قازاقستاننىڭ كوروناۆيرۋستان ساقتانۋ شارالارى قانداي؟

بۇگىن استانادا وتكەن ۇكىمەت وتىرىسىندا كوروناۆيرۋستان ساقتانۋ شارالارى  تالقىلانىپ، «جامبىل وبلىسىندا 150 ادام كوۆيد-9 ۆيرۋسىن جۇقتىردى» دەگەن اقپاراتتىڭ جالعان ەكەنى ايتىلدى.

جيىندا پرەمەر-مينيستر اسقار مامين، دەنساۋلىق ساقتاۋ ءمينيسترى ە.ءبىرتانوۆ، سىرتقى ىستەر ءمينيسترى م.تىلەۋبەردى، يندۋستريا جانە ينفراقۇرىلىمدىق دامۋ ءمينيسترىنىڭ ورىنباسارى ب.قاماليەۆ، پرەمەر-ءمينيسترىنىڭ ورىنباسارى ە.توعجانوۆ قازىرگى جاعداي مەن اتقارىلىپ جاتقان جۇمىستار تۋرالى باياندادى.

دەنساۋلىق ساقتاۋ مينيسترلىگى وسى جىلدىڭ 6 قاڭتارىنان باستاپ كوروناۆيرۋستىق ينفەكتسيانىڭ اكەلىنۋى مەن تارالۋىنىڭ الدىن الۋ بويىنشا كۇشەيتۋدىڭ 3 كەزەڭىن ىسكە اسىرعان. 1 ناۋرىزدان باستاپ سول ەلدەردەن كەلگەن تۇلعالارعا كارانتيندىك ءىس-شارالار قولدانىلاتىن ەلدەردىڭ تىزبەسىن كەڭەيتەتىن كۇشەيتۋدىڭ 4-كەزەڭى ەنگىزىلدى. ازاماتتاردىڭ دەنساۋلىعىن قورعاۋ بويىنشا تۇبەگەيلى شارالار قابىلداۋ ماقساتىندا ۇكىمەت ەلدە كوروناۆيرۋستىق ينفەكتسيانى انىقتاۋ جانە تاراتۋ كەزىندەگى ءىس-قيمىل الگوريتمىن ازىرلەگەن.

پرەمەر-مينيستر سوزىندە: «يندۋستريا جانە ينفراقۇرىلىمدىق دامۋ مينيسترلىگى كوروناروۆيرۋس بەلسەندى تۇردە تارالىپ جاتقان ەلدەرگە تۇراقتى رەيستەردى شەكتەسىن. سونداي-اق، ءبىزدىڭ فارماتسەۆتيكالىق كاسىپورىنداردا مەديتسينالىق ماسكالار مەن باسقا دا قورعانىس قۇرالدارى ءوندىرىسىن ارتتىرۋدى قامتاماسىز ەتۋدى تاپسىرامىن»،– دەدى. سونىمەن قاتار، اكىمدىكتەر مەن ەڭبەك جانە حالىقتى الەۋمەتتىك قورعاۋ مينيسترلىگىنە كوروناۆيرۋستىق ينفەكتسيانىڭ تارالۋ دەڭگەيى قولايسىز ەلدەردىڭ ازاماتتارى ءۇشىن شەتەلدىك جۇمىس كۇشىن تارتۋعا رۇقسات بەرۋدى توقتاتۋ تۋرالى بۇيرىق بەرىلدى.

ۇكىمەتتىڭ ءباسپاسوز ورتالىعىندا وتكەن بريفينگتە دەنساۋلىق ساقتاۋ ءمينيسترى ەلجان ءبىرتانوۆ: «ەڭ باستىسى – ەلىمىزدە كوروناۆيرۋس ينفەكتسياسىن جۇقتىرعان ادام انىقتالعان جاعدايعا دايىن بولۋ. ول تۇرعىدا بىزدە «ب» جوسپارى بار. ول جوسپار ازىرلەنىپ، بارلىق مەملەكەتتىك ورگانمەن ماقۇلداندى. بۇل جوسپاردىڭ نەگىزى – قازاقستان اۋماعىندا ينفەكتسيانىڭ تارالۋىن بارىنشا شەكتەۋ. قازىرگى ۋاقىتتا بارلىق مەملەكەتتىك ورگانمەن، اكىمدىكپەن ءتيىستى جۇمىستار جۇرگىزىلىپ جاتىر»، – دەدى.

مينيستر قىتاي مەن يراننان كەلگەن ازاماتتار مىندەتتى تۇردە 14 كۇندىك كارانتينگە جاتقىزىلاتىنىن، اۋرۋحانادان شىققاننان كەيىن قوسىمشا 10 كۇن ىشىندە مەديتسينالىق باقىلاۋدا بولاتىنىن مالىمدەدى. «ءبىرىنشى ساناتتا ەلدەردەن كەلگەن ازاماتتار 14 كۇنگە تۇرعىلىقتى جەرى بويىنشا كارانتينگە ورنالاستىرىلادى. بىراق سانيتارلىق قىزمەتتىڭ شەشىمى بويىنشا بۇل ادامدار مەديتسينالىق ۇيىمداعى كارانتينگە اۋىستىرىلۋى مۇمكىن»، – دەدى.

1 ناۋرىزدان باستاپ دەنساۋلىق ساقتاۋ مينيسترلىگى سانيتارلىق-ەپيدەميولوگيالىق باقىلاۋدى كۇشەيتۋدىڭ 4-ءشى ساتىسىن ەنگىزدى. ءبىرىنشى ساناتتاعى ەلدەر قاتارىنا قىتاي حالىق رەسپۋبليكاسى، سونىڭ ىشىندە گونكونگ، تايۆان، ماكاو جانە يران، وڭتۇستىك كورەيا، جاپونيا، يتاليا جاتادى.

ايتا كەتەيىك، وشاعى قىتايدىڭ حۋبەي پروۆينتسياسىنان باستالىپ، 65 مەملەكەتكە تاراپ ۇلگەرگەن كوۆيد-9 ۆيرۋسى پاندەمياعا اينالۋى مۇمكىن. قازىرگى ۋاقىتتا الەم بويىنشا 88437 ادام كوۆيد-9 جۇقتىرىپ، 3039 ادام قايتىس بولعان. ۆيرۋس جۇقتىرۋ قاۋپى جوعارى ءبىرىنشى ساناتتاعى ەلدەر قاتارىندا قىتايدان كەيىن وڭتۇستىك كورەيا، جاپونيا، گونكونگ، تايۋان، ماكاو، يتاليا جانە يران تۇر. وڭدەلگەن دەرەكتەر بويىنشا، اتالعان دەرت فرانتسيا، اۋستراليا، فيليپپين، بەلارۋس، لاتۆيا، گەرمانيا جانە اقش-تا تىركەلدى. سونىمەن قاتار، رەسەي، ۋكراينا، ارمەنيا، قىرعىزستاندا دا ۆيرۋسقا شالدىققاندار كارانتيندە جاتىر. ولار Diamond Princess كەمەسىندە بولعان. ال بەلارۋس پەن لاتۆيادا يراندىق ستۋدەنتتەردەن كوروناۆيرۋس تابىلدى.

"The Qazaq Times"