ەردوعان ەۋروپادان كومەك سۇرادى

ءسۇريانىڭ سولتۇستىگىندە قاۋىپسىزدىك ايماعىن قالىپتاستىرۋ ءۇشىن تۇركياعا حالىقارالىق قولداۋ كورسەتىلمەسە، ميلليونداعان بوسقىندار ءۇشىن ەۋروپاعا شەكارا ايقارا اشىلماق. بۇل تۋرالى پرەزيدەنت رەجەپ تايىپ ەردوعان ەسكەرتتى.

رەسمي انكارا ەۋروپا ەلدەرىنەن «لوگيستيكالىق قولداۋ» كۇتەتىنىن ايتىپ، ەل پرەزيدەنتى: «ەگەر ميگرانتتاردى ورنالاستىرۋعا ەۋروپا جانە حالىقارالىق ۇيىمداردان كومەك بولماسا، تۇركيا بوسقىنداردى سول جاققا جىبەرۋگە ءماجبۇر. سۇريالىق باۋىرلارىمىزدى قاۋىپسىز ورىنعا كوشىرۋ نەگىزگى ماقساتىمىز سانالادى. بىزگە قولداۋ كورسەتىڭىزدەر»، – دەدى.

قازىرگى ۋاقىتتا تۇركيادا ازاماتتىق سوعىستان قاشقان 3,6 ميلليون سۇريالىق بوسقىن بار. ۆۆس مالىمەتىنشە، تۇركيا «تەررورلىق ۇيىم» رەتىندە تانىعان كۇردتەر قوسىنى تۇرىك اسكەرلەرىن شەكارادان وتكىزگىسى كەلمەيدى. سول سەبەپتى تاراپتار اراسىندا قاقتىعىستار ءجيى ورىن الىپ وتىر.

ءسۇريا ۇكىمەتى رەسەي اۆياتسياسىنىڭ قولداۋىمەن يدليبتە كوتەرىلىسشىلەرمەن سوعىس باستاعان. تۇرىك بيلىگى ءسۇريانىڭ سولتۇستىك-باتىس پروۆينتسياسىنداعى اۋىر شايقاس تۇركياعا بوسقىنداردىڭ جاڭا لەگىن اكەلەدى دەپ قاۋىپتەنۋدە. وسىعان بايلانىستى، بوسقىندار مەن بەيبىت تۇرعىنداردىڭ سۇرياداعى قاۋىپسىزدىگىن قامتاماسىز ەتۋگە قولداۋ كورسەتەتىن بىردەن-ءبىر مەملەكەت اقش بولعاندىقتان، تۇركيا اتالعان ماسەلەنى امەريكالىق اسكەرلەرمەن بىرلەسە شەشپەك. العاشقى قادام قىركۇيەكتىڭ سوڭىنا جوسپارلانىپ وتىر، دەيدى ەردوعان.

2016 جىلى ەۋروپالىق وداق پەن تۇركيا ورتاق شەشىمگە كەلگەن. ارنايى كەلىسسوزگە سايكەس، انكارا ميگرانتتاردىڭ ەۋروپا ەلدەرىنە قونىس اۋدارماۋىن قاتاڭ قاداعالاسا، ەو تۇركياعا 6 ملرد ەۋرو كولەمىندە قارجى بەرۋى ءتيىس بولاتىن. كەيىننەن ەردوعان وداق تاراپىنان تەك 3 ملرد ەۋرونىڭ بولىنگەنىن مالىمدەدى.

گرەتسياعا قىسىم

ەۋرووداقتىڭ تۇركيامەن كەلىسسوزى گرەتسيادا 2015 جىلدان باستاپ بوسقىنداردىڭ ارتۋىنا سەپ بولعان. لەسبوس ەلدىمەكەنىندەگى ميگرانتتار لاگەرىندە كۇنى بۇگىنگە دەيىن جەرگىلىكتى تۇرعىندار مەن بوسقىندار اراسىندا قاقتىعىستار ورىن الىپ كەلەدى.

رەسمي مالىمەتتەر بويىنشا، شامامەن 24 مىڭ بوسقىن ەۋروپا اسۋ ماقساتىندا گرەتسياعا قونىس اۋدارعان.

"The Qazaq Times"