اقش ۇكىمەتىنىڭ بوسقىندار ساياساتى ءوز ناتيجەسىن بەرۋدە. فوتو: WSJ.

ترامپ ۇكىمەتى دۇيسەنبى كۇنى اقش ۇلتتىق قاۋىپسىزدىگىنە قاتەر توندىرەدى دەپ قارالعان 11 ەلدىڭ بوسقىندارىنا قاتىستى ساياساتتى قالپىنا كەلتىردى جانە بوسقىنداردى شەكتەۋ ساياساتىن كۇشەيتە ءتۇستى. بۇل تۋرالى «WSJ» باسىلىمى حابارلادى.

قازىر اقش-قا كىرەتىن بوسقىندار سانى ازايىپ كەتكەن، ونىڭ باستى سەبەبى ترامپ ۇكىمەتى شىعارعان بوسقىنداردى شەكتەۋ ساياساتىمەن قوسا، بوسقىنداردىڭ كىرۋ تالاپتارىن تولىقتاي توقتاتتى جانە يراك، ءسۇريا بوسقىندارىن ەلدەن شىعاردى. ترامپ بوسقىندارعا قارسى قاتاڭ ساياساتتى بىلتىر جازدان باستاپ جۇزەگە اسىردى. ال كۇز ايلارىندا بۇل شارانى ءتىپتى دە كۇشەيتتى، كوپتەگەن ەلدەردەگى بوسقىنداردى قابىلداۋ وتىنىشتەرىن تويتاردى. 11 ەلدىڭ ازاماتتارىنا قۇراما شتاتقا كىرۋىنە توسقاۋىل قويدى.

سوڭعى جىلداردان بەرى اقش-تاعى بوسقىنداردىڭ 40 پايىزى ترامپ ۇكىمەتى شەكتەۋ قويعان 11 ەلدەن كەلگەن. ال بىلتىر 1 قازاننان قازىرگە دەيىن بۇل كورسەتكىش 5 پايىزعا تومەندەگەن. بۇدان سىرت مۇسىلمان بوسقىندار سانى بۇرىنعى 40 پايىزدان 14 پايىزعا ازايعان.

كەيبىر ساراپشىلاردىڭ ايتۋىنشا، بۇل كورسەتكىشتەر ترامپتىڭ مۇسىلمان ەلدەرىنەن كەلەتىن بوسقىنداردى شەكتەۋ تەبىنىن ءتىپتى دە كۇشەيتە ءتۇسۋى مۇمكىن. مۇسىلمان بوسقىنداردى شەكتەۋ - ترامپتىڭ سايلاۋ الدىندا بەرگەن ۋادەسىنىڭ ءبىرى. دەگەنمەن، قۇراما شتاتتىڭ جوعارى لاۋازىمدىلارى بوسقىنداردى شەكتەۋ شاراسى دىنمەن قاتىسى جوق ەكەنىن العا تارتۋدا.

اقپارات كوزدەرىنىڭ ايتۋىنشا، اتالعان 11 ەلگە يران، يراك، سومالي جانە ءسۇريا سىندى بوسقىندار سانى كوپ ەلدەر، بۇدان تىس مىسىر، ليبيا (ليۆيا), مالي، سولتۇستىك كورەيا، وڭتۇستىك سۋدان، سۋدان جانە يەمەن قاتارلى ەلدەر كىرەدى. بۇل ءتىزىم قاتارىنا ترامپتىڭ يناۋگۋراتسياسىنا دەيىن «ۇلتتىق قاۋىپسىزدىككە قاتەر ءتوندىرۋى مۇمكىن» ەلدەر تىزىمىندەگى بىرنەشە ەل دە كىرەدى.

اقش ىشكى قاۋىپسىزدىك دەپارتامەنتىنىڭ كەشە جاساعان مالىمدەمەسىندە، ترامپ ۇكىمەتىنەن بۇل ەلدەردىڭ ءتىزىمىن ءجيى-ءجيى باعالاپ، جاڭارتىپ تۇرادى دەپ ۇمىتتەنەتىنىن ءبىلدىردى.

“The Qazaq Times”