فوتو: loda.gov.ua

2018 جىلى "بيزنەستىڭ جول كارتاسى-2020" باعدارلاماسى اياسىندا بيزنەستى دامىتۋ جانە قولداۋعا 38,8 ملرد تەڭگە بولىنەدى. بۇل تۋرالى قر ۇلتتىق ەكونوميكا ءمينيسترى تيمۋر سۇلەيمەنوۆ مالىمدەدى. 

"2018 جىلى "بيزنەستىڭ جول كارتاسى-2020" باعدارلاماسى اياسىندا 38,8 ملرد تەڭگە ءبولۋ قاراستىرىلعان. سۋبسيديا، كرەديتكە كەپىلدىك بەرۋ جانە مەملەكەتتىك گرانتتاردى بەرۋگە 30 ملرد تەڭگە بولىنەدى. بۇدان باسقا جاڭا جوبالاردا بيزنەس سۇرانىسىن قاناعاتتاندىرۋ ءۇشىن مينيسترلىك 10 ءوڭىر بويىنشا 12,2 ملرد تەڭگەگە بيۋدجەتتىك ءوتىنىم دايىندادى", - دەدى سۇلەيمەنوۆ بۇگىن ۇكىمەت وتىرىسىندا.

مينيسترلىكتىڭ ەسەبىنشە، اقمولا وبلىسىنىڭ بيزنەسمەندەرى وسى جىلى 1,8 ملرد تەڭگە، اقتوبە وبلىسى - 1,3 ملرد تەڭگە، اتىراۋ - 589 ملن تەڭگە، جامبىل وبلىسى - 1,2 ملرد تەڭگە، باتىس قازاقستان وبلىسى - 1,3 ملرد تەڭگە، قاراعاندى - 1 ملرد تەڭگە، ماڭعىستاۋ وبلىسى - 854 ملن تەڭگە، پاۆلودار وبلىسى - 1 ملرد تەڭگە، سولتۇستىك قازاقستان - 1,4 ملرد تەڭگە، وڭتۇستىك قازاقستان وبلىسى - 1,5 ملرد تەڭگە الادى.

سونداي-اق، سۇلەيمەنوۆ  بۇقارالىق كاسىپكەرلىكتىڭ باعدارلاماسىن جۇزەگە اسىرۋ كەزىندە كاسىپكەرلەر تاپ بولعان پروبلەمالاردى اتاپ ءوتتى.

"باعدارلامانىڭ بۇدان بۇرىنعى شارتتارىنا سايكەس، بيۋدجەتتىك نەسيە ەسەبىنەن جىلجىمايتىن مۇلىك جانە كوممەرتسيالىق ەمەس ماقساتتا جەردى ساتىپ الۋعا تىيىم سالىنعان. (...)ەندى ولار جىلجىمايتىن مۇلىكتى جانە جەردى كوممەرتسيالىق ەمەس ماقساتتا ساتىپ الۋ قۇقىعىنا بىر جىلدا مىندەتى تۇردە وزگەرتۋ شارتىمەن يە بولا الادى. ەگەر شارت ورىندالماعان جاعدايدا قارجى ميكروقارجى ۇيىمدارى مەن بانكتەر تاراپىنان وتەلەدى. قابىلدانعان وزگەرىستەر باعدارلاماعا ءوزىن-ءوزى جۇمىسپەن قامتىعان جانە جۇمىسسىز حالىقتى تارتۋعا مۇمكىندىك بەرەدى دەپ ويلايمىز", - دەدى مينيستر.

“The Qazaq Times”