ەۋروپاداعى قانداستارىمىز قازاق ءداستۇرىن تۇركى تەكتى اعايىنعا جەتكىزدى

ەۋروپاداعى قازاق باۋىرلاستارىمىزدان جەتكەن حابارعا قاراعاندا، وتكەن اپتادا، 25 ناۋرىز كۇنى اۆستريانىڭ استاناسى ۆەنا قالاسىندا ەۋروپاداعى جانە ات اياعى جەتكەن الىس قۇرلىقتارداعى تۇرىك تىلدەس باۋىرلاستار باس قوسىپ، ۇلىستىڭ ۇلى كۇنى – ناۋرىز مەيرامىن اتاپ وتكەن. شاراعا قازاق دياسپوراسى اتىنان ەۋروپاداعى قازاقتاردىڭ بىرلەستىگىنىڭ وكىلدەرى ارنايى قاتىسقان. بۇل تۋرالى بىرلەستىك توراعاسى قىدىرحان چولپان حابارلادى.

ەجەلگى ءداستۇردى ەسكە ءتۇسىردى. فوتو: ق.چ.

ۇلىستىڭ ۇلى كۇنىنە ارنالعان مەرەكەلىك شارا قازاق، تۇرىك جانە ازەربايجان ەلدەرىنىڭ ءان ۇرانىمەن باستالىپ اشىلعان. قازاقستاننىڭ اتالعان ەلدەگى ديپلوماتى مەرەي مۇقاجان قازاق ەلىنىڭ سالەمىن جەتكىزگەن.

عاسىرلىق مۇراگەرلەر.

ەۋرازيانىڭ تۇكپىر-تۇكپىرىنەن كەلگەن تۇركى تەكتى اعايىن ناۋرىزدىڭ وتىر جاعىپ، مىڭ جىلعى ءداستۇردى جاڭعىرتىپ وتتان قارعىپ، تاريحي تامىرلاستىعىن ەسكە تۇسىرگەن. ەۋروپاداعى قازاق قانداستارىمىز قازاقتىڭ ۇلتتىق كيىمدەرىن، ۇلتتىق تاعامدارىن، ۇلتتىق بي مەن مۋزىكا ونەرىن تۋىستاس تۇرىك تەكتەس اعايىندارعا كورسەتكەن.

ارسىلانبەك سۇلتانبەك. فوتو: ق. چولپان.

«ناۋرىزدا ەلدە بولماساق تا ەلىمىزدىڭ ءداستۇرىن تۋىستاس حالىقتارعا كورسەتىپ، كوڭىلىمىز سەرپىلىپ قالدى»، – دەيدى قىدىرحان چولپان، «ايتالىق، مەنىڭ باسىما كيگەن «كەرەي تۇماق» بايانولگەيدەن بولسا، ۇستىمدەگى وقالى شاپان اتاجۇرت قازاقستاننان، بەلىمدەگى كۇمىس كىسە مەن قانجار، اتا مەكەن التىن التايدان. ال، حانىمىمنىڭ كيگەن كيمەشەك-شىلاۋىشى اپاسىنان قالعان كەمىندە ءبىر عاسىرلىق مۇرا بولاتىن. بۇل تويعا قازاقتىڭ دومبىراسىن تۋىسقان حالىقتارعا تانىستىرىپ جۇرگەن ارسىلانبەك سولتانبەك باۋىرىمىز دا قاتىستى»، – دەدى.

“The Qazaq Times”