وزبەكستاننىڭ ەكس-ىشكى ىستەر ءمينيسترى ادحام احمەتباەۆ ءۇي قاماعىندا وتىر – دەپ حابارلايدى "ورتالىق ازيا جاڭالىقتار قىزمەتى" اقپارات اگەنتتىگى.

«ورتالىق ازيا جاڭالىقتار قىزمەتىنىڭ» احمەتباەۆقا جاقىن اقپارات كوزىنىڭ مالىمەتىنشە، جەلتوقسان ايىنىڭ 25-نەن بەرى ادحام احمەتباەۆ ءۇي قاماعىندا وتىر. ونىڭ بارلىق اتاق-دارەجەسى، اسكەري شەنى تارتىپ الىنعان.

بۇعان دەيىن باق بەتتەرىندە قاڭتار ايىنىڭ 4-ءى كۇنى ادحام احمەتباەۆ پرەزيدەنت كەڭەسشىسى قىزمەتىنە تاعايىندالدى دەگەن اقپارات تاراعان بولاتىن. بىراق كەيىننەن حالىق اراسىندا ونىڭ شەنى گەنەرال-لەيتەنانتتان پولكوۆنيك دارەجەسىنە دەيىن تومەندەتىلىپ، ءجۇرىپ-تۇرعانى ارنايى قىزمەت باقىلاۋىندا ەكەندىگى جايىندا قاڭقۋ ءسوز تاراعان.

ەستەرىڭىزگە سالايىق، وزبەكستان پرەزيدەنتى شاۆكات ميرزيەەۆ جەلتوقسان ايىنىڭ 22-ءسى كۇنى پارلامەنتكە جاساعان جولداۋىندا ادحام احمەتوۆتى قاتاڭ سىنعا العان بولاتىن. ول وندا: «سىزدەر بىلەسىزدەر مە قازىر ساتقىندىعى ءۇشىن ەكس ىشكى ىستەر ءمينيسترى احمەتوۆتىڭ قايدا جۇرگەنىن؟ مەنىڭ ار-ۇجدانىم ونىڭ وزبەكستان ءمينيسترى بولا تۇرا ساتقىنعا اينالىپ، بەلگىلى ءبىر توپقا قوسىلعانىن قابىلداي المادى. مەن ەكى گەنەرالدىڭ يىعىنان پاگونىن جۇلىپ العانمىن. گەنەرال-لەيتەنانت-سىماقتار» - دەگەن.

“The Qazaq Times”