فاكتچەك | قاراپايىم مۇعالىم مەن دارىگەردىڭ جالاقىسى 1000$ ما؟ – ساياساتتانۋشى سايروۆ

«Nur Otan» پارتياسىنىڭ مۇشەسى، cاياساتتانۋشى ەرلان سايروۆتىڭ 29 قاراشاداعى «نەگە؟» قوعامدىق-ساياسي توك-شوۋىنىڭ كەزەكتى شىعارىلىمىندا ايتقان دەرەگىن تەكسەرىپ كورەمىز.

«سايلاۋدى قالاي ءادىل وتكىزۋگە بولادى؟» تاقىرىبىندا وتكەن باعدارلامانىڭ بۇل جولعى شىعارىلىمىنىڭ 34.20 حرونوسىندا اقورداشىل ساياساتتانۋشى سايروۆ «قاراپايىم مۇعالىم-دارىگەردىڭ ورتاشا جالاقىسىنا» بايلانىستى «ارمان» دەرەك كەلتىردى.

«ءبىز ءبىزدىڭ ەلدىڭ مۇعالىمىنىڭ، دارىگەرىنىڭ ءرولىن ارتتىردىق، ءيا... قازىر قازاقستاندا دارىگەردىڭ جالاقىسى 1000 (اقش نۇسقاسىندا ايتۋى مۇمكىن – QT تۇسپالى) دوللاردان اسىپ وتىر، مۇعالىمنىڭ جالاقىسى 1000 دوللارعا جاقىندادى. مەنىڭ اعام دارىگەر، اپكەم مۇعالىم. ولار قاراپايىم دارىگەر، قاراپايىم مۇعالىم. ەكەۋى دە ەشقانداي باستىق ەمەس. ونىڭ بارلىعىن بيلىك ىستەپ وتىر»، – دەدى ول بيلىك پارتياسىنىڭ جۇرگىزىپ وتىرعان ساياساتىن ماقتاۋعا دالەل-ارگۋمەنت رەتىندە كەلتىرىپ.

پرايمەريزگە قاتىسپاي-اق، پارتيا كوسەمى ن.نازارباەۆتىڭ تاڭداۋى تۇسكەندەر ىلىگەتىن ورتالىق-پارتيالىق كۆوتاعا تيەسىلى 49 كانديداتتىڭ ءبىرى رەتىندە ماجىلىسكە دەپۋاتتاتتىقتان دامەلى ەرلان ءسايروۆتىڭ سوزىنشە، «ەشقانداي باستىق ەمەس» مۇعالىم مەن دارىگەر 422-429 مىڭ (قاراششا جانە  ايىنداعى ورتاشا ەسەپ – KASE / QT) تەڭگە توڭىرەگىندە جالاقى الادى. بىلدەي ءبىر ەۋرازيالىق ينتەگراتسيا ينستيتۋتىنىڭ ديرەكتورى قىزمەتىند اتقاراتىن ساراپشى بۇل قاراپايىم مامانداردىڭ تابىسى ەكەنىن ايتادى.

ۇكىم: جالعان

بۇل دەرەكتىڭ راس-وتىرىگىن انىقتاۋ ماقساتىندا ۇلتتىق ەكونوميكا مينيسترلىگىنە قاراستى ستاتيستيكا كوميتەتىنىڭ ەڭ سوڭعى دەرەكتەرىن اقتارىپ كوردىك.

ستراتەگيالىق جوسپارلاۋ جانە رەفورمالار اگەنتتىگى ۇلتتىق ستاتيستيكا بيۋروسىنىڭ  سوڭعى مالىمەتىنشە, قازاقستاننىڭ ءبىلىم بەرۋ سالاسىندا 978 مىڭعا جۋىق، دەنساۋلىق ساقتاۋ سالاسىندا 421 مىڭنان استام قىزمەتكەر بار.

«ەڭبەك جانە جۇمىسپەن قامتۋ ستاتيستيكاسى» 17-سەرياسىنداعى دەرەككە سايكەس، ەلدەگى ورتاشا اتاۋلى ايلىق جالاقى 204 330 تەڭگە كولەمىندە.  رەسپۋبليكا دەڭگەيىندە پەداگوگيكا سالاسىنداعى جالاقى 147 083 تەڭگە، ال دەنساۋلىق ساقتاۋ سالاسىنداعى اي سايىنعى ورتاشا تابىس  182 104 تەڭگەگە تۇراقتاعان. دەمەك بۇگىنگى ۆاليۋتا باعىمى نەگىزىندە اتالعان سالا ماماندارىنىڭ ورتاشا اتاۋلى جالاقىسى 350-430 دوللار شاماسىندا: پەداگوگ-قىزمەتكەرلەر 348$, مەدقىزمەتكەرلەر 431$. ساراپشى قازاقستان كولەمىندە تەلىپ ايتقان كورسەتكىشتەن الدەقايدا از.

ساياساتتانۋشىنىڭ استانادا تۇراتىنىن ەسكەرىپ، ورتاشا جالاقى جاعىنان اتىراۋ وڭىرىنەن كەيىنگى ەكىنشى ورىندى يەلەنەتىن ەلورداداعى كورسەتكىشتەرگە ءۇڭىلىپ كورەلىك. ناقتىراق ايتساق، استاناداعى 47 مىڭداي پەداگوگتىڭ بارلىعىن بىرگە قاراستىرعاندا ارقايسىنا اتاۋلى جالاقى مولشەرى 239 290 تەڭگە سومماسىندا شىعادى. ەلوردالىق دەنساۋلىق ساقتاۋ جانە الەۋمەتتىك قىزمەتكەرلەردىڭ ورتاق تابىسى – 249 062 تەڭگە.

2020 جىلعى ءىىى توقسانداعى ءبىلىم بەرۋ جانە مەديتسينا سالاسىنداعى قىزمەتكەرلەردىڭ سانى مەن ولاردىڭ اتاۋلى جالاقىسى

(قر ۇەم ستاتيستيكا كوميتەتى)

دەگەنمەن سايروۆ ايتقان تسيفرعا ساي جالاقى الاتىن دارىگەرلەر مەن مۇعالىمدەر جوق ەمەس. جوعارى ساناتتى، بىلىكتىلىگى مەن تاجىريبەسى مول بولۋى، ءارتۇرلى قوسىمشا ەڭبەگى ءۇشىن تولەنەتىن ۇستەماقى ەسەبىنەن بۇل جالاقىعا قولى جەتكەندەر دە بار. بىراق بۇل شوۋ قوناعى ايتقانداي رەسپۋبليكالىق ورتاشا كورسەتكىشكە جاتپايدى.

* نەگىزگى جالاقىدان وزگە ءبىلىم بەرۋ ۇيىمدارى قىزمەتكەرلەرىنىڭ ەڭبەگىنە اقى تولەۋ ەڭبەك جانە ءبىلىم بەرۋ زاڭنامالارىنىڭ نورمالارىنا سايكەس ايقىندالىپ،

• ءبىلىم دەڭگەيىنە;
• بىلىكتىلىگىنە;
• جۇمىس وتىلىنە;
• ەڭبەك جاعدايلارىنا;
• ورىندالاتىن جۇمىس كولەمىنە بايلانىستى جۇرگىزىلەدى.

مۇنى ەسەپتەۋ ءۇشىن بەكىتىلگەن ءتيىستى كوەففيتسيەنتتى بازالىق لاۋازىمدىق اقىنىڭ (بلا – 17 697 تەڭگە) مولشەرىنە كوبەيتۋ قاجەت. ءبىلىم بەرۋ ۇيىمدارىنىڭ قىزمەتكەرلەرىنە قوسىمشا اقى تولەۋ قر ۇكىمەتىنىڭ 2015 جىلعى 31 جەلتوقسانداعى №1193 قاۋلىسىنىڭ 18-قوسىمشاسى مەن «پەداگوگ مارتەبەسى تۋرالى» زاڭىنا سايكەس، مەملەكەتتىك ورتا ءبىلىم بەرۋ ۇيىمىندا كاسىپتىك قىزمەتىن جۇزەگە اسىراتىن پەداگوگكە نەگىزگى جۇمىس ورنى بويىنشا عىلىمي-پەداگوگيكالىق باعىت بويىنشا ماگيستر دارەجەسى ءۇشىن 10 ەسەلەنگەن اەك ء(بۇگىندە 1 اەك – 2 778 تەڭگە) مولشەرىندە ۇستەماقى بەلگىلەنگەن.

سىنىپقا جەتەكشىلىك ەتۋ (ساناتتار بويىنشا 9-10 تەڭگە ارالىعىندا), داپتەر مەن جازباشا جۇمىستاردى تەكسەرۋ (5-9 مىڭ تەڭگە ارالىعىندا), جاراتىلىستانۋ-ناقتى عىلىمدار پاندەرىن اعىلشىن تىلىندە مەڭگەرتۋ ( تولىق اعىلشىنشا – بلا-نىڭ 200% مولشەرىنە دەيىن،ياعني 2 ەسەگە دەيىن; ءىشىنارا اعىلشىنشا – اعىلشىن تىلىندە ءىشىنارا بلا-نىڭ 100% مولشەرى), بالانى وليمپيادا-بايقاۋلارعا دايىنداۋ، ت.ب. قوسىمشا جۇمىستار ءۇشىن ۇستەماقى تاعايىندالادى. مۇعالىمدەر ەڭبەكاقىسىنىڭ دۇرىس ەسەپتەلۋىن تەگىن ونلاين كالكۋلياتور ارقىلى قاداعالاي الادى. كالكۋلياتور FavorIT سايتىندا ورنالاسقان. كالكۋلياتوردى قولدانۋ نۇسقاۋلىعىمەن مىنا جەردەن تانىسۋعا بولادى.

"The Qazaq Times"