ابايدىڭ ەكى ايەلىنەن ون بالا – جەتى ۇل، ءۇش قىز بولعان. بايبىشەسى (الشىنباي ءبيدىڭ نەمەرە قىزى) ءدىلدادان: تۇڭعىشى اقىلباي 1861 جىلى تۋعان. اقىلبايدان: الىمقۇل، اۋباكىر، يسرايل اتتى ءۇش ۇل، ساعدات، پاكيزات، رۋحيا ەسىمدى ءۇش قىز بولعان.

ەكىنشى بالاسى اكىمباي. ول جەتى جاسىندا ولگەن. ءۇشىنشى بالاسى ءابدىراحمان(ابىش) (1869 – 1895). ونىڭ سوڭعى بىتىرگەن وقۋ ورنى - پەتەربۋرگتاعى ميحايلوۆسكي ارتيللەريا ۋچيلليششەسى. ول ۆەرنيدە (الماتى) قىزىمەت ىستەپ ءجۇرىپ، 26 جاسىندا اۋرۋدان قايتىس بولادى. ابىشتەن راحيلا اتتى جالعىز قىز قالعان. ءتورتىنشى بالاسى  ماعاۋيا (1870 – 1904 ). ونىڭ بالالارى : ۋاليسا، قۇتايبا، بابر، جاعىپار جانە كاميلا، وسى بەسەۋى. بەسىنشى بالاسى گۇلبادان. ( 1872 – 1932 ), التىنشى بالاسى رايحان، 1871 جىلى تۋىلسا كەرەك. 1896 جىلدارى قايتىس بولعان.

ابايدىڭ ەكىنشى ايەلى ايگەرىمنەن تۋعان بالالارى : تۇراعۇل (تۇراش) (1875 – 1934 ). اباي بالالارى اراسىندا ءبىراز ءومىر سۇرگەنى وسى كىسى. تۇراعۇلدىڭ اقىليا (اقىش), جابىرەيىل، ءزۇبايىر جانە ماكەن (قىز) دەگەن بالالارى بولعان. ەكىنشى بالاسى ميكايلدان (مەكەش) قۇزايىر، الىشەر (قىلكەن) دەگەن بالالار تۋعان. ءۇشىنشى بالاسى ىزكايىل، ونىڭ توقتاش اتتى بالاسى ەكىنشى دۇنيە سوعىسى كەزىندە قايتىس بولعان. ءتورتىنشى بالاسى كەنجە (قىز).

قوسىپ ايتا كەتەيىك، اباي ۇرپاقتارىنان بەس ازامات وتان سوعىسى مايدانىندا ولگەن. ولار : 1. ماعاۋيانىڭ قۇتايباسىنان تۋعان بەرەكەحان; 2. ماعاۋيانىڭ جاعىپارىنان تۋعان جوشىحان; 3. ابايدىڭ ميكايلىنان تۋعان قۇزايىر; 4. ابايدىڭ ىزكايىلىنەن تۋعان توقتاش; 5. ابايدىڭ ميكايلىنان تۋعان الىشەر (قىلكەن).

اقىننىڭ بۇل كەزدە كوزى ءتىرى جۇرگەن ۇرپاقتارى (1987 جىلعا دەيىن) : 1. ماعاۋيانىڭ جاعىپارىنان تۋعان قىز يشاعى وتان سوعىسىندا اۆياتسيا شەبىندە بولىپ، سوعىسقا قاتىسقان. ونان سوڭ سۋ شارۋاشىلىعى مينيسترلىگىندە جاۋاپتى قىزمەت ىستەگەن، الماتىدا تۇرادى.  2. ماعاۋيانىڭ جاعىپارىنان تۋعان قىز عازەل، الماتىدا، شاكەن ايمانوۆ اتىنداعى مۋزەيدىڭ باستىعى. 3. اقىلبايدىڭ باعفۇرىنان تۋعان ءۇش ۇلدىڭ ءبىرى – ايدار، ول ماڭعىستاۋ وبىلىسىندا اۋىل شارۋاشىلىعى ماماندىعى بويىنشا جۇمىس ىستەيدى، ونىڭ اكەسى باعفۇر م. اۋەزوۆپەن جاقسى ارالاسقان. 4. تۇراعۇلدىڭ جابىرايىلىنەن تۋعان الپاش (وسپانوۆ دەلىنەدى)  الماتىدا تۇرادى. سوعىستا جارالانعان.  5. تۇراعۇلدىڭ قىزى اقىليا (اقىش) قازىر الماتىدا تۇرادى. ابايدىڭ ءتىرى كەزىندە تۋعان.  6. ابايدىڭ اقىلبايىنان تۋعان يسرايىلدىڭ قىزدارى – ءنازيپا، كۇلزيپا دەگەن كىسىلەر زايساندا تۇرادى.

