فوتو: EPA

فيلليپيندەگى ەسىرتكىگە قارسى كۇرەس اگەنتتىگىنىڭ جاڭا باسشىسى ناشاقورلاردا جازالاۋ زاڭ جۇزىندە عانا جۇزەگە اساتىنىن جەتكىزدى. 2016 جىلدان بەرى مەملەكەت باسشىسى رودريگو دۋتەرتەنىڭ باستاماسىمەن ەسىرتكىمەن بايلانىسى بار دەگەن كۇدىكپەن قولعا تۇسكەندەردىڭ باسىم كوپشىلىگى پوليتسياعا قارسىلىق كورسەتۋ بارىسىندا وقيعا ورنىندا سوتتىڭ شەشىمىنسىز اتىلعان بولاتىن. جاڭا باسشى پوليتسيانىڭ جۇمىسىنا جاڭاشىلدىقتار ەنگىزىپ، الەم تاراپىنان كوپ سىنعا ۇشىراعان قاتاڭ جازالاۋ شاراسىن ادام قۇقىقتارى جونىندەگى زاڭداردى بۇزباي ورىنداۋعا ىنتالى ەكەندىگىن ءبىلدىردى. 

اگەنتتىك باسشىسىنىڭ ايتۋىنشا، تامىز ايىنان بەرى جۇرگىزىلگەن 1  341 وپەراتسيا كەزىندە نەبارى ءبىر ادام عانا قازا تاپقان. وسى جىلدىڭ قازان ايىندا رودريگو دۋتەرتە ناشاقورلىقپەن بايلانىستى قىلمىستاردى زەرتتەۋ قىزمەتىن پوليتسيادان الىپ، بۇل قۇزىرەتتى ءفيلليپيننىڭ ەسىرتكىگە قارسى كۇرەس اگەنتتىگىنە جۇكتەگەن بولاتىن. بۇل جازىقسىز ازاماتتاردىڭ ءولىمى جيىلەگەنىنە بايلانىستى حالىق پەن ادام قۇقىقتارى جونىندەگى ۇكىمەتتىك ەمەس ۇيىمدار تاراپىنان زاڭسىز اتۋ شارالارىن دوعارۋ تۋرالى تالاپتاردىڭ كۇشەيۋىنە الىپ كەلدى. فيلليپين پوليتسياسى مەن ۇكىمەت قازا تاپقانداردىڭ بارلىعى ەسىرتكىمەن بايلانىسى بار جانە قولعا ءتۇسىرۋ بارىسىندا پوليتسياعا ايقىن قارسىلىق كورسەتكەن ازاماتتار بولعانىن ايتادى.

ەسىرتكىگە قارسى كۇرەس اگەنتتىگى وتكەن ايدا 400 ادامدى تۇتقىنداپ، قۇنى 1 ملن فۋنت ستەرلينگ بولاتىن اق ۇنتاقتى قولعا تۇسىرگەن. اگەنتتىك باسشىسى حالىقتىڭ نارازىلىعىنا قاراماستان، ناشاقورلىقپەن بايلانىستى قىلمىستارمەن جۇمىس ىستەۋ قۇقىعى پوليتسياعا قايتا بەرىلگەنىن قالايتىنىن جاسىرمادى. ويتكەنى اگەنتتىكتە نەبارى 2 مىڭ ادام جۇمىس ىستەيدى. ونىڭ كادرلىق جانە بيۋدجەتتىك مۇمكىندىكتەرى ساپىندا 165 مىڭ قىزمەتكەرى بار پوليتسيا بولىمشەلەرىنەن الدەقايدا تومەن. ءفيلليپيننىڭ پرەزيدەنتى رودريگو دۋتەرتە ەگەر التى ايدىڭ ىشىندە ەسىرتكىمەن بايلانىستى قىلمىستار تومەندەمەسە، بۇل قۇزىرەتتى پوليتسياعا قايتا تاپسىراتىنىن ايتقان بولاتىن.

“The Qazaq Times”