فوتو: http://aaj.tv

انكارا رەسپۋبليكالىق پروكۋراتۋراسى فەتو لاڭكەستىك ۇيىمىنا قاتىسى بار دەگەن كۇدىكپەن سىرتقى ىستەر مينيسترلىگىنىڭ 249 قىزمەتكەرىن تۇتقىنداۋ تۋرالى شەشىم قابىلدادى.

انكارا باس پروكۋراتۋراسىنىڭ رەسمي پاراقشاسىندا جاريالانعان مالىمەتتەر بويىنشا، كۇدىكتىلەر 2010, 2011, 2012 جانە 2013 جىلدارى مينيسترلىك سىناقتارىن فەتو-مەن ىنتىماقتاستىق ارقاسىندا ءساتتى تاپسىرعان. قازىردىڭ وزىندە ەلدىڭ 42 پروۆينتسياسىندا رەيد جۇرگىزىلىپ، ناتيجەسىندە 78 كىسى ۇستالدى. قازىرگى ۋاقىتتا 171 كۇدىكتىنى ىزدەستىرۋ جۇمىستارى جالعاسىپ جاتىر.

ايتا كەتەر بولساق، تۇركيا بيلىگى 2016 جىلدىڭ 15 شىلدەسىندە توڭكەرىس ارەكەتىن ءدىن ۋاعىزشىسى فەتحۋللاح گۇلەن مەن جاقتاستارى ۇيىمداستىرعانىن ايتادى. بۇگىنگى ۋاقىتقا دەيىن 125 مىڭنان استام ادام فەتو لاڭكەستىك ۇيىمىنا قاتىسى بار دەپ ايىپتالىپ، مەملەكەتتىك قىزمەتتەن شىعارىلدى. 2 مىڭ 700-دەن استام مەكەمە مەن ۇيىمدار جۇمىسىن توقتاتسا، 30 مىڭنان استامى باس بوستاندىعىنان ايىرىلدى. تۇركيا پرەزيدەنتى رەجەپ تايىپ ەردوعان مەملەكەتتىك توڭكەرىس ارەكەتىنە يسلام ناسيحاتشىسى فەتۋللاھ گۇلەندى ايىپتادى. ال، كوپتەگەن جىلدان بەرى اقش-تا تۇراتىن گۇلەن وزىنە تاعىلعان بۇل ايىپتاۋلارمەن كەلىسپەيتىنىن مالىمدەگەن بولاتىن.

 

"The Qazaq Times"