ۇلتتىق پانتەوندى سالۋعا استانا بيۋدجەتىنەن قانشا قارجى جۇمسالادى؟

2018 جىلى ۇلتتىق پانتەوندى سالۋعا استانا بيۋدجەتىنەن 450 ملن تەڭگە ءبولۋ قاراستىرىلعان. بۇل تۋرالى 2018-2020 جىلعا ارنالعان استانا بيۋدجەتى تۋرالى قۇجاتقا سىلتەمە جاساپ، Sputnik اقپارات اگەنتتىگى حابارلادى. 

قر نورماتيۆتىك قۇقىقتىق اكتىلەرىنىڭ اقپاراتتىق-قۇقىقتىق جۇيەسىندە جاريالانعان قۇجاتقا قاراعاندا، وسى جىلى قۇرىلىسقا 447 ملن 423 مىڭ تەڭگە جۇمسالماق.

بۇدان بۇرىن حابارلانعانداي، ۇلتتىق پانتەوننىڭ جوبا قۇنى 1,7 ملرد تەڭگەگە باعالانعان.

پانتەون اۋماعىندا "ەستەلىكتەر قابىرعاسى" مونۋمەنتى، مەموريالدار، مۋزەيلەر (حح-ءححى عاسىرداعى), سونداي-اق، اكىمشىلىك، شارۋاشىلىق جانە قوسالقى عيماراتتارورنالاسادى.

ۇلتتىق پاتەونعا قازاقستان پرەزيدەنتتەرى جانە ونىڭ وتباسى مۇشەلەرى، پرەمەر-مينيسترلەر مەن ولاردىڭ ورىنباسارلارى، پارلامەنت پالاتالارىنىڭ توراعالارى مەن ولاردىڭ ورىنباسارلارى، مەملەكەتتىك حاتشىلار، پرەزيدەنت اكىمشىلىگىنىڭ باسشىلارى، كونستيتۋتسيالىق كەڭەستىڭ توراعالارى، جوعارعى سوت، ۇلتتىق بانك توراعالارى جەرلەنەدى. سونداي-اق، پانتەون اۋماعىندا مينيسترلەر، وبلىستاردىڭ، رەسپۋبليكالىق ماڭىزى بار قالالاردىڭ اكىمدەرى، پرەزيدەنتكە تىكەلەي باعىناتىن جانە ەسەپ بەرەتىن مەملەكەتتىك ورگانداردىڭ باسشىلارى جەرلەنەدى.

بۇدان بولەك، جەرلەنەتىندەر ءتىزىمىن "حالىق قاھارمانى", "قازاقستاننىڭ ەڭبەك ەرى" اتاعىن العاندار، "التىن قىران", "وتان", "قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆ", "ەڭبەك داڭقى" وردەنىمەن ماراپاتتالعاندار، "كەڭەس وداعىنىڭ باتىرى",  "سوتسياليستىك ەڭبەك ەرى""قازاقستاننىڭ عارىشكەر-ۇشقىشى" اتانعاندار جانە پرەزيدەنت شەشىمىمەن ەرەكشە ماراپاتقا يە بولعان تۇلعالار تولىقتىرادى.

“The Qazaq Times”