فوتو: kz.otyrar.kz

الماتى وبلىسىنىڭ بۇرىنعى اكىمى اماندىق باتالوۆ كەتىپ ورنىنا ەنەرگەتيكا ءمينيسترى قانات بوزىمباەۆ كەلىپ جاتقان كۇنى وسى وبسقا قاراستى نۇرا اۋىلىندا ءبىر ميلليارد تەڭگەدەن استام قارجىعا تارتىلعان قۇبىر جارىلىپ 200-دەن اسا ءتۇتىن سۋسىز قالعان. تۇرعىندارمەن  “كتك” ارناسى كەزدەستى.

مەملەكەتتەن 1ميلليارد 40 ميلليونعا جۋىق قاراجات بولىنگەن سۋ قۇبىر جۇيەسى ءۇش جىل بۇرىن باستالعان. بىلتىر اياقتالۋى كەرەك-تۇعىن. الايدا جۇمىس اياقتالماي اشىق- شاشىق جاتقان سۋ قۇبىرلارىنىڭ جارىلۋ سالدارىنان ەندى 220 ءۇي سۋسىز قالعان.

تالعار اۋدانىنا قارايتىن نۇرا اۋىلىنىڭ تۇرعىندارى مۇنىڭ سەبەبىن ساپاسىز قۇرىلىستان كورەدى. ايتۋلارىنشا، جارتى جىل ىشىندە 10 شاقتى رەت جارىلىپ، ءار كەز سۋسىز وتىرعان.

“بەرگەن قىسىمنان شىدىمايدى دا، ءار جەردەن ءبىر جارىلادى. دەمەك بۇل تەحنولوگيالىق جۇمىستىڭ دۇرىس ورىندالماعانى. جارىلىپ جاتقانى بار. جارىق ماسەلەسى دە بار. وسىنداي الەۋمەتتىك ماسەلە كوتەرىلىپ جاتقاندا نەگە اكىم قاداعالامايدى. ەندى ميلليارد 39 ميلليون اقشا بولىنگەننەن كەيىن. ول تالاپقا ساي، قاجەتتىلىگنە جۇمسالۋ كەرەك قوي”، – دەيدى تۇرعىنداردىڭ ءبىرى بولات قاسىموۆ. 

ايگەرىم نۇردانوۆا سۋ تارشىلىعىن جارتى جىل كورىپ كەلەدى. پاتەر جالداپ تۇرعان ءتورت بالاسى بار جەسىر انانىڭ سۋ تاۋقىمەتىن تارتقانى جىعىلعانعا جۇدىرىق بولعان.

“بىزدە ىلعي سۋدى ءوشىرىپ تاستايدى. سۋدى بۇرىنعى كەڭەستەر وداعىنداعىداي اربامەن الىپ كەلەمى. سۋدىڭ ساپاسى وتە تومەن. قاق دەگەن قابات بولىپ جينالادى. شاۋگىمدەرىمىزدى ىلعي قىرامىز دا جاتامىز. ءبىر شاۋگىم سۋدى تولتىرۋعا ءبىر ساعات ۋاقىتىم كەتەدى. كىر جۋعىشىمىز كۇيىپ كەتتى. بالالارىم ءجيى اۋىرادى”، – دەيدى ول.

ال اۋىل اكىمى ءتيىستى مەكەمەلەر مەن مەردىگەرگە حات جازىپ، ءبىر ايدىڭ ىشىندە ماسەلەنى تولىق شەشپەكشى. ەگەر قۇبىر قايتا جارىلىپ تۇرعىندار سۋسىز قالسا، مەردىگەر كومپانيانى سوتقا بەرەمىز دەپ وتىر.

“اۋدان اكىمىنە حات جازعانبىز. «اساتايدىڭ» باسشىلارىنا جازدىق. نەگە جاسامايسىڭدار، مەرزىمى دە ءوتىپ كەتتى دەدىك. 1 ميلليارد 59 ميلليونعا الىپ وتىر. ەندى قۇبىرلار جاڭا سالىنعان عوي.  اپات بولعان جاعدايدا مەردىگەرلەردى شاقىرىپ سوتقا جۇگىنەمىز. سوتقا بەرە سالامىز. جاۋاپ بەرسىن. كەلىسىمشارت بار عوي”، – دەيدى نۇرا اۋىلى ايماعىنىڭ اكىمى سەيىتقۇل دوڭباەۆ.

ماسەلە شەشىلمەسە، مەردىگەر مەن جەرگىلىكتى بيلىكتى تۇرعىنداردىڭ ءوزى سوتقا بەرۋگە دايىن وتىر.

The Qazaq Times