اباي ۇرپاقتارى 30 جىلداردىڭ الدى-ارتىندا تۇگەل دەرلىك قۋعىن-سۇرگىنگە ۇشىراپ، ايانىشتى تاعدىرعا تاپ بولعان. ولاردىڭ اراسىندا قولداۋ كورىپ، تاربيەلەنسە، جاقسى اقىن شىعاتىن دارىندىلار دا بولعان كورىنەدى، ماسەلەن، اۋباكىر اقىلبايۇلى سونىڭ ءبىرى. ول سۋىرىپ سالما ءارى جازبا اقىن بولعان. «بولعاندا اكەم اباي، ءوزىم جامان، قۋادى جۋانسىڭ دەپ مىنا زامان» دەپ ءبىر كەتسە، ەندى بىردە :

«دۇنيە كوزىم جەتتى تايعاعىڭا،

كەدەيلىك – ەتىك جاماۋ – ايعاعى دا،

شاپان، تون، تىماق، جەلەت، تاقيا جوق،

تارتامىن جالعىز بەشپەت قاي جاعىما؟!» - دەگەن جولداردى جاي وتىرىپ ايتا سالعان. 1930 جىلداردىڭ باس كەزىندە ونىڭ ءۇيىن ءۇرجار دەگەن جەرگە كوشىرىپ تاستاعاندا، اتا قونىس شىڭعىستاۋدى ساعىنىپ :

« شىڭعىستاۋ قالعانىڭ با ەندى جات بوپ،

ءبىر ىزدەپ بارا المادىم استىمدا ات جوق.

سايالاپ بيىگىڭمەن كولەڭكەڭە،

شىعاتىن كۇن بولار ما، كوڭىل شات بوپ.

. . .

جەتى ەل كەپ بىزدەن بۇرىن، جەتى ەل كەتكەن،

قالماقتى ماماي قۋىپ ورىن تەپكەن.

بايلاۋسىز، تياناقسىز جاراتىلىس،

بىزگە دە بوساتۋعا ۋاقىت جەتكەن»، - دەپ جازعان.

اۋباكىر «ماماي باتىر» دەگەن داستان جازدى. ول شىعارعان ءان دە بار ەكەن.  جاڭاعى ەكى شۋماق ولەڭ بالكىم ونىڭ «ماماي باتىر» داستانىنان ەل ەسىندە قالعانى بولسا كەرەك. اۋباكىر 1934 جىلى جوقشىلىق، اۋىر تۇرمىس جاعىدايىندا دۇنيە سالادى. شاكارىمنىڭ ۇلى قابىش (ايعانشا دەگەن ايەلىنەن تۋعان) سول جىلدار : «اتا تۋىس وزعانبىز، توعىز اتا تولعاندا، تۋ-تالاقاي توزعانبىز» دەپتى. وسى جولداردىڭ ءوزى-اق ابايدىڭ اتاقتى اتا-تەگى تالكەككە تۇسكەن كەيىنگى ۇرپاقتار تاعدىرىن انىق كورسەتكەندەي. (اۋباكىردىڭ بۇل ولەڭدەرى نيازبەك الداجاروۆتىڭ جازعان ەستەلىگىنەن الىندى، «جۇلدىز»  1992 جىلعى 1- سان).

اباي ۇرپاقتارىن نەمەرەلەرىنە دەيىن اتاپ وتتىك، تولىق بولماۋى مۇمكىن. قىزدان تۋعان جيەندەرىنە توقتالمادىق.

"The Qazaq Times"