فوتو: Nur.kz

ۇكىمەت ۇلتتىق پانتەون تۋرالى ەرەجەنى بەكىتتى. ەرەجەگە سايكەس، مۇندا مەملەكەتتىڭ، عىلىمنىڭ، مادەنيەتتىڭ اسا كورنەكتى قايراتكەرلەرىنىڭ، سونداي-اق قازاقستاننىڭ دامۋىنا ۇلەس قوسقان تۇلعالاردىڭ ەسىمىن ماڭگى ەستە قالدىرۋ ماقساتىندا نەگىزى قالانعان، مەموريالدىق ماڭىزى بار ساۋلەت وبەكتىسى بولىپ تابىلاتىن قايتىس (قازا) بولعان تۇلعالاردى جەرلەنەدى.

پانتەون استانانىڭ جەرگىلىكتى اتقارۋشى ورگانىنىڭ قاراماعىندا، استانا قالاسىنىڭ اۋماعىندا ورنالاسقان.

سونىمەن ەرەجە بويىنشا پانتەون اۋماعىندا مىناداي تۇلعالار جەرلەنەدى:

  •  قازاقستان رەسپۋبليكاسىنىڭ پرەزيدەنتتەرى جانە ولاردىڭ وتباسىلارىنىڭ مۇشەلەرى;
  • قازاقستان رەسپۋبليكاسىنىڭ پرەمەر-مينيسترلەرى جانە ولاردىڭ ورىنباسارلارى، قازاقستان رەسپۋبليكاسى پارلامەنتى پالاتالارىنىڭ توراعالارى جانە ولاردىڭ ورىنباسارلارى، قازاقستان رەسپۋبليكاسىنىڭ مەملەكەتتىك حاتشىلارى، قازاقستان رەسپۋبليكاسى پرەزيدەنتى اكىمشىلىگىنىڭ باسشىلارى، قازاقستان رەسپۋبليكاسى كونستيتۋتسيالىق كەڭەسىنىڭ، قازاقستان رەسپۋبليكاسى جوعارعى سوتىنىڭ جانە قازاقستان رەسپۋبليكاسى ۇلتتىق بانكىنىڭ توراعالارى;
  • مينيسترلەر، قازاقستان رەسپۋبليكاسىنىڭ پرەزيدەنتىنە تىكەلەي باعىناتىن جانە ەسەپ بەرەتىن مەملەكەتتىك ورگانداردىڭ باسشىلارى، وبلىستاردىڭ، رەسپۋبليكالىق ماڭىزى بار قالانىڭ، استانانىڭ اكىمدەرى;
  • «حالىق قاھارمانى»، «قازاقستاننىڭ ەڭبەك ەرى» اتاقتارىنا يە بولعان تۇلعالار;
  • «التىن قىران»، «وتان»، «قازاقستان رەسپۋبليكاسىنىڭ تۇڭعىش پرەزيدەنتى - ەلباسى نۇرسۇلتان نازارباەۆ»، ءۇش دارەجەلى «ەڭبەك داڭقى» وردەندەرىمەن ماراپاتتالعان ازاماتتار;
  • «كەڭەس وداعىنىڭ باتىرى»، «سوتسياليستىك ەڭبەك ەرى» اتاقتارىنا يە بولعان ازاماتتار;
  • «قازاقستاننىڭ عارىشكەر-ۇشقىشى» قۇرمەتتى اتاعىنا يە بولعان ازاماتتار;
  • قازاقستان رەسپۋبليكاسى پرەزيدەنتىنىڭ ەرەكشە شەشىمى بويىنشا باسقا دا ازاماتتار;
  • پانتەوندا جەرلەۋگە جاتاتىن تۇلعالارمەن ولاردىڭ كەيىن قايتىس بولعان جۇبايلارى جەرلەنۋى مۇمكىن.

پانتەوندا قۇلپىتاس قۇرىلىستارىن ورناتۋ جانە بەزەندىرۋ بىرىڭعاي نىساندا ورىندالادى. ءوز ەركىمەن جەرلەۋ، جانۇيالىق (رۋلىق) زيرات قۇرۋ جانە قايتا جەرلەۋ پانتەوندا جۇرگىزىلمەيدى.

وسى قاۋلى العاشقى رەسمي جاريالانعان كۇنىنەن كەيىن كۇنتىزبەلىك ون كۇن وتكەن سوڭ قولدانىسقا ەنگىزىلەدى.

ايتا كەتەيىك، 2016 جىلدىڭ مامىر ايىندا بۇرىنعى ۇلتتىق ەكونوميكا ءمينيسترى قۋاندىق بيشىمباەۆ «پانتەونعا اقشا جوق. بيىل دا، كەلەسى جىلى دا بۇل ماقساتقا قاراجات قاراستىرىلماعان»، دەگەن ەدى.

ال وسى جىلدىڭ اقپان ايىندا قارجى ءمينيسترى باقىت سۇلتانوۆ ۇلتتىق پانتەوننىڭ قۇرىلىسى باسىمدىق بەرىلگەن رەسپۋبليكالىق ينۆەستيتسيالاردىڭ تىزىمىنە ەنگىزىلگەنىن مالىمدەگەن.

“The Qazaq Times”