Энергетика министрі Қанат Бозымбаев орынбасарының ұсталуына қатысты пікір білдірді.

Қанат Бозымбаев журналистер алдында орынбасары Ғани Сәдібековтың ұсталуына байланысты сөйлеген сөзінде: «Біздің министрліктің вице-министрі мен департамент директоры қамауға алынды. Бұл біздің ұжым мен министрлік үшін ауыр соққы болды. Дәл қазіргі жағдайда барлық сұрақтарға құзырлы органдар мен қорғаушылар (адвокаттар) жауап беруі керек. Қазір министрлікте ешқандай материал жоқ барлығын тексеруші органдар алып кеткен. Сондықтан біз ешқандай мәлімет бере алмаймыз» - деген.

Естеріңізге салайық, бұған дейін Қанат Бозымбаевтың орынбасары Ғани Сәдібековтың Щучинск-Бурабай демалыс аймағындағы көлді тазарту жұмыстарына бөлінген қаржыны «Аймақ» ЖШС мердігер ұйымның басшысымен бірге жымқырғандығы анықталған болатын. Кейіннен Астана қаласының №2 аудандық соты Ғани Сәдібеков пен Серікбай Жұмалиновты екі айға қамауға алуға шешім шығарған.

“The Qazaq Times”