قازاقستاندىق ستۋدەنتتەر بولاشاقتا جالاقىلارىنىڭ كوپ بولاتىنىنا سەنىمسىز

قازاقستان "جالاقى دەڭگەيى تومەن بولادى" دەپ ەسەپتەلەتىن ەلدەر رەيتينگىنە كىردى. بۇل تۋرالى LS سايتى حابارلادى. 

Universum اگەنتتىگىنىڭ "تالانتتار قۇنى" دەپ اتالاتىن جىل سايىنعى ەسەبىنىڭ قورىتىندىسىنا سەنسەك، قازاقستاندىق ستۋدەنتتەر ەلدە وزدەرىنىڭ جالاقىسى تومەن بولادى دەپ ەسەپتەيدى ەكەن. مىسالى بيزنەس سالاسىنداعى وكىلدەرىنىڭ بولجامىنشا(ەكونوميكا، قارجى جانە ت.ب.), ەڭبەكاقىلارى جىلىنا 7,6 مىڭ دوللار كولەمىندە بولۋى مۇمكىن. بۇل شامامەن جىلىنا 2,5 ملن تەڭگەنى، ايىنا 208 مىڭ تەڭگەنى (1 دوللار 325,2 تەڭگەمەن ەسەپتەلدى) قۇرايدى. ال عىلىم، تەحنولوگيا، ينجەنەريا جانە ماتەماتيكا سالاسىنىڭ ماماندارى بولاشاقتا وزدەرىنىڭ جالاقىسى جىلىنا 8,4 مىڭ دوللاردان ءسال جوعارى بولادى دەپ ەسەپتەيدى. تەڭگەگە شاققاندا جىلىنا 2,7 ملن تەڭگە نەمەسە ايىنا 227 مىڭ تەڭگە.

دەسەك تە بۇل - قازاقستان كىرەتىن شىعىس ەۋروپامەن سالىستىرعاندا ەڭ تومەنگى كورسەتكىش. كورشى رەسەيدىڭ وزىندە بولاشاق مامانداردىڭ بولجالدى كىرىسى جىلىنا 11 مىڭ دوللاردى قۇرايدى.

ال ەڭ جوعارى جالاقى الامىز دەيتىندەر - شۆەيتساريا ستۋدەنتتەرى. ولار مامان رەتىندە وزدەرىنىڭ كىرىسى جىلىنا 74,4-75,3 مىڭ دوللار بولاتىنىنا ءۇمىتتى.  امەريكالىقتار بولسا "جىلىنا 56 مىڭ دوللاردان 59,5 مىڭ دوللارعا دەيىنگى جالاقى الامىز" دەپ ەسەپتەيدى.

Universum اگەنتتىگى جۇرگىزگەن ساۋالناماعا دامىعان جانە دامۋشى ەلدەردى قوسا العاندا 29 مەملەكەتتەن 500 مىڭنان اسا ستۋدەنت قاتىسقان.

ايتا كەتەيىك، قازىرگى كەزدە قازاقستاندا ورتاشا اتاۋلى ايلىق جالاقى - 168 220 مىڭ تەڭگە. ال بۇل جوعارىداعى قازاقستاندىق ستۋدەنتتەردىڭ بولجامىنان 20-26 پايىزعا تومەن.

“The Qazaq Times”