تالىپتەر جاڭا ۇكىمەت قۇرعانىن جاريالادى. فوتو: VOA.

«تاليبان» اۋعانستاندا ۋاقىتتىق ۇكىمەت قۇرىپ، ەلدى «يسلام امىرلىگى» دەپ جاريالادى. ۇكىمەتتىڭ جوعارى لاۋازىمدى جەتەكشىلەرى دەرلىك تالىپتەردەن تۇرادى. اۋعانستاننىڭ جاڭا ۇكىمەتىنىڭ قۇرامى تولىقتاي يسلامشىل ۇيىمنىڭ اسا ءدىنشىل جەتەكشىلەرىنەن جاساقتالعان.

اۋعانستان ۇكىمەتىنە ەندىگى جەردە «تاليبان» ۇيىمىن قۇرۋشىلاردىڭ ءبىرى جانە حالىقارالىق قاۋىمداستىقتىڭ قارا تىزىمىنە ەنگەن مۋحاممەد حاسان احۋند باسقارادى. ال، ىشكى ىستەر ءمينيسترىنىڭ قىزمەتىن اتقارۋشى بولىپ اتىشۋلى سيراجۋددين حاككاني كەلدى. ونى بۇعان دەيىن اقش سىرتقى بارلاۋ قىزمەتى قۋعىنداعان بولاتىن. اۋعانستانداعى تەررورلىق توپتاردىڭ ورتاسىندا دانەكەر بولىپ وتىرعان حاككاني توبىنىڭ جەتەكشىسى.

بۇدان ءۇش اپتا عانا بۇرىن تالىپتەر كابۋلدى باسىپ الىپ، وسىعان دەيىن ەلدەگى رەسمي بيلىك سانالعان ۇكىمەتتىڭ جەتەكشىلەرىن بيلىكتەن تايدىردى. وسىدان كەيىن «تاليبان» ەلدەگى تۇراقتىلىق پەن باياندى تىنىشتىق ءۇشىن اۋقىمدى ۇكىمەت قۇراتىنىن مالىمدەگەن. ءارى، جاڭا بيلىكتە بارلىق تاراپتىڭ مۇددەسى ەسكەرىلەتىنىن دە ايتىپ كەلگەن، الايدا ولاي بولعان جوق، جاڭا ۇكىمەت ۋاقىتىق بولسا دا قۇرامىندا «تاليباننان» باسقا ەشقانداي تاراپتىڭ جەتەكشىلەرى تارتىلمادى. تالىپتەر مەن بۇرىنعى ۇكىمەت ورتاسىندا وسىعان دەيىن بولعان كەلىسسوزدەردىڭ ەشقايسىسى دا جاڭا ۇكىمەت قۇرامىنا اسەر ەتە العان جوق.

جاڭا ۇكىمەت قۇرامى اۋعانستانداعى الداعى جاعدايدىڭ قانشالىقتى كۇردەلى بولاتىنىن انىق اڭعارتىپ وتىر. «تاليبان» قۇرىپ جاتقان ۋاقتتىق ۇكىمەتتىڭ باسىنداعى پروبلەمالار جەتكىلىكتى. ولار ەلدەگى ءالى دە اياعىن نىق باسا قويماعان ءوز بيلىگىن نىعايتۋمەن بىرگى، ەلدىڭ ەكونوميكاسى، ينۆەستيتسيالىق كىرىسى، الەۋمەتتىك جاعدايى سەكىلدى بارلىق سالالارىنداعى القىمنان العان داعدارىستى بىرجاقتىلى ەتۋى ءتيىس. بۇدان تىس وزدەرىن ەلدىڭ زايىرلى بيلىگى ەتىپ تانىتۋ ءۇشىن كورشىلەس جانە الىس شەتەلدەرمەن كۇردەلى ديپلوماتيالىق جۇرىستەردى جاساۋىنا تۋرا كەلەت.  

The Qazaq Times