فوتو: https://kursiv.kz

بيىل ۇكىمەت پارلامەنت قاراۋىنا جالپى سانى 32 زاڭ جوباسىن ەنگىزگەن. بۇل جونىندە ۇكىمەت وتىرىسىندا ادىلەت ءمينيسترى مارات بەكەتاەۆ مالىمدەدى.

باياندامادا ايتىلعانداي، بۇل زاڭ جوبالارى ءتۇرلى سالالاردى ودان ءارى دامىتۋعا باعىتتالعان. مىسالى، الەۋمەتتىك قامسىزداندىرۋ، دەنە شىنىقتىرۋ جانە سپورت، اسكەري قىزمەت جانە ارنايى مەملەكەتتىك ورگاندار قىزمەتكەرلەرى مەن اسكەري قىزمەتشىلەردىڭ تۇرعىن ءۇي قاتىناستارى ت.ب.
الداعى جىلى «ەرەكشە تاۋارلاردى باقىلاۋ تۋرالى»، «وسىمدىكتەر الەمى تۋرالى» جانە «ارداگەرلەر تۋرالى» جاڭا جەكەلەگەن زاڭ جوبالارىن ازىرەۋ كوزدەلىپ وتىر. جوسپار جوباسىندا مەملەكەت باسشىسىنىڭ قازاقستان حالقىنا جولداۋىن، سونداي-اق پرەزيدەنتتىڭ سايلاۋالدى باعدارلاماسىن ىسكە اسىرۋعا باعىتتالعان بىرقاتار زاڭ جوبالارى كوزدەلگەن.

ولار: مەملەكەتتىك ساتىپ الۋلار، دەنە شىنىقتىرۋ جانە سپورت، اۋداندىق، قالالىق جانە اۋىلدىق دەڭگەيدەگى بيلىكتىڭ دەربەستىگى مەن جاۋاپكەرشىلىگىن كەڭەيتۋ ماسەلەلەرى بويىنشا زاڭ جوبالارى. ماسەلەن، مەملەكەتتىك ساتىپ الۋلار ماسەلەلەرى بويىنشا زاڭ جوباسىن ازىرلەۋ ساتىپ الۋ راسىمدەرىن وڭايلاتۋ جانە وتكىزۋ راسىمدەرىندە ارتىق رەتتەۋدى جويۋ ناتيجەسىندە مەملەكەتتىك ساتىپ الۋلاردى ءتيىمدى وتكىزۋگە ىقپال ەتەتىن بولادى.

ازىرلەنەتىن زاڭ جوبالارىنىڭ ەڭ كوبى يندۋستريا جانە ينفراقۇرىلىمدىق دامۋ مينيسترلىگى مەن ەڭبەك جانە حالىقتى الەۋمەتتىك قورعاۋ مينيسترلىگىنە تيەسىلى، ارقايسىسى 3 زاڭ جوباسىنان ازىرلەيدى. قارجى، ۇلتتىق ەكونوميكا، سىرتقى ىستەر، مادەنيەت جانە سپورت، گەولوگيا جانە تابيعي رەسۋرستار، مينيسترلىكتەرى ەكى زاڭ جوباسىنان ازىرلەيتىن بولادى. قورعانىس مينيسترلىگى ءبىر زاڭ جوباسىن ازىرلەيدى. سونىمەن قاتار، جوسپار جوباسىندا قاراستىرىلعان 17 زاڭ جوباسىنان 2020 جىلدىڭ ءى جارتى جىلدىعىندا پارلامەنتكە 8 زاڭ جوباسىن، ال ءىى جارتى جىلدىقتا 9 زاڭ جوباسىن ەنگىزۋ كوزدەلگەن.

"The Qazaq Times"