ەنەرگەتيكا ءمينيسترى قانات بوزىمباەۆ ورىنباسارىنىڭ ۇستالۋىنا قاتىستى پىكىر ءبىلدىردى.

قانات بوزىمباەۆ جۋرناليستەر الدىندا ورىنباسارى عاني سادىبەكوۆتىڭ ۇستالۋىنا بايلانىستى سويلەگەن سوزىندە: «ءبىزدىڭ مينيسترلىكتىڭ ۆيتسە-ءمينيسترى مەن دەپارتامەنت ديرەكتورى قاماۋعا الىندى. بۇل ءبىزدىڭ ۇجىم مەن مينيسترلىك ءۇشىن اۋىر سوققى بولدى. ءدال قازىرگى جاعدايدا بارلىق سۇراقتارعا قۇزىرلى ورگاندار مەن قورعاۋشىلار (ادۆوكاتتار) جاۋاپ بەرۋى كەرەك. قازىر مينيسترلىكتە ەشقانداي ماتەريال جوق بارلىعىن تەكسەرۋشى ورگاندار الىپ كەتكەن. سوندىقتان ءبىز ەشقانداي مالىمەت بەرە المايمىز» - دەگەن.

ەستەرىڭىزگە سالايىق، بۇعان دەيىن قانات بوزىمباەۆتىڭ ورىنباسارى عاني سادىبەكوۆتىڭ ششۋچينسك-بۋراباي دەمالىس ايماعىنداعى كولدى تازارتۋ جۇمىستارىنا بولىنگەن قارجىنى «ايماق» جشس مەردىگەر ۇيىمنىڭ باسشىسىمەن بىرگە جىمقىرعاندىعى انىقتالعان بولاتىن. كەيىننەن استانا قالاسىنىڭ №2 اۋداندىق سوتى عاني سادىبەكوۆ پەن سەرىكباي جۇمالينوۆتى ەكى ايعا قاماۋعا الۋعا شەشىم شىعارعان.

“The Qazaq Times”