قۇراما شتات پرەزيدەنتى دونالد ترامپ وتكەن جۇمادا جاساعان مالىمدەمەسىندە، اقش-قىتاي اراسىندا ديالوگتاردىڭ بولىپ جاتقانىن، كەلىسىمنىڭ كەيبىر مازمۇندارىنا قول جەتكىزۋگە جاقىن قالعانىن راستادى. الايدا، وسىعان دەيىن كەيبىر امەريكالىق اقپارات قۇرالدارىنىڭ تاراتقان، اقش-قىتاي اراسىندا ساۋدا كەلىسىم جاسالىپ بولعانى تۋرالى حاباردى جوققا شىعاردى.  

ترامپ جۇما كۇنگى سوزىندە: «قىتاي تارابى بۇل كەلىسىمگە قول جەتكىزسەك دەپ ۇمىتتەنەدى. سەبەبى، ءبىز وسى شارالاردى باستاعاننان بەرى قىتاي ەكونوميكاسىنىڭ قۇلدىراعانىن ولار ءبىلۋى كەرەك»، – دەگەن. ول جانە: «مەن كەشە شي جينپيڭ مىرزامەن تەلەفوندا سويلەستىم. ولار كەلىسىمگە قول جەتكىزۋدەن كوبىرەك ۇمىتتەنىپ وتىر. مەنشە ءبىز قىتايمەن كەلىسىمگە قول جەتكىزەمىز. بۇل بارلىق ادام ءۇشىن دە ءادىل كەلىسىم بولادى دەپ ويلايمىن. بىراق، قۇراما شتاتتار ءۇشىن ءتىپتى دە جاقسى كەلىسىم بولماق»، – دەدى.

بەيسەنبى كۇنى قىتاي باسشىسى شي جينپيڭ مەن اقش پرەزيدەنتى ترامپ تەلەفون ارقىلى سويلەستى جانە تاراپتار وسى ايدىڭ سوڭىنداعى «ۇلكەن جيىرمالىق» (G20) ءسامميتى كەزىندە كەزدەسۋگە كەلىسكەن. ال جۇما كۇنى تۇستەن بۇرىن Bloomberg اقپاراتتىق قىزمەتى: «ترامپ جانە ونىڭ ۇكىمەتى قىتايمەن ساۋدا كەلىسىمىنە كەلىپ ۇلگەردى»، – دەگەن اقپارات تاراتتى.  الايدا، وسىدان كەيىن CNBC ترامپ ۇكىمەتىنىڭ لاۋازىمدىلارىنا سىلتەمە جاساي وتىرىپ، بۇل مالىمەتتى جوققا شىعارعان، ءارى اقش-قىتاي اراسىندا ۇزاققا جالعاساتىن كەلىسىمدەر ءجۇرىپ جاتقانىن ايتقان.

دۇيسەنبى كۇنى، Bloomberg وسى ماسەلە بويىنشا ءۇش بىردەي لاۋازىمدى قىزمەتكەردىڭ مالىمەتىنە سىلتەمە جاساي وتىرىپ،  ەگەر «ترامپ-شي كەزدەسۋىندە» ساۋدا سوعىسى بويىنشا ىمىراعا كەلمەسە، قۇراما شتات جەلتوقساننان باستاپ بارلىق قىتايلىق تاۋارلارعا جوعارى تاريف ەنگىزەتىنىن حابارلاعان بولاتىن. بۇل جاڭالىق اقش قور نارعىندا ءدۇمپۋ تۋدىرعان.

جۇما كۇنى تۇسكەن كەيىن اق ۇيدە وتكەن ءباسپاسوز جينالىسىندا، ترامپ «ۇلكەن جيىرمالىق» ءسامميتى كەزىندە قىتاي باسشىسىمەن كەزدەسۋگە كەلىسكەنىن راستادى. ءار بۇل سويلەسۋلەردىڭ تابىستى بولعانىن، قىتاي ۇكىمەتى اقش-پەن كەلىسسوزگە كەلە الماسا وزدەرىنىڭ تاريفتەر سوققىسىنا تاپ بولاتىنىن ءتۇسىنىپ وتىرعانىن ايتتى. ترامپ جانە قازىرگى ۋاقىتتا قىتايدان كىرەتىن 250 ملرد اقش دوللارى كولەمىندەگى تاۋارلارعا 25 پايىزدىق تاريف ەنگىزۋدىڭ ناتيجەسى جاقسى بولعانىن، كەلىسىم بولماي جاتسا قىتايدان كىرەتىن تاۋارلاردىڭ بارلىعىنا تاريفتەر ەنگىزىلەتىنىن ايتادى.

“The Qazaq Times”