فوتو: Atameken Business Channel

قازاقستاندا 2015-2017 جىلدار ارالىعىندا 8 مىڭعا جۋىق قىلمىس انىقتالعان. شامامەن 3 مىڭ ادام قىلمىستىق جاۋاپكەرشىلىككە تارتىلدى، دەپ مالىمدەدى جەمقورلىققا قارسى ۇلتتىق بيۋرو جەتەكشىسى تالعات تاتۋباەۆ.

ونىڭ سوزىنشە، جەمقورلاردان 60 ملرد تەڭگەدەن اسا شىعىن كەلگەن. ال ونىڭ جارتىسى، ياعني 30 ملرد تەڭگەسى مەملەكەتكە قايتارىلدى.

"بۇل قاراجاتتى 19 مەكتەپ، 100 بالاباقشا نەمەسە 18 اۋرۋحانا سالۋعا كەتەتىن شىعىنمەن سالىستىرۋعا بولادى. سوتقا 6 مىڭنان اسا قىلمىستىق ءىس جولداندى. ءار جاعداي ادام ومىرىمەن بايلانىستى بولعاندىقتان ءاربىر قىلمىستىق ىسكە تەرگەۋ مۇقيات جۇرگىزىلىپ جاتىر", - دەدى تاتۋباەۆ استانادا وتكەن حالىقارالىق عىلىمي-پراكتيكالىق كونفەرەنتسيادا.

ونىڭ سوزىنشە، سوڭعى جىلدارى اقپاراتتىق جۇيەلەر ارقىلى  قىلمىستاردى انىقتاۋ ايتارلىقتاي كوبەيگەن. وسى ارقىلى 20-دان اسا ادامنىڭ قىلمىسى انىقتالعان. بۇدان بولەك تاتۋباەۆ شەتەلدىك ارىپتەستەرمەن ىنتىماقتاسۋ ارقىلى وزدەرىنىڭ مۇمكىندىكتەرى ارتقانىن ايتادى.

"بۇرىنعى پرەمەر-مينيستر سەرىك احمەتوۆتىڭ ءىسى بويىنشا  بىرىككەن اراب امىرلىگىندە 360 ميلليون تەڭگە قاراجات تاركىلەندى. وسى ەلدىڭ قۇزىرەتتى ورگاندارىمەن بىرلەسىپ، قاراجاتتى رەسپۋبليكالىق بيۋدجەتكە قايتارۋعا مۇمكىندىك بولدى", - دەپ مىسال كەلتىردى ول كونفەرەنتسيا كەزىندە.

ايتا كەتەيىك،  ءدال وسى جەمقورلىق فاكتىلەرى كوپ بولعانى ءۇشىن دە باسەكەگە قابىلەتتى ەلدەر قاتارىندا قازاقستاننىڭ رەيتينگى تومەندەگەن ەدى.

“The Qazaq Times”