۋريەت» تاۋەلسىز باسىلىمىنىڭ نەگىزى 1924 جىلى قالانعان. ول قازىرگى كەزەڭدە پرەزيدەنتى رەجەپ تايىپ ەردوعانعا قارسى وپپوزيتسيالىق باعىتتى ۇستانىپ، ونىڭ ساياساتىن سىنعا الاتىن ماقالالاردى جاريالاپ كەلگەن. سوت ۇكىمىندە اتالعان باسىلىمنىڭ جۇرتقا تانىمال اۆتورلارى دا بار. سونىڭ ءبىرى جۋرناليستىك زەرتتەۋ جۇمىستارى جيناقتالعان «يمامنىڭ ارمياسى» اتتى كىتابى ارقىلى، گۇلەن جاقتاستارىنىڭ تۇركيا بيلىگىندەگى ىقپالىن اشىپ كورسەتكەن احمەت شيت. وعان سوت تارابى 7 جىل 6 اي قاماۋ جازاسىن كەسكەن.

ال باس رەداكتورى مۇرات سابىنچى 7 جارىم جىلعا، بۋحگالتەرى ەمرە يپەردى تەرروريزمدى ناسيحاتتاعان دەگەن ايىپپەن 3 جىلعا، باسىلىمدا جاريالانعان كاريكاتۋرالارىمەن تانىمال بولعان مۇسا قارت 3 جىل 9 ايعا،  باسىلىمنىڭ اتقارۋشى ديرەكتورى اكينا اتالايدى 7 جىل قاماۋ جازاسىنا كەسكەن. اتالايدىڭ قاماۋعا الىنعانىنا ءبىر جارىم جىل بولعان. بۇدان وزگە جۋرناليستەر سوتتىڭ سوڭعى ۇكىمىنە دەيىن بوستاندىقتا بولماق.

اتالايدىڭ جۋرناليستەرگە بەرگەن مالىمەتىنىڭ بىرىندە، بيلىك تاراپتارى «ارىپتەستەرىن بارىمتاعا الىپ»، باسىلىمدى ساتۋعا ماجبۇرلەپ وتىرعانىن ايتقان. ول سوزىندە: «بۇل باسىلىمدى اقشاعا ساتىپ الۋعا بولمايدى. ءبىزدىڭ ارىپتەستەر جۋرناليستيكامەن جاعالاۋسۋدىڭ قانداي بولاتىنىن كورسەتەتىن بولادى»، – دەدى.

قازىرگى تاڭدا «جۋمحۋريەت» باسىلىمى تۇركياداعى وپپوزيتسيالىق باعىتتاعى ساناۋلى باسىلىمداردىڭ ءبىرى. تۇركيا ۇكىمەتىنە ءسوز بوستاندىعىنا قىسىم تۇسىرۋدە دەگەن ايىپتار وسىعان دەيىن دە ايتىلىپ كەلگەن. ناۋرىز ايىندا عانا گۇلەنمەن قاتىسى بار دەلىنگەن 25 جۋرناليستكە سوت ۇكىمى شىققان بولاتىن. بۇل ءىستى جۋرناليستەردىڭ قۇقىعىن قورعاۋشى حالىقارالىق كوميتەت قاتاڭ ايىپتاعان بولاتىن. اتالعان كوميتەت مالىمدەمەسىندە: «تۇرىك بيلىگى جۋرناليستيكانى تەرروريزمگە بالاعانىن توقتاتسىن جانە ءوز مىندەتىن اتقارعانى ءۇشىن تۇرمەگە جابىلعان جۋرناليستەردى بوساتسىن»، – دەگەن.

“The Qazaq Times”