ترامپ: يادرولىق قارۋ پايدالانبايمىز، بىراق ەڭ وزىق يادرولىق قارۋعا يە بولامىز

وساكا قالاسىندا وتكەن «ۇلكەن جيىرمالىق» سامميتىنەن كەيىن، اقش پرەزيدەنتى دونالد ترامپ وڭتۇستىك كورەيادا ساپاردا بولدى. بۇل ساپارىندا ول سولتۇستىك كورەيا شەكاراسىنان ءوتىپ، كحدر باسشىسى كيم جوڭ ۋنمەن كەزدەستى. سونداي-اق، وڭتۇستىك كورەياداعى اقش اسكەري كۇشتەرىمەن دە كەزدەسۋ وتكىزدى.

پرەزيدەنت ترامپ وڭتۇستىك كورەياداعى امەريكالىق اسكەري كۇشتەرمەن كەزدەسۋ كەزىندە اقش-تىڭ يادرولىق ارسەنالى تۋرالى كوبىرەك توقتالعان. «ءبىز قازىرگى كەزدە ەلدىڭ يادرولىق ارسەنالىن جاڭارتۋعا، دامىتۋعا بارىنشا كۇش سالىپ جاتىرمىز. ءبىز ولاردى ەشقاشان پايدالانعىمىز كەلمەيدى، بىراق ەڭ وزىق يادرولىق قارۋعا يە بولامىز»، – دەگەن ترامپ. ول جانە اقش ارمياسى قۋاتتى كۇشكە يە بولىپ يادرولىق قارۋدى قولدانباۋعا كەپىل بولۋى كەرەك دەگەن ويىن دا ايتقان.

ترامپتىڭ سايلاۋ الدى ۋادەلەرىنىڭ ءبىرى – ەلدىڭ يادرولىق قۋاتىن دامىتۋ بولاتىن. ايتقانىنداي، پرەزيدەنت بولا سالىسىمەن قول قويعان العاشقى بۇيرىقتارىنىڭ ءبىرى يادرولىق ارسەنالدى دامىتۋ تۋرالى شەشىم بولدى. ساراپشىلاردىڭ بولجاۋىنشا، اقش-تىڭ يادرولىق ارسەنالىن  جاڭارتۋ ترامپ ۇكىمەتى كەزىندە تولىق اياقتالماۋى مۇمكنى. الايدا، بۇل باستاما ارقىلى ەلدىڭ يادرولىق قۋاتى ارتا تۇسپەك.

اقش-تىڭ يادرولىق ارسەنالى

مالىمەتتەرگە جۇگىنەتىن بولساق، امەريكا قۇراما شتاتتارىندا 3800-دەن استام يادرولىق وق تۇمسىق بار. ولاردىڭ اراسىندا 1750 داناسى بالليستيكالىق جانە ورتا-قىسقا قاشىقتىقتاعى تاسىمالداۋشى زىمىراندارعا ورناتىلعان. ال، قالعانى يادرولىق رەزەرۆ رەتىندە ساقتالۋدا. اقش تۇركيا، بەلگيا، يتاليا، گەرمانيا جانە گوللانديا قاتارلى ەلدەردەگى اسكەري بازالارىندا B-61 اتوم بومباسىنىڭ 150 داناسىن ورنالاستىرىلعان.

2019 جىلى اقش يادرولىق ارسەنالىن دامىتۋعا 24 ملرد دوللار قارجى بولىنگەن. بۇلار بيىلعى جىلدان باستاپ وتكىزىلەتىن يادرولىق سىناقتارعا جۇمسالماق.

“The Qazaq Times”