اقوردا حاتشىسى مەن اكىم، باسقارما باسشىسى سياقتى اقجاعالىلار مەن ونەر جۇلدىزدارىنىڭ باسىن قوسقان «ەرەجەسىز كەشتە» 50 ادام عانا بولا قويماعانى انىق. فوتو: قر ەڭبەك سىڭىرگەن قايراتكەرى قاراگوز سۇلەيمەنوۆا Instagram-پاراقشاسىنداعى سترويزىنەن سكرين

الەۋمەتتىك جەلىلەردە قازاقستاندىق بەلگىلى ونەر ادامدارى مەن ساياسي قىزمەتكەرلەر، شەنەۋنىكتەردىڭ تويدا سايران سالىپ جۇرگەن بەينەجازبالار جاريالانىپ، قولدانۋشىلار اراسىندا كەڭىنەن تاراپ سىنعا ىلىكتى. «قىزىل ايماقتان» ايلاپ شىعا الماي وتىرعان الماتى قالاسى مەن استانادا كارانتين كەزىندەگى كوپكە ورتاق تىيىمعا قاراماستان تانىمال تۇلعالاردىڭ ۇيىمداستىرۋىمەن يا قاتىسۋىمەن وتەتىن جيىندار ازايماي تۇر، جاۋاپتى مەكەمەلەر مەن بيلىك ولارعا شارا قولداناردا تارتىنىپ قالادى.

وتكەن اپتادا الماتىداعى Svetlana modern cuisine مەيرامحاناسىندا بەلگىلى اكتەر دوسحان جولجاقسىنوۆتىڭ 70 جاسقا تولۋىنا ارنالعان مەرەيتوي ءوتتى. الماتى قالاسىنىڭ سانيتارلىق-ەپيدەميولوگيالىق باقىلاۋ دەپارتامەنتى جەتەكشىسىنىڭ ورىنباسارى سادۋاقاس بايعابىلوۆتىڭ ايتۋىنشا، مونيتورينگ توپتاردان جيىن كەزىندە كارانتين ەرەجەسى بۇزىلعانى جايلى ماتەريال كەلىپ تۇسسە، سانيتارلىق-ەپيدەميولوگيالىق باقىلاۋ دەپارتامەنتى ءتيىستى شارالار قولدانادى.

Malim.kz ينتەرنەت باسىلىمى قوعام تالقىسىنا ىلىككەن مەرەيتويداعى كارانتين شارالارىنىڭ بۇزىلعان-بۇزىلماعانىن قالالىق سەس باسشىسى ءارى باس سانيتار دارىگەر جانداربەك بەكشيننىڭ وزىنەن بىلمەك نيەتتە حابارلاسقان، جۋرناليست ەكەنىن ەستىگەن بويدا تۇتقانى بىردەن قويا سالعان، كەيىن تەلەفونىن مۇلدە كوتەرمەگەن.

قازاقستاننىڭ باس مەملەكەتتىك سانيتارلىق دارىگەرى ەرلان قياسوۆتىڭ 24 قىركۇيەكتەگى № 44 قاۋلىسى بويىنشا، «قىزىل ايماقتاعى» وڭىرلەردە ەسكە الۋ، مەرەيتوي، مەرەكەلىك وتباسىلىق شارالارعا رۇقسات ەتىلگەنىن، الايدا وعان Ashyq قوسىمشاسىندا جاسىل ستاتۋسى بار 50 ادام قاتىسا الادى. دەگەنمەن ۆيدەولاردان اتالعان كەشتە كەمىندە ءجۇز شاقتى قوناق بولعانى بايقالادى. الەۋمەتتىك اراقاشىقتىق پەن ماسكا رەجيمى دە ساقتالماعان. بۇل ۆيدەولاردى الدىمەن مەرەيتوي يەسى جولجاقسىنوۆتىڭ ايەلى تەلەجۇرگىزۋشى، قر ەڭبەك سىڭىرگەن قايراتكەرى قاراگوز سۇلەيمەنوۆا Instagram-پاراقشاسىنداگى ستوريزگە سالعان بولاتىن.

ۆيدەوعا قاراعاندا، تويعا پرەزيدەنت توقاەۆتىڭ ءباسپاسوز حاتشىسى بەرىك ءۋالي، وسكەمەن قالاسىنىڭ اكىمى جاقسىلىق ومار، زەينەتكە شىققان قازاقستاننىڭ رەسەيدەگى بۇرىنعى ەلشىسى يمانعالي تاسماعامبەتوۆ، الماتى قالاسى ۋربانيستيكا باسقارماسىنىڭ باسشىسى الماسحان احمەدجانوۆتار قاتىسقان. سونداي-اق ۆيدەولاردان تويعا انشىلەر ماقپال ءجۇنىسوۆا، سايات مەدەۋوۆ، التىناي جوراباەۆا، قايرات نۇرتاس، fashion بلوگەر نۇراش جارمۇحامبەتوۆا، «جىگىتتەر» كۆارتەتى مەن ولاردىڭ پروديۋسەرى ەرعالي ءابدىرايىموۆ، تاعى باسقا انشىلەر مەن اكتەرلەر بارعانى كورىنەدى.

«ەگەر اۋداندىق مونيتورينگ توپتارىنان ورىن سانىنا بايلانىستى شەكتەۋلەر بۇزىلعانى جايلى ماتەريالار كەلىپ تۇسەتىن بولسا، وندا ۇيىمداستىرۋشىلار مەن كەلۋشىلەردى اكىمشىلىك جاۋاپكەرشىلىككە تارتۋ قاراستىرىلادى»، – دەيدى بايعابىلوۆ.

المالى اۋدانى اكىمىنىڭ ورىنباسارى ەردەن حايرۋللين Orda.kz باسىلىمىنا بەرگەن جاۋابىندا مونيتورينگ توپتارىنا ءتيىستى تاپسىرما بەرىلگەنىن مالىمدەدى.

«ءبىز «اشىق-ماشىق» ارقىلى جاسىلمەن كىرگەندى تەكسەرەمىز. «اشىق» بويىنشا بارلىق قۇجات پەن ءبارىنىڭ قالاي وتكەنى تۋرالى قۇجاتتاردى سۇراتتىق. قازىر جاۋاپ كۇتىپ وتىرمىز. ۆيدەونى (قانشا ادام قاتىسقانىن) ازىرگە كورمەدىك. الەۋمەتتىك جەلىدە جاريالانعان ۇزىندىلەردى عانا كوردىك. وندا ەلۋدەن تومەن، ەلۋ شاقتى ادام. ال بىزگە جالپى ۆيدەونى قاراۋ كەرەك. بۇل ماسەلە باقىلاۋدا»، – دەدى حايرۋللين orda.kz باسىلىمىنا.

بۇعان دەيىن استاناداعى شەنەۋنىكتەر مەن الماتىداعى بەدەلدى تۇلعالار وتكىزگەن بىرقاتار جيىن-وتىرىستار جونىندە باق وكىلدەرى مەن قوعام تاراپىنان تۋعان سۇراقتار بويىنشا سانيتارلىق-ەپيدەميولوگيالىق باقىلاۋ قىزمەتى ورگاندارى ناقتى شەشىم شىعارمادى. بار سەبەپتى «مونيتورينگ توپتاردىڭ فاكتى تۋرالى ماتەريالدى جولداماعانىنا» ارتادى.

قالادا پاندەميا باستالعالى 180 مىڭعا جۋىق ادام اۋىرعان، ونىڭ 2 مىڭى ايعا الماي قايتىس بولدى. قازاقستاندا ەڭ ۇزاق ۋاقىت «قىزىل ايماقتا» قالىپ وتىرعان ەكى قالانىڭ ءبىرى دە – الماتى. دەسە دە شەنەۋنىكتەر مەن جۇلدىزدار كارانتين شەكتەۋىن توقتاۋ كورەر ەمەس. ساراپشىلار مۇنىڭ قۇقىقتىق تۇرعىدا زاڭ ۇستەمدىگىنە سالقىنىن تيگىزىپ، ازاماتتار اراسىندا الالاۋشىلىق پەن جىكتى كۇشەيتەدى دەپ ەسكەرتەدى.

پاندەميا باستالعالى الماتى قالاسىنىڭ وزىندە كارانتين ەرەجەسىن بۇزدى دەگەن ايىپپەن جەكە تۇلعالار مەن شاعىن جانە ورتا كاسىپكەرلەردەن جۇزدەگەن ميلليون تەڭگە ايىپپۇل وندىرىلگەن.

The Qazaq Times