شەشەنستانداعى «شىنشىل» ءجۋرناليستىڭ كۇيى

كەشە، 6 اقپان شەشەنستاندا رەسەيدىڭ «نوۆايا گازەتا» باسىلىمىنىڭ ءتىلشىسى مەن زاڭگەرىنە شابۋىل جاسالعانى حابارلاندى.

ايماق استاناسى گروزنىي قالاسىنداعى قوناق ۇيلەردىڭ بىرىندە ءبىر توپ بۇزاقى جۋرناليست ەلەنا ميلاشينا مەن ادۆوكات مارينا دۋبروۆيناعا قول كوتەرىپ، تەپكىگە العان. وقيعا اۋەسقوي بەينەجازباعا ءتۇسىرىلىپتى.

ميلاشينا مەن دۋبروۆينا گروزنىيعا بلوگەر يسلام ءنۋحانوۆتىڭ ءىسى بويىنشا سوتقا قاتىسۋ ءۇشىن بارعان. گروزنىي ورتالىعىنداعى ەليتالىق اۋدان تۋرالى بەينەجازبا ءتۇسىرىپ، Youtube-كە سالعان يسلام نۋحانوۆقا بۇعان دەيىن پوليتسيا «زاڭسىز قارۋ-جاراق ساقتادى» دەپ ايىپ تاققان. نۋحانوۆ ۆيدەوعا تۇسىرگەن ەليتالىق اۋداندا شەشەنستان باسشىسى رامزان قادىروۆتىڭ تۋىستارى مەن اينالاسىنداعى ادامدار تۇرادى.

جۋرناليست پەن ادۆوكات شابۋىلعا بايلانىستى شەشەنستان پوليتسياسىنا ارىز تۇسىرەتىنىن ايتادى.

قۇقىعى اياقاستى بولعان جۋرناليست شەشەنستانداعى ادام قۇقىعىنىڭ بۇزىلۋى تۋرالى كوپتەگەن زەرتتەۋ جاساپ، ەل  باسشىسى رامزان قادىروۆتى وتكىر سىناپ كەلەدى. سوڭعى جىلدارى شەشەنستان ادام قۇقىعى ءجيى بۇزىلىپ، ءسوز بوستاندىعىنا زور قىسىم تۇسەتىن ايماق رەتىندە كوزگە تۇسە باستادى.

“The Qazaq Times”