وتكەن جەكسەنبى، 26 قاڭتار پرەمەر-مينيستر اسقار ءماميننىڭ جەتەكشىلىگىمەن ۇكىمەت كەڭەسى ءوتتى. دەمالىس كۇنگى مينيسترلەر كابينەتىنىڭ جيىنىندا  قازاقستاننىڭ كوروناۆيرۋس ىندەتىنە دايىندىعى ماسەلەسى تالقىلاندى.

دەنساۋلىق ساقتاۋ ءمينيسترى ە.ءبىرتانوۆ، يندۋستريا جانە ينفراقۇرىلىمدىق دامۋ ءمينيسترى ب.اتامقۇلوۆ، مادەنيەت جانە سپورت ءمينيسترى ا.رايىمقۇلوۆا، سىرتقى ىستەر ءمينيسترىنىڭ ءبىرىنشى ورىنباسارى ش.نۇرىشەۆ، قازاقستاننىڭ باس سانيتارلىق دارىگەرى ج.بەكشين، ۇلتتىق قاۋىپسىزدىك كوميتەتىنىڭ شەكارا قىزمەتىنىڭ ديرەكتورى د.ءدىلمانوۆ، سونداي-اق الماتى جانە شىعىس قازاقستان وبلىستارىنىڭ باسشىلىعى قالىپتاسقان جاعداي مەن ارەكەت ەتۋ شارالارى تۋرالى باياندادى.

وتىرىستا «مەملەكەتتىك شەكاراداعى وتكىزۋ پۋنكتەرىندە سانيتارلىق-ەپيدەميولوگيالىق جانە كوشى-قون باقىلاۋىن كۇشەيتۋ (اۋە، كولىك جانە تەمىر جول نىساندارى دا)» تۋرالى شەشىم قابىلداندى.

سونىمەن قاتار جيىندا مىناداي شەشىمدەر قابىلداندى:

  • قىتايدان كەلگەندەردى مەديتسينالىق باقىلاۋدان وتكىزۋ;
  • ەپيدەميولوگيالىق احۋالمەن بايلانىستى توتەنشە جاعدايعا دايىن بولۋ، مەديتسينالىق مەكەمەلەردى ازىرلەۋ;
  • قىتايعا قىزمەتتىك ءىسساپارلاردى شەكتەۋ، جەكە جانە تۋريستىك ساپارلاردى كەيىنگە قالدىرۋعا كەڭەس بەرۋ;
  • ترانزيتپەن كەلگەن قىتاي جولاۋشىلارىنا قازاقستان اۋماعىندا 72 ساعات ۆيزاسىز جۇرۋگە مۇمكىندىك بەرەتىن رەجيمدى توقتاتۋ;
  • «قورعاس» شەكارا ماڭى ىنتىماقتاستىق ورتالىعىنىڭ قازاقستاندىق بولىگىندە جۇمىستى ۋاقىتشا توقتاتۋ.
  • قىتايداعى قازاقستاندىقتارمەن تىعىز بايلانىس ورناتىپ، ولارعا قاجەتتى كونسۋلدىق كومەك بەرۋ;
  • قاجەت جاعدايدا ۋحان قالاسىنداعى قازاقستان ازاماتتارىن شۇعىل ەۆاكۋاتسيالاۋ;
  • قازاقستاندا ۆەدومستۆوارالىق كوميسسيا قۇرىپ، كوروناۆيرۋستىڭ تارالۋىنا جول بەرمەۋ تۋرالى جوسپار ازىرلەۋ.

"The Qazaq Times"