قىرعىزستان جوعارى كەڭەسىنىڭ دەپۋتاتى دامىربەك اسىلبەكۇلى. فوتو: Aكيرress.

الماتىدا ۇستالعان قىرعىزستان جوعارى كەڭەسىنىڭ دەپۋتاتى دامىربەك اسىلبەكۇلى قازاقستان ازاماتى بولۋى مۇمكىن.

اكي press اقپارات اگەنتتىگىنىڭ مالىمەتىنشە، قازاقستان سىرتقى ىستەر مينيسترلىگى قىرعىزستانعا اقپان ايىنىڭ 15-ءى كۇنى ۇستالعان جوعارى كەڭەس دەپۋتاتى دامىربەك اسىلبەكۇلىنىڭ قازاقستان ازاماتى ەكەندىگى جونىندە نوتا جىبەرگەن. بىراق قىرعىزستان سىرتقى ىستەر مينيسترلىگى ازىرگە بۇل اقپاراتتى راستاماعان جانە باق وكىلدەرىنىڭ جىبەرگەن ساۋالدارىنا ەشقانداي جاۋاپ قاتپاعان.

ەستەرىڭىزگە سالايىق، اقپان ايىنىڭ 15-ءى مەن 16-سى كۇندەرى الماتى، جامبىل جانە وڭتۇستىك قازاقستان وبلىستارىندا جۇرگىزىلگەن ارنايى وپەراتسيا بارىسىندا قىرعىزستان جوعارى كەڭەسىنىڭ دەپۋتاتى دامىربەك اسىلبەكۇلى ۇستالعان. كەيىننەن سوت شەشىمى بويىنشا ونىڭ ۇستىنەن قر قىلمىستىق كودەكسىنىڭ 234 بابىنىڭ 3 تارماعى جانە 264 بابىنىڭ 2 تارماعى بويىنشا قىلمىستىق ءىس قوزعالىپ، ەكى ايعا قاماۋعا الىنعان بولاتىن.

“The Qazaq Times”