فوتو: primeminister.kz

قازاقستاندا شاعىن نەسيە بەرۋ  باعدارلاماسىن قارجىلاندىرۋعا 62 ميلليارد تەڭگە ءبولىندى، بۇل تۋرالى قر ۇكىمەتىنىڭ وتىرىسىندا ەڭبەك جانە حالىقتى الەۋمەتتىك قورعاۋ ءمينيسترى ءمادينا ابىلقاسىموۆا مالىمدەدى، دەپ حابارلايدى پرەمەر ءمينيستردىڭ رەسمي سايتى.

ءمينيستردىڭ سوزانشە، بۇگىندە شاعىن نەسيە بەرۋدى كوبەيتۋ 2017–2021 جىلدارعا ارنالعان ءونىمدى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسى اياسىندا جۇزەگە اسىرىلۋدا جانە جاپپاي كاسىپكەرلىكتى دامىتۋدىڭ ەڭ ءتيىمدى تەتىگى رەتىندە سانالادى.

2018 جىلى بەكىتىلگەن بيۋدجەتتە شاعىن نەسيە بەرۋ باعدارلاماسىنا جالپى — 42 ملرد تەڭگە، ونىڭ ىشىندە اۋىلدىق جەرلەرگە — 31 ملرد تەڭگە جانە قالالار مەن مونوقالالار ءۇشىن — 11 ملرد تەڭگە قاراستىرىلعان.

«مەملەكەت باسشىسىنىڭ تاپسىرماسى بويىنشا قارجىلاندىرۋ 20 ملرد تەڭگەگە ۇلعايتىلىپ، بيىلعى جىلى 62 ملرد تەڭگەنى قۇرايدى»، - دەدى ابىلقاسىموۆا.

مينيستر شاعىن نەسيە بەرۋدىڭ ساپالى اسەرىن قامتاماسىز ەتۋ ءۇشىن، سونداي-اق سوڭعى قارىز الۋشىعا قاراجات جەتكىزۋدى ۋاقىتىلى جوسپارلاۋ ماقساتىندا قوسىمشا بولىنەتىن 20 ملرد تەڭگەدەن اۋىلدار مەن شاعىن قالالارداعى نەسيەلەندىرۋگە شامامەن 14 ملرد تەڭگەنى ءبولۋدى ۇسىندى.

م. ابىلقاسىموۆانىڭ ايتۋىنشا، بيزنەس-جوبالاردى قورعاۋ جانە شاعىن نەسيەلەردى الۋ ءۇشىن جۇمىسسىزدار مەن ءوزىن-ءوزى جۇمىسپەن قامتىعان ازاماتتار الدىمەن «باستاۋ–بيزنەس» جوباسى بويىنشا وقۋى كەرەك. قوسىمشا بولىنەتىن قاراجاتتى ەسكەرە وتىرىپ، كاسىپكەرلىك نەگىزدەرىن وقىتۋعا جالپى ترانسفەرتتەر ەسەبىنەن كەم دەگەندە 1,2 ملرد تەڭگە ءبولۋ ۇسىنىلادى.

“The Qazaq Times”