بۇگىن، 31-ءشى ناۋرىز ەلىمىزدەگى ەڭ ۇلكەن  وقۋ ورىندارىنىڭ ءبىرى ءال-فارابي اتىنداعى قازاق ۇلتتىق ۋنيۆەرسيتەتىندە  ۇلىستىڭ ۇلى كۇنى ناۋرىز مەيرامى اتالاپ ءوتتى. ەكى جىل قاتارىنان كارانتينگە بايلانىستى  اۋقىمدى دەڭگەيدە وتكىزىلمەگەن مەيرام وسى جولى جوعارى دەڭگەيدە  ۇيىمداستىرىلعان.

ىرىس پەن ىنتىماقتىڭ جارشىسىنا اينالعان مەرەكەگە وراي قازۇۋ قالاشىعىنا 19 ۇلكەن كيىز ءۇي قۇرىلىپ، ۇلتتىق تاعامدارمەن داستارحان جايىلعان. ءار قازاق ۇيگە فاكۋلتەت اتاۋىنا بايلانىستى اتاۋ بەرگەن ەكەن. “جۋرناليستەر اۋىلى”، “زاڭگەرلەر اۋىلى” دەگەن سەكىلدى. ءار قازاق ۇيدە فاكۋلتەت ۇجىمدارى، ستۋدەنتتەرى مەرەكەلىك داستارحان جايىپ، كوجە، باۋىرساق ءپىسىرىپ مەرەكەنى جوعارى دەڭگەيدە تويلاپ جاتىر.

سونىمەن قاتار مەرەكەلىك كونتسەرت تە ۇيىمداستىرىلعان. كونتسەرتتى ۋنيۆەرسيتەت رەكتورى ج.تۇيمەباەۆ اشتى. بارشا قازاق ەلىن، ستۋدەنتتەردى ناۋرىز مەيرامىمەن قۇتتىقتاپ، جىلى لەبىزىن ءبىلدىردى. ارى قاراي مەرەكەلىك باعدارلاما جالعاسىن تاۋىپ، حالىققا جاقسى كوڭىل كۇي سىيلادى. قازاقتىڭ ۇلتتىق سالت-داستۇرىنەن كورىنىستەر قويىلدى. كەلىن ءتۇسىرۋ، بەسىككە سالۋ داستۇرلەرىنىڭ ءمانىن  حالىققا قويىلىم ارقىلى جەتكىزۋگە تىرىستى. ارى قاراي ەلىمىزدىڭ ءانشى-كۇيشىلەرى ءان-كۇيدەن شاشۋ شاشتى. «الاتاۋ سەرىلەرى» توبى ورىنداعان «مولدابايدىڭ ءانى» جينالعان كوپشىلىكتىڭ كوڭىلىنەن شىقتى. مەرەكەگە كەلگەندەردىڭ كوڭىل كۇيلەرى كوتەرىڭكى بولىپ ءجۇر.

بايعانىم بويىنشا ناۋرىز مەيرامى جىلدان جىلعا جوعارعى دەڭگەيدە تويلانىپ كەلە جاتىر. جاستاردىڭ، ستۋدەنتتەردىڭ دە كوڭىل كۇيلەرى دە ەرەكشە. ءتىپتى شەتەلدەن كەلىپ وقىپ جاتقان ستۋدەنتتەردە مەرەكەنى تويلاۋعا ءوز ۇلەستەرىن قوسىپ ءجۇر. كوپشىلىگى قازاقشا تاقيا، كاجەكەي شاپان كيىپ العان. اسىرەسە جاي كۇندەرى ۇلتتىق ويۋ-ورنەكتەر كيىپ جۇرگەن جاستاردى كوپتەپ بايقاپ ءجۇرمىن. بۇل ارەكەتتەرى ارينە كوڭىل قۋانتادى.

“ناۋرىز – جىل باسى” دەمەكشى وسى جىلىمىز ءدال بۇگىنگىدەي بەرەكەلى،جاقسى جىل بولسىن دەيمىز. حالقىمىزدىڭ ىنتىماعى ارتىپ،تەك جاقسى جاڭالىقتارمەن قۋانىپ جۇرە بەرەيىك. ناۋرىز قۇتتى بولسىن!

الماتى قالاسى،

گۇلنۇر ءالىمجانوۆا