رەتسەسسيا ەففەكتىسى: الماتىدا جارتى جىلدا 8 مىڭ كاسىپكەردىڭ جۇمىسى توقتاپ، نارىققا 6 مىڭ كاسىپكەر قوسىلعان

بۇگىن الماتى قالاسى وڭىرلىك كوممۋنيكاتسيالار قىزمەتىندە وتكەن «شاعىن جانە ورتا بيزنەستى قولداۋ شارالارى» تاقىرىبىنداعى ونلاين-بريفينگتە  كاسىپكەرلەر پالاتاسىنىڭ ديرەكتورى ناريمان ابىلشايىقوۆ الماتىلىق بيزنەس نارىعىنداعى «ەرەكشە قۇبىلىس» تۋرالى ءسوز ەتتى.

«ساۋدا-ساتتىق، تۋريزم، قوعامدىق تاماقتانۋ ورىندارى جانە قوناق ءۇي كاسىپتەرىن سۋبسيديالاۋ قولعا الىندى. وسى ورايدا كاسىپكەرلىكتى قولداۋ ماقساتىندا الماتى قالاسىندا قاراپايىم زاتتار ەكونوميكاسى باعدارلاماسى اياسىندا 22 قىركۇيەككە دەيىن 94 ملن تەڭگەگە 55 جوبا قارجىلاندىرىلدى. بۇل ارى قاراي جالعاساتىن بولادى. سونىمەن قوسا، قالا اكىمدىگىنىڭ تاپسىرماسى بويىنشا وڭىرلىك پالاتا بىرىگىپ، ارنايى كوممۋنيكاتور ىسكە قوسىلدى. رەسۋرسقا 12 مىڭنان استام تاۋار ءتۇرىن وندىرەتىن قالانىڭ 512 كاسىپكەر كىرگەن. اتامەكەن  قۇزىرەتىندەگى ارناۋلى سەرتيفيكاتتى العاندار قاتارى بىلتىرعا قاراعاندا 30-35%-عا ارتىپ وتىر. بۇل وڭ وزگەرىس. كاسىپ باستاۋعا ىنتالى ازاماتتارعا 8 اۋداندا كاسىپكەرلەرگە قىزمەت كورسەتۋ ورتالىعىندا تەگىن كەڭەس الا الادى. ماسەلەن، مۇندا بۋحگالتەريا جانە ستاتيستيكالىق ەسەپكە، زاڭ سالاسى مەن ماركەتينگتىك، مەملەكەتتىك ساتىپ الۋ باعىتىندا كومەك كورسەتىلەدى»، – دەيدى ابىلشايىقوۆ.

الماتى قالاسىنداعى كاسىپكەرلەر پالاتاسىنىڭ باسشىسىنىڭ مالىمەتىنشە، بيىل كولەمى 4,153 ملرد تەڭگە بيزنەس جوسپار ازىرلەنگەن. ونىڭ ىشىندە ەكىنشى دەڭگەيلى بانكتەردەن 801 ملن تەڭگە سوماسىنا 64 جوبا ماقۇلدانىپتى. باستاۋ بيزنەس كۋرسى  شەڭبەرىندە ماۋسىم ايىنان باستاپ 2287 تىڭداۋشى اياقتاپ، ولارعا ارقايسى 200اەك كولەمىندە 1705 گرانت بولىنگەن. بۇگىنگە دەيىن 320 تىڭداۋشى ءوز كاسىبىن اشقان كورىنەدى.

اتامەكەن ءموبيلدى جۇمىسپەن قامتۋعا ارنالعان 12 ورتالىققا جۇگىنگەن 65 مىڭنان استام ادامنىڭ نەبارى 2895-ءى جۇمىسقا ورنالاسقان. ياعني 22-دەن ءبىر بولىگى نەمەسە 4,4%-ى عانا جۇمىس تاپقان.

QT رەداكتسياسىنىڭ ءجۋرناليسى قويعان سۇراققا «تج كەزىندە كاسىپكەرلەردىڭ 60-70%-ى، 60-70 مىڭى جۇمىسىن توقتاتتى. ستاتيستيكاعا سۇيەنسەك، بايلانىس جانە اقپارات سالاسىنان وزگە بارلىق باعىتتاردا تەرىس ديناميكا كورىنىپ وتىر. سوندىقتان رەتسەسسيا دەۋگە كەلەدى. سالىق تولەۋ ماسەلەسى بويىنشا بيۋدجەتكە 30-35 ملرد تەڭگە قارجى تۇسپەگەن»، – دەپ جاۋاپ بەردى پالاتا باسشىسى.

8 مىڭنان استام كاسىپكەر ءالى كۇنگە دەيىن جۇمىسىن جانداندىرا الماي وتىر.  تامىز ايىنىڭ باسىنداعى ستاتيستيكاعا سەنسەك،  قالا اۋماعىندا زاڭدى تىركەلگەن 201 مىڭ كاسىپكەر جۇمىس ىستەيدى.

«بىراق كارانتين شارالارىنا قاراماستان، ءساۋىر ايىنان باستاپ كاسىپكەرلەر سانى تاعى 6 مىڭعا ءوسىپ وتىر. نەلىكتەن بۇلاي بولعانىن ءوزىمىز ءالى دە تۇسىنبەي وتىرمىز. جارتى جىلدا 2,5%-عا ارتقان كاسىپكەرلەردىڭ ارتۋ سەبەبىن، سالالارىن زەردەلەپ-تالداپ جاتىرمىز»، – دەدى ول.

"The Qazaq Times